Wp/fit/Eeliäinen

Eeliäinen

Eeliäinen merkittee 'se joka liikkuu/kulkee eelä' ja on aivan ylheinen ja luonolinen osa arkipäivästä joka kylässä koko Tornionlaaksossa. Eeliäinen on hyvin tunnettu olento nykysinkin, koska sitä ei ymmäretä eikä piätä yliluonolisena olentona. Useasti nähhään sen ihmisen haamun ketä ootethaan, ja välistä se ootettu ilmottaa muula tavala ette hän on tulossa. Aiemin eeliäiselä oli näpperä tapa ilmottaa tuloa, koska ei ollu telefuunia. Eeliäinen ilmottaa vierhaista noin puoli tiimaa ennen tuloa. Kainulasjärvessä yks vaimo meinasi ette yhelä miehelä olit niin lujat eeliäiset ette ennen ko hän sanoi kylässä ette kyllä se on paras mennä kotia, niin se kaveri kotona kuuli askelheet trapussa.

Kainulasjärvessä toinen vaimo kuulee ja välistä näkkee miehensä tulevan noin 15 minuuttia aiemin oikeata tuloa. Tämä tapahtuu useasti keskelä päivää. Joilaki on lujat eeliäiset niinko Mestos Albevainala, joka oli Halmheelta ja sitä ennen Mestosvaarasta. Jos sellaisila on kova hoppu eli halu kävvä jossaki sillon se tapahtuu se fenomeeni. Joku henki mennee eelä.

Männikössä emäntä asui saaressa ja kuuli aina talvela kun hänen mies oli tulossa kotia mettätöistä poikki jään. Ritinä alkoi kuulumhaan puoli tiimaa ennen kun mies tuli.

Kuusihuornaksesta on yks kuvaus eeliäisestä missä kaks velimiestä näkevät sitä. -Mie olen itte nähny keskelä päivää pitkhään. Saatoima kohta koskea hänheen, meni meän läheltä. Velimies kysyi: -Mihinkäs ajentila on niin hoppu? Ei saanu kuitenkhaan vastausta. Mies huiskutti käsiä, ja vähän jälemin tuli oikea ajentti, sanoi Algot Eriksson, Kuusihuornaksesta. Mutta eeliäinen ei jättäny jälkiä lumheen.

Kattokaa

Lissää tietoja: Kansansusko

Lähe

Birger Winsa 2007. Manalaisitten kirja - Andarnas bok. Meänkielen förlaaki.