Wp/cak/RUQ'ARIK KIB'I RI TAQ JUYU'

Kere' rub'anikil xkikusaj richin choyb'äl

PACHAY: Rub'i jun ch'utin tinamit k'o pa Taq'aj Och' Äj (San Martin Jilotepeque) Keri' nib'ix chire ri juyu' re' ruma yalan k'iy chay k'o chiri'. Ri chay yalan nim rejqalem pa kik'aslem ri ojer qati't qamama' ruma rije' k'iy rukusaxik xkib'än. xkikusaj richin choyb'äl chuqa' xkikusaj pa taq xukulem richim aq'omab'äl.

Pa qach'ab'äl nib'ix chi re chay ab'äj ri qati't qamama' xkokisaj richin xe kikamisaj chikopi', chuqa' richin kisamajb'äl pa juyu' chuqa' richin ri lab'äl. Ri chay ab'äj xk'ayix pa jalajöj taq ulewal roma yalan k'atzine chi ke ri winaqi', chuqa' ojer kan xkijalwachij ruwäch jalajöj taq wachinäq richin xek'ayin chuqa' richin yetikïr nikik'ul jalajöj taq ruwäch che', chuqa' jalajöj taq tzyaqb'äl.

Ojer kan nikitzijob'ej ri winaqi' chi e k'o ri chayeros, ke ri' nib'ix chi ke ri winaqi' ri nikisamajij ri chay ab'äj richin aq'omanïk, ruma niqupix jun b'ey pa jun juna' jun peraj richin ri ch'akulaj richin nel ri kik'el chupam ri kowiläj ik' ruma nikitzijob'ej chi k'atzinel chi ri kik'el nujalwachij ri richin majun yayawaj ta.

Chuqa' ri k'exeloma xkikusaj richin xkiqupij ruk'amal ri muxu'x toq naläx jun ak'wal, rije' nikib'ij chi ri chay ab'äj rik'in ütz ki ch'ojch'orisan majun nipujïr ta ri achike naqupij rik'in ruma ri' yalan nïm ruq'ij chi kiwäch rije'.