Wp/cak/Qate’ Ruwach’ulew

From Wikimedia Incubator
< Wp‎ | cakWp > cak > Qate’ Ruwach’ulew

Qate’ Ruwach’ulew[edit | edit source]

Jun nimaläj Na’oj kisipan kan ri qati’t qamama’ ja ri tiqaya’ ruq’ij Qate' ruwach'ulew ruma rija’ qate’ yojrajo’, nusipaj qaway, yojrumeq’ersaj, nusipaj ri qak’aslem chuqa’ ronojel q’ij nuk’ut chi qawäch k’ïy na’oj ruma niqab’ij chi ri Qate’  ruwach’ulew jun tijonel ruma nuk’ut chiqawäch chi k’atzinel niqak’waj qi kik’in ri jalajöj ruwäch che’, kik’in ri jalajöj ruwäch taq chikopi’, rik’in ri kaj, rik’in ri ab’äj, rik’in ronojel ri k’o xeqaxkin ruma k’o chi utz niqak’waj qi achi’el qachaq’ qi ruma xa xe’ jun qate’ k’o,  ja ri qate’ ruwach’ulew.

Qate' Ruwach'ulew

Ojer kan ri qati’t qamama’ nikib’ini’aj jun chikop, jun q’ayïs, jun che', jun ab’äj, jun ch’umil ruma ri k’aslem rutün  ri rik’in ri qate’ ruwach’ulew, po re xek’is toq xe’oqa ri kaxlani’ ruma rije’ xkib’an pa oyowal chi tijalox ri b’i’aj ruma rije’ xkiya’ chi ke ri maya’ winaqi’ kaxlan taq b’i’aj ke ri toq xeb’ek’is ri b’i’aj akuchi kiximon ki rik’in ri qate’ ruwach’ulew.

Toq niqaya’ rejqalem ri qate’ ruwach’ulew pa qak’aslem ja ri toq niqaya’ ruq’ij chuqa’ niqachajij. Ja  ri’ toq ri nisamajix ri ulew nik’utux q’ij chi re’  ri tata’aj yetzijon rik’in ri ulew ke re’ nikib’ij: qate ruwach’ulew takuyu’ numak ruma xkan kajij xkan ch’ey po ruma k’o chi yansamajij richin ninya’ kiway ri walk’wal, ri wawej chuqa’ nink’utuj chawe chi xkinato’ xtejotayin ta pe ri nutiko’n richin k’o qaway, takuyu’ tasacha’ numak loq’oläj qate’ ruwach’ulew.

K’o jun nimaläj rub’ey nikik’waj ri qati’t qamama’ qate’ qatata’ rik’in ronojel ri jalajöj taq tiko’n nikib’än po rik’in ri tikoj ri loq’oläj Ixim ja ri ri k’o kïy etamab’   äl niqil rik’in ruma k’o chi nikanox ri ijatz re re’ ko rub’eyal nib’an, k’o chi ri ruwach’ulew ruq’ij chi nib’an tiko’n rik’in, chuqa’ k’o chi ri qanan Ik’ setesïk, k’o chi niqa’ ri jöb’ chuqa’ k’o rub’eyal toq nib’an ri tiko’n ruma k’o chi yatik’on pa cholaj rik’in re jun b’anob’äl re janila ruk’wan ri rikín ri qate ruwach’ulew.

Tikirel janta pe niqak’utuj q’ij chi re qate’ ruwachulew toq nichap rub’anik jun jay, toq ri achi’a’ nikikamisaj chikopi’ pa juyu’. Toq niqasäx jun che’, toq nib’an utzil ri b’ey, toq nib’an samaj rik’in ri ulew  ruma niqaya’ q’axomal, b’is chi re’ ri qate’. Ruwach’ulew.