Jump to content

Wp/cnh/Lai Baibal Thiang

From Wikimedia Incubator
< Wp‎ | cnh
Wp > cnh > Lai Baibal Thiang

Lai Baibal Thiang lehnak tuanbia cu atanglei bang hin a si. [1]

Hakha Baibal Ca

[edit | edit source]

Hakha holh in Baibal a let hmasatu cu siangbawinu Laura Hardin Carson a si. 1920 kum October ni 6 ah America a kir hlanah Thawngṭha pali Matthai, Marka, Luka, Johan le Lamkaltu a leh hna i Press in an nam i an chuah hna.

Lai Baibal Ca

[edit | edit source]

Dr. Chester U. Strait nih Laiholh a thiam cangka in 1931 kum ah Biakam Thar leh a thawk. 1939 kum ah Biakam Thar cu a leh dih. Hmanung bik ahran relnak cu 1940 kum ah an lim. Cu kum ṭhiamṭhiam ah American Baptist Mission Press nih Biakam Thar cu an chuah. A min ah hitihin a si.

LAI BALBAL CA

The New Testament

in

Chin: Lai Dialect

Hakha pastor Rev. Sang Ling nih Dr. Strait cu Baibal leh a bawmh, tiah Rev. R. G. Johnson nih a ṭial. Dr. Strait lehi Biakam Thar cu 1979 kum tiang hman a si.

Lai Baibal Thiang

[edit | edit source]

A hramthawk ah Rev. David Van Bik le Rev. Robert G. Johnson an i bawmh i an leh. Biakam Hlun hnarcheu tiang an leh. Rev. R. G. Johnson cu kir ṭhan ti lo dingin 1966 kum May ni 15 ah America ah a tlung colh. Rev. David Van Bik nih Baibal leh cu a hmaithlak i a tangmi Biakam Hlun hnarcheu le Biakam Thar cu a hun lim hna. United Bible Societies nih 1978 kum ah an chuah i mizapi nih relawk in 1979 kum June thla ah kan hmuh. Cucu remh ṭhan a si i 1999 kum ah a chuak. Cu a chuakmi cu remh ṭhan a si i 2006 kum ah a chuak ṭhan. Cu hnu hun remh ṭhan a si i 2014 kum ah uk 6000 a chuak ṭhan i chikkhat ah an zuar dih.

Biahren Thar

[edit | edit source]

Lai Baibal Thiang a chuah hnu kum hra tluk ah Rev. James Sangawi nih Revised Standard Version in Biakam Thar a leh. Kum 4 tluk a rau. Consultant he CACC rianṭuantu hna nih Bible Society nih a remh caan a rau deuh tiah a ti i a ngan khawhlo caah Rev. Sangawi nih amahte in a nam i 2002 kum October thla ah a chuah. Biakam Thar cu min dang a bunh i Biahren Thar tiah a ti.

Baibal Cawnpiaktu

[edit | edit source]

The Bible Society of Myanmar hruainak in Rev. Dr. Cung Lian Hup nih Study Bible cu Biakam Thar a lim i a cauk in 2010 kum ah a chuak. Hi Baibal Cawnpiaktu hi Kawlram ah tuahmi Study Bible chungah a chuak hmasa bik a si.

Lai Holh Biakam Thar

[edit | edit source]

Rev. Cinzah Lianmang nih King James Version in Biakam Thar cu Hakha holh ah 1994 kum in a leh. Matthai in Rom Cakuat tiang a leh dih cang. Saya Ṭha Cung Bik, Saya Lian Irh Cin le Pu Tawk Mang nih an bawmh.

Hakha Chin Chan Thar Lai Baibal

[edit | edit source]

Rev. Dr. Van Cung Tum le Pu Ram Luai an i bawm i an lehmi Baibal cu Hakha Chin Chan Thar Lai Baibal tiah an ti i, 2012 kum ah Biakam Thar siseh, 2013 kum ah Baibal aning in siseh a chuak.

Hakha Lai Baibal Thiang

[edit | edit source]

Rev. Hoi Cung Tum nih a leh i Bibles International nih 2014 kum ah Biakam Thar cu cauk in an chuah.

Baibal Cathiang

[edit | edit source]

Rev. Dr. Rual Uk nih New King James Version in a leh i 2014 kum ah a nam. January 05, 2016 ah Church On The Rock, Hakha Kawhhran ah pekchanhnak le phawtzamhnak a tuah.

Falam Baibal

[edit | edit source]

Siangbawipa Rev. Dr. Joseph H. Cope nih Falam Baibal cu Laizo holh in Biakam Thar leh a rak thawk i 1933 kum ah uk khat a rak chuah. Cu hnu ah mi dangdang zong nih leh an i zuam lengmang. Hneksaknak ah lehmi timi kha Biakam Thar dihlak in 1951 kum ah rak chuah a si. Rev. E. Kyon Bil nih a rian dangdang he kemh chih pah in 1960 kum hrawngah Biakam Thar cu Today English Version in a rak leh i a lim. Asinain United Bible Societies nih Baibal lettu hna consultant ah an chiahmi Dr. Norman Mundhenk nih Rev. E. Kyon Bil lehmi Baibal cu a lung a tling lo. Rev. E. Kyon Bil cu Falam Baibal lettu dingah a duh lo i a hlawt. Biakam Hlun lettu dingah mi dang nan chiah lai, tiah Falam Baptist Association ruahnak a pek hna.

