Wp/dtp/Tan Sri Michelle Yeoh
Tan Sri Michelle Yeoh PSM (/joʊ/ YOH; lahir Yeoh Choo Kheng; Cina ouhai: 杨紫琼; Cina sandad: 楊紫瓊; 6 Magus 1962) songulun misisingkono tondu id Malaysia di pantangon. Nointutunan sabaagi Michelle Khan id filom-filom pogulu dau id Hong Kong, nointutunan isido ontok 1990-an kalapas minisingkono id piipiro siri filom id Hong Kong miampai mogisusuai kowoyowoyoo, miagal ko' id filom Yes, Madam (1985), Magnificent Warriors (1987), Police Story 3: Supercop (1992), The Heroic Trio (1993), om Holy Weapon (1993).
Kalapas minundaliu hilo id Amerika Syarikat, nakaanu isido ko'okunan id taang somppomogunan tu minisingkono id filom di James Bond, Tomorrow Never Dies (1997) om filom seni bela diri Ang Lee, Crouching Tiger, Hidden Dragon (2000), hinonggo nakaanu isido ko'okunan BAFTA sabaagi misisingkono tondu di nabantug. Luminaab o pakalajaan dau miampai filom-filom miagal ko' Memoirs of a Geisha (2005), Sunshine (2007), The Mummy: Tomb of the Dragon Emperor (2008), Reign of Assassins (2010), Kung Fu Panda 2 (2011), om The Lady (2011), hinonggo minsingkono isido sabaagi Aung San Suu Kyi.
Misingkono i Michelle Yeoh diti sabaagi monguguhup id filom komedi Crazy Rich Asians (2018) om Last Christmas (2019), om filem Marvel Cinematic Universe Shang-Chi and the Legend of the Ten Rings (2021). Misingkono nogi isido id siri tibi Star Trek: Discovery (2017–2020) om The Witcher: Blood Origin (2022). Minisingkono isido sabaagi tondu di osundu id filom Everything Everywhere All at Once (2022), om nakaanu isido Anugerah Akademi sabaagi tondu misingkono di nabantug, om duminadi momomogun Asia kumoiso di nakaanu anugerah, om duminadi momomogun Malaysia kumoiso di nakalantoi id Anugerah Akademi id mogisusuai tinimungan.
Natad web agregat pogintigasan filom Rotten Tomatoes pinapatayad isido, iso mantad mosisingkono nabantug poingompus timpu ontok toun 2008. Ontok toun 1997, nopili isido do majalah People sabaagi iso mantad "50 tulun alawa id pogun", om ontok toun 2009, id majalah di miagal pinapatayad nogi isido sabaagi iso mantad "35 Jelitawan Layar Lebar Sepanjang Zaman". Ontok toun 2022, Time minomungaran isido sabaagi iso mantad 100 tulun di bobos kirahung id pomogunan.