Wp/ctg/চিটাঙ
সিটাঙ (অইতিঅ়াশিক নাম: ফোর্টো গ্র্যান্ডে এদ্দে ইসলামাবাদ) বাঙলাদেশর দুসরা ডঁ৴র শ৴র। বন্দরনগরি নামত জানাউ়না শ৴র ইবা বাঙলাদেশর দইন-ফুগর এরিয়ার সিটাঙ জেলাত আস়ে। বানিজ্যিক রাজদ়ানি ইশেফ্যে জানাউ়না মুর়া, দইজ্যা এদ্দে উফত্যকাত গ়িরি ত়াইক্কা সিটাঙ শ৴র কুদরতি দিশারর লাই ফ্রাইস্যর রানি ইশেফ্যে ব৴ত নাম হামাইয়ে। ২০১৭ শালত শ৴রত মানুশ আস়িলদে ৮৭ লাক়ত্তুন বেশি। ড়াহার বা৴দে বাঙলাদেশর বেকত্তুন গুরত্তঅলা শ৴র অ়ইলদে সিটাঙ। এন্ডে দেশর বেকত্তুন ডঁ৴র সিটাঙ বন্দর বা৴দেঅ বউত কিসিমর ব্যবশা ফতিশ্টান আস়ে। মুরইল্যা সিটা৴ঙ এদ্দে বঙ্গদরিয়ার বিসকান্দি কর্নফুলি দইজ্জার কুলত শ৴র ইয়ানর জাগা। বাংলাদেশর ইকোনমিত সিটাঙ বউত ডঁ৴র শরিকত রাহ়ে । সিটাঙ বন্দর, দুনিয়ার বেকত্তুন ফুরানা বন্দর গিনর মিজি উগ্যো, জিয়ানর উফকুল টলেমির দুনিয়া মেফত আইশ্যিল, ইবা দেশর মেইন দইজ্যার গ়লনদুৰার। বন্দর ইবা বঙ্গদরিয়ার বেকত্তুন ব্যস্ত ই়ন্টারনেশনাল দরিয়াবন্দর এদ্দে দইন এশিয়ার তেসরা ব্যস্ত বন্দর।