Wp/dtp/Cik Siti Wan Kembang
Duli Yang Maha Mulia Paduka Seri Maharaja Puteri Cik Siti Wan Kembang | |
|---|---|
.jpg) | |
| Sultan Kelantan (bagi wilayah Gunung Chinta Wangsa, Ulu Kelantan) | |
| In office 1610 Masihi – 1677 Masihi | |
| Preceded by | Sultan Ahmad Shah ibni Al-Marhum Raja Muda Mansur Shah III |
| Succeeded by | Puteri Saadong |
| Personal details | |
| Born | 1570 Masihi |
| Children | Puteri Saadong |
| Residence | Taman Serendah Sekebun Bunga Cerang Tegayong |
Cik Siti Wan Kembang nopo nga songulun momomorinta tondu legenda di koumbal momorinta do kesultanan id pantai timur Somonananjung Tana Malayu di pomungaranan do Kelantan.
Tumanud sajara, noboros do minomorinta isido do Kelantan kiikiro 1610 gisom 1677 Masihi. Asaru isido osiliu do kono tapangkal id suang susuyan do sajara di tongononon do tulun sandad. Poingkuro po, aiso po katapatan do kinohoroon kono diti di asaru boros-boroson id suang hikayat klasik om tangon momogun loolobi po di kitolikudon do tulun Malayu Kelantan. Nosusui nogi isido sabaagi songulun di minomorinta iso pogun di pomungaranan do 'Negeri Taman Serendah Sekebun Bunga Cerang Tegayong' om momoguno pamalahawan, Seri Maharaja Puteri. Nosiliu isido do "Puteri" ontok toun 1580.
Latar likud
Soira Sultan Mansur Shah (Kelantan) minidu pogun ontok 1526 M (928H), mantad dii pinosiliu tanak kusai disio, i Raja Gombak sabaagi do Sultan miampai pomolohou "Sultan Gombak". Kalapas minidu pogun kawagu i Raja Gombak ontok 1548M, manangaki di Sultan Mansur di pinadadi sabaagi tanak angkat, i Raja Ahmad, nosiliu sabaagi Sultan Kelantan ontok 1548M. Miampai pomolohou dau, Sultan Ahmad Shah ibni Al-Marhum Raja Muda Mansur Shah III. Nokoingkaa tu aiso o tanak di Raja Gombak.[1] Kalapas dii, minanansawo i Sultan Ahmad di Cik Banun Puteri Seri Nara D'Raja, pinsan di Raja Hussein id ponong sawo dau, i Lela Wangsa Pahang. Yolo ngoduo nakaanu songulun tanak tondu di pomungaranan do i Cik Siti Wan Kembang.[2] Minidu pogun i Sultan Ahmad ontok 1561M, om 4 nogi toun di Cik Siti Wan Kembang ontok dii. Mantad no dii, pinosiliu i Raja Hussein mantad Johor sabaagi Pemangku Raja Pemerintah Kelantan. Tumanud buuk Detik-Detik Sejarah Kelantan, nosuat di Sa'ad Shukri Haji Muda, kalapas noiduan ginawo i Raja Hussien ontok di toun 1610M (1018H), nosiliu di i Cik Siti Wan Kembang sabaagi do Raja Kelantan ontok toun dii. Pointindohoi isido id Gunung Chinta Wangsa, Ulu Kelantan, pikiikiro 40 kilometer kumaa Tenggara Kuala Krai.
Kopomorintaan
Kopomorintaan Cik Siti Wan Kembang id Gunung Chinta Wangsa nointutunan kopio panakasabab do ogumu papadagang mantad suang om soliwan pogun kohompit no ngawi do tulun-tulun Arab di momolohou di Cik Wan Kembang sabaagi do "Paduka Cik Siti", minoi hilo. Haro o paus di korohianan kopio dau, ii nopo nga pinatahak di tulun dau di poingiyon id Gunung Ayam.[3]
Gambal do paus dii pinosuang id dumbangan do tusin amas miampai kousinan pogun, om pinodadi di kawagu sabaagi soboogian mantad lambang kogoyoon poun Kelantan di kakal po gisom baino.
Id timpu kopomorintaan di Cik Siti Wan Kembang di momorinta do Gunung Chinta Wangsa dii, id ponong koibutan kosilahon do pogun Kelantan, nakaharo o iso koporintaan di poinlongkod id Jembal, id siriba pomorintaan di Raja Sakti (1638M) (1046H). Kalapas nokoidu pogun isio, tanak dau, Raja Loyor pinosiliu do Raja ontok (1649M) (1059H). Pinagaa isio do duo tanak, songulun kusai di noiduan ginawo mantad tokodo po om songulun tanak tondu, pungaranan do i Puteri Saadong,
Piontokon di osonong nosiliu id pialatan Koporintaan Cik Siti Wan Kembang id Nulu Chinta Wangsa miampai Koporintaan Loyor id Jembal. Pinosiliu di Cik Siti Wan Kembang i Puteri Saadong sabaagi tanak angkat sabaagi mamaalapau do takhta koporintaan soira mamanau isido, nokoingkaa tu aiso iso o tanak dau tu au minansawo.
Tulun do Nulu Chinta Wangsa momolohou di Puteri Saadong songulun sumandak di olundus om alawa sabaagi Puteri Wijaya Mala. Kinolundusan di Puteri Saadong di nokorikot id kopongoilaan di Maharaja Siam id nonggo pinapaatod do utusan momuhaboi di Puteri Saadong, nga au notorimo. Pinasawo i Puteri Saadong di Raja Abdullah,pinsan disido, om pinomahkota id Kota Tegayong (Taman Serendah Sekebun Bunga Cerang Tegayong) di pinoundaliu hilo Kota Jelasin id Kota Mahligai.[4]
Suminuang do Islam
Tumanud Setiausaha Agung Pertubuhan Kerabat Raja Jembal Kelantan, Tengku Mohd Norhamzah Engku Hussin, 63, kotimpuunon nopo nga okon ko poingingit do ponudukan tauhid (Islam) i Cik Siti Wan Kembang. Poingkuro po, soira korikot ii padagang-padagang Arab hilo Kelantan, nakagayat ginawo disido do sumomok kumaa ugama dii. Hinta di popokito okon ko Islam isido nopo dau di kotimpuunan nga, ngaran dolikud disido nopo nga Wan Kembang, okon ko Wan Fatimah toi ko' Wan Aminah. Padagang-padagang do Arabh momolohou disido sabaagi "Paduka Che Siti". Tengku Norhamzah popohuyad do kowoowoyoon di Cik Siti Wan Kemang kalapas suminuang Islam sabaagi songulun di warak. Kopomusarahan poinaru kokomoi tondu dii gisom baino om kinatagakan disido id Gunung Ayam di nokoboros sabaagi ghaib popokito do woyo keramat.
Iso tudan mantad ponuatan monompogunan Islam nabantug, Ibn Battuta minoboros do kiwaa songulun raja tondu kiugama Islam kingaran do Urduga id Kuala Krai (id suang ponuatan dii, Kilu Krai). Raja tondu dii koilo papanau do kuda, mamana om monuat tulisan Arab. Soboogian sumber moboros do Urduga nopo nga i Cik Siti Wan Kembang. Poingkuro po, poninduan i Urduga sabaagi Cik Siti Wan Kembang milo kasala tu sokiro intangan do fakta, zaman eksplorasi Ibn Battuta (1304-1369), popokito do poimpasi isio 300 toun lobi kopogulu ko mantad kinohoroon di Cik Siti Wan Kembang.
Buuk Detik-detik Sejarah Kelantan poposusui do minongoi i Cik Siti Wan Kembang hilo Gunung Ayam do sumambayang manahak tinan poinggonop kumaa Minamangun om ralan koposion disido au nodi noilaan kalapas dii.
Sukuon
- ↑ Kelantan zaman awal: kajian arkeologi dan sejarah di Malaysia, Hassan Shuhaimi bin Nik Abd. Rahman (Nik.), Perbadanan Muzim Negeri Kelantan, 1987 - Kelantan - 268 pages
- ↑ Kelantan: politik dan dilema pembangunan, Alias Muhammad, Gateway Publishing House, 1989 - Kelantan - 136 pages
- ↑ Kesultanan Melayu, Volume 1, Rogayah A. Hamid, Mariyam bte Salim, Dewan Bahasa dan Pustaka, 2006 - Malay literature - 586 pages
- ↑ Peradaban Melayu Timur Laut, Aziz Deraman, Dewan Bahasa dan Pustaka, 2003 - History - 432 pages, History of Malay civilization in the northeastern Malaysia and southern Thailand.