1973 kum March thla ah Falam Baptist Association nih Rev. Stephen Hre Kio kha Laizo holh in Baibal leh cu an fial. 1974 kum January ni 1 in Rev. S. Hre Kio nih Falam Baibal leh cu a thawk i Biakam Thar he Biakam Hlun he a lim. Laizo holh in a lehmi Falam Baibal Thiang cu 1991 kum ah a chuak. Cucu remh ṭhan a si i, remh ṭhanmi cu 2005 kum ah a chuak. Rev. Thang Hup nih King James Version in Falam Baibal cu a leh i Biakam Thar he Biakam Hlun he 1982 kum ah a lim. 1996 kum ah Biakam Thar cu uk 1000 a nam i a chuak. Biakam Hlun cu nam lo in a um. Cun Rev. Thang Hup ṭhiamṭhiam nih NIV in Falam Baibal cu a leh i 1987 kum ah Biakam Thar he Biakam Hlun he a lim. 1993 kum ah Biakam Thar cu uk 3000 a nam i a chuak. Biakam Hlun cu nam lo in a um. King James Version in Falam Baibal cu Biakam Thar he Biakam Hlun he Rev. Dr. Sui Lian Mang nih a leh lio a si.

Ngawn Baibal

[edit | edit source]

Falam peng Ngawn miphun holh in Biakam Thar, Phungthlukbia le Salm an leh dih cang.

Zanniat Baibal

[edit | edit source]

Falam peng Zanniat miphun holh in Biakam Thar, Phungthlukbia le Salm an leh dih cang.

Tedim Baibal

[edit | edit source]

Siangbawipa Cope nih Kamhau holh in Matthai Thawngṭha a leh i 1915 kum ah British and Foreign Bible Society nih an chuah.

Laisiangtho Thak

[edit | edit source]

Siangbawipa Cope nih pehtlai thliahmah in Biakam Thar cu Kamhau holh in a leh i a lim. American Baptist Mission Press Rangoon nih an nam i 1932 kum March thlah ah a chuak. Kamhau Biakam Thar cu Chin holh in ahmasabik a chuakmi Biakam Thar a si. A min ah hitihin an ṭial.

LAI SIANGTHO THAK

N. T. CHIN

Kamhau dialect

A lettu: J. H. Cope

Rangoon 1932, A.B. Mission Press.

Laisiangtho

[edit | edit source]

Rev. Kam Khaw Thang nih Tedim Baibal cu a leh i Biakam Thar he Biakam Hlun he a lim. Bible Society of India nih New Delhi ah an nam i 1983 kum ah a chuak. Cu a chuakmi cu an remh ṭhan.

Siyin Baibal

[edit | edit source]

Rev. Max Vai Pum nih Siyin holh in Biakam Thar a leh. Ṭhate in an remh hnu ah an nam i 1999 kum ah Biakam Thar a chuak. Cun komiṭi nih Biakam Hlun an leh i 2003 kum ah Biakam Hlun cu a chuak.

Zo Baibal

[edit | edit source]

Tedim peng ah Zo miphun an um i Zo holh in Biakam Thar a leh i 2004 kum ah Biakam Thar cu an lim.

Khumi Baibal

[edit | edit source]

1935 kum ah Khumi holh in Biakam Thar an rak leh i Biakam Thar a um. Atu ah Biakam Hlun leh an dih i a cauk chuahnak an tawlrel cuahmah lio a si.

Mara Baibal

[edit | edit source]

Mara (Miram) Baibal hi siangbawi Reginald A. Lorrain nih a rak leh i 1956 kum ah a cauk in a chuak.

Dai Baibal

[edit | edit source]

Dai holh cu Mindat, Kanpalet le Matupi peng chung ah a ummi Dai miphun holh a si. Ms. Hagar nih Biakam Thar a leh i 1996 kum ah Biakam Thar a chuak.

Mindat Baibal

[edit | edit source]

Mindat khua holh hi Cho holh an ti. Rev. Thang Ngai Om nih Cho holh in Biakam Thar a leh i 1999 kum ah a chuak. Atu hi Biakam Hlun an leh lio a si.

Matu Baibal

[edit | edit source]

Rev. Lung No le Rev. Lai Hno nih Matu holh in Biakam Thar an leh i 2004 kum ah Biakam Thar cu a chuak.

Zotung Baibal

[edit | edit source]

Rev. Kaw Kung nih Zotung holh in Biakam Thar a leh i 2003 kum ah uk 3000 a chuak.

Zophei Baibal

[edit | edit source]

1998 kum in Rev. Dr. Ral Buai, Sayaci Lian Kung, Pu Sang Nawn le Pastor Khua Mang nih Zophei holh in Baibal an leh. 2004 kum in nihin tiang Rev. Dr. Ral Buai, Sayaci Za Kham, Saya Duh Ceu le Mark Wannemacher (Supervisor) nih an leh. Biakam Thar an leh dih cang i 2010 kum ah Indian Bible Society nih an nampiak hna. Biakam Hlun leh an thawk i Genesis, Salm le Phungthlukbia an leh dih cang.

Kuki Baibal

[edit | edit source]

Kuki Baibal hi a cauk in nam cuahmah lio a si cang.

Lautu Baibal

[edit | edit source]

Lautu Baibal hi The Bible Society of Myanmar nih 2012 kum February ni 1 in a leh an thawk. New Revised Standard Version in lehmi a si i, a lettu cu Rev. Dr. Si Thar a si. Review Committee 7 an um. Atu cun Biakam Thar leh an lim cang i a cauk belte in a chuak rih lo.

Chirhchan

[edit | edit source]
  1. Rev. Jones Mang Hup, Laimi Khrihfa Thawhkehnak (1906-2014), Chin Association for Christian Communication. 2014.