Wp/cak/Maya' tzyqab'äl

Maya' tzyaqb'äl

Ri maya' tzyaqb'äl, ja ri' ri nimaläj sipanïk xkiya' kan chi qe ri qati't qamama', ruma ri' janila k'atzinