Wp/cak/Ri Tuj
Ri tuj pa qatinamít k’o k’ïy na’oj ruk’wan. Ojer kan ronojel ri taq jay k’o kituj. Ronojel ri taq winaqi’ yetujan; ke ri’ nkib’ij chi re toq ye’atin chupam ri loq’oläj tuj.
Ojer kan konojel ri taq ach’alal ye’atin pa tuj ri q’ij saq’ij. Pa tuj man xa xe ta jun winäq nok, ye’ok ka’i ox’i taq ach’alal. K’o taq b’ey konojel taq ach’alal yetujan. K’o b’ey nab’ey nok ri ati’t, ruma’ kan k’o k’ïy k’atän chupam ri tuj.
Ri k’exelom nikikusaj ri tuj ruma’ nuk’achojrisaj jalajoj taq yab’il e k’o pa taq ch’akulaj. Rij’e nkib’ij chi ri tuj achi’el ruté rupam ri qate’. Ruma’ xti ko’öl, meq’en rupam, toq yatok chupan nana’ rumeq’enal ri sub’, ri ya’. Taq yatati’n chupam ri tuj ri ach’akul nuna’ jun tik’asäs. Kan man nawajo ta’ ya tel ta pe’ pa tuj.
Ri k’exelom, rije’ nikikusaj nab’ey ri k’in ri ixöq toq nuya’ jun ak’wal. Rum’a ruch’akul ri te’ej nuk’oysaj k’ïy k’ayewal k’ïy q’axomal. Nok k’ïy tew pa ruch’akul chuqa’ nub’än k’ïy samaj toq naläx ri ak’wal. Ri tuj nutzolij che ri te’ej rumeq’enal chuqa’ nuto’ chin ruch’akul rupam rute’ nik’oje’ kan pa ruk’ojolib’äl, ri chin man nril ta q’axomal ri te’ej ri chwa’q ri kab’ij.
Chuqa’ ri k’elexoma’ nkikusaj ri tuj, toq nkina’ chi ri ak’wal toq k’a k’o chirupam ri te’ej manäq ütz ta rub’anän. Chupan ri tuj ri k’exelom nub’än utzil ri ak’wal richin ta manäq k’ayewal ril ri te’ej chuqa’ ri ak’wal. Chuqa’ ütz yatujan toq k’o jun sokotajïk chawe’. Ri sokotajïk chanin nichaqij toq yatatïn pa tuj.
Ri ojer kan pa qatinamit chi Xot, pa ronojel taq jay e k’o ri tuj. Pa k’ïy toq achoch ri tuj nïm ruk’ojlem, pa toq ronojer jay e k’o tuj. Konojel taq winaqi’ nikikusaj ri tuj, jantape’ ye’atin ri ronojel saq’ij. Taq nikibän jun tuj nikib’än jun ruwäch ri tuj, nikitzij taq kotz’i’j.
Ri wakami xa xe’ jujun taq jay k’a k’o na kituj. K’ïy taq jay kami’ manäq chïk kituj ruma’ manäq k’o ruk’ojlib’äl ta chwajay. Toq jay wakami eko’öl ok, ri taq ach’alal xek’yir pa taq jay. Ri ak’wala’ ruma’ man niketamaj ta’ achike’ ruk’ojlem ri loq’oläj ruma’ ri tuj man nikikusaj ta chik. Julëy chïk nkib’ij chi ri wakami man jata ri tuj nokusäx chïk ruma’ xa xik’oyan ruramaj. Ke ri’ nkib’j ruma’ man ketaman ta chi ri tuj jun loq’oläj aq’om.
Ri tuj jun loq’oläj aq’om pa qana’oj, aq’om pa kina’oj ri taq qatit qamama’.
Ütz ta niqak’axoj pa kik’ux ri rojojel taq winaqi’, ri ak’wala’ xtani’ alab’oni’ chi ri atinïk pa tuj janila’ k’aslemal ruk’wan, nusipaj pe cheqe’.