Wp/cak/Ri tuj

Ri tuj

Janila’ k’atzinel nikakusaj chin niraq’omaj ronojel ri yab’il ri k’o pa qak’aslem. Roma janila’ ütz chin ri qach’akul roma wakamin ri winaqi’ man nikikusaj. Po xa xjalatäj ronojel ri k’aslem man nikajota’ nikib’ij chi ri man ütz ta’.

Xa k’o ri kikaxlan tuj, po man junan ta’ k’o janila’ rejqalem po man junan ta’ ri rumeq’enal. Ri tuj ri xkikusaj ri qati't qamama’ janila’ rejqalem roma rije’ taq nipe’ jun q’axomal ja ri’ nikikusaj, nikib’ox ri kiq’aq’ nikiya’ jun uk’ub’ël ya’ chin nimeq’e’. Ri tuj xkusäx roma ri qati't qamama’ roma janila ütz po wakamin nikusäx po man konojel ta winaqi' nikikusaj roma janila’ sub’ nub’än, chuqa' xaq ri xan. Po chupam jun xtijay ko’öl nib’ox q’aq’ naya’ pa ruwi’ jun k’ojlib'äl ya’ chin nimeq’e’ ütz ri ya', chuqa' akuchi’ nib’oy ri q’aq’ ri winaqi’ nikiya’ ab’äj akuchi’ xti pa’e’ ri k’ojlib’äl chin ri ya’.

Po taq xmeq’e’ ri ya’ nikelesaj ri si’, choj nik’oje’ ri rupuxkil q’aq’ po nikitz'apäj ri xtijay chin nikoje’ ronojel ri meq’enal chupam po nok ri k'exelom chin xterana’ ri tuj, toq nok chuqa' ri yawa’ richin xtuna’ ronojel ri meq’enal che ri tuj. Ri tuj chin ri yawa’ man xtik’oje ri yab’il pa raqän, chin majun noqa’ ri tew chij. Pa tuj che ri yawa’ nikiya’ meq’en ya’ chij richin nimeq’e ruch’akul, ri k'exelom rija' nurob’ ri q’aq’ chij ri yawa’, nukusaj jun joq chin nuya’ ronojel ri meq’enal che ri yawa’, chuqa' ri kexelom nutix ri ya’ chij ri ab’äj chin nimeq’e’ ronojel ri tuj, ronojel ri nuk’ul ri yawa’. Ri k'exelom nuchäp rupam ri yawa’ chin nirelesaj ronojel ri tew xuk’ul.

Temascal

Chuqa' nikib’än ri tuj chin napon ri rutz’un ri ixöq taq xk’oje’ jun ak’wal rik’in. Taq nel ri yawa’ nok ri nene’ chin natanisex pa tuj, janila’ k’atzinel ronojel richin ri nene’ nuk’ul ri q’aq' chin chanin niraq’omaj pe’ ri rumuxu'x chuqa' roma ri nitzaq ke ri' ri ak’wal ütz niwär. Ronojel ri xkiya’ ri qati't qamama’ ütz pa qak’alem po roj wakamin man niqaya’ ri rejqalem, ütz ta’ niqab’än richin ke ri’ man k’ayewal xtiqak’ul. Ri pamaj taq niq’axon ütz nameq’ersaj ri ya’ taq xroqon, naya’ ri rora’ taq nitewur ütz natäj chin yak’achoj.