Wp/cak/Ri samaj

Ri samaj

Pa qatinamtït ri jujun samaj k'o nïm kejqalem ruma konojel ri winaqi' e k'äs pa jun tinamït nkib'än jun kisamaj richin konojel yek'ase' rik'in kikotemal.

#Ri tikonel

Ri tikoj awän pan Iximulew

Rusamaj ri tijonel

Ri k'exelom

Ri tikonel janila nïm rusamaj nub'än pa jun tinamït ruma ja rija' ri nya'o kiway, kiq'utun konojel ri juley chik winaqi'. Matyox chi re jun tikonel, konojel ri winaqi' yerikir nkilöq' ri jalajöj taq ruwäch che' chuqa' ri jalajöj taq ruwäch ichaj ye'awïl pa ri k'ayb'äl.

#Ri tijonel

Ri samaj richin jun tijonel janila nïm rejqalem ruma ja rija' ri k'o pa ruq'a' ruq'axaxik ri k'ak'a' taq na'oj chi ke ri ak'wala', chi ke ri k'ak'a' rujotay ri tinamït.

Toq jun tijonel nsamäj pa rub'eyal, rija' nuya' ruto'ik ronojel ri na'oj etaman pa jun tinamït, pa ruq'a' rija' k'o rutaluxik ri utziläj taq na'oj eyakon kuma ri ati'taj mama'aj richin ri tinamït.

#Ri k'exelom

Jun chik chi ke ri nima'q taq samajela' pa jun tinamït, ja ri k'exelom.

¿Achike ruma nïm rejqalem ri rusamaj ri k'exelom pa jun tinamït?

• Ruma pa ruq'a' ri k'exelom ye'aläx ri k'ak'a' winaqi' richin jun tinamït; ja rija' ri nto'on richin nik'oje' ri k'aslem pa jun tinamït.
• Ri rusamaj man xe ta ri nuya' k'aslem, chuqa' ja rija' ri nrelesaj ri yab'il e k'o pa ri tinamït; ja rija' ri retaman rub'eyal kokisaxik ri jujun taq q'ayïs aq'om richin nel ri yab'il pa kich'akul ri winaqi' eyawa'.
• Richin jun k'exelom naq'oman, rija' yerokisaj jalajöj ruwäch wachinäq achi'el ri: q'ayïs aq'om, ab'äj, chay chuqa' juley chik wachinäq nkelesaj ruq'axomal jun winäq ri yawa'.

Ke ri', chuqa' e k'o juley chik taq ruwäch samaj ri e k'o pa jun tinamït; richin nawetamaj kiwäch ri samaj, k'o chi yab'etzoloj kik'in ri samajela' richin nawetamaj ronojel ri na'oj k'o pa ruwi' ri jujun samaj.

We at k'äs pa jun maya' tinamït, ¡kakikot! Ruma at jun maya' winäq ri atkijotay ri maya' winaqi'.

Janila matyox ruma xasik'ij re jun nusamaj re'.

Xkatzolin ta chik pe jun q'ij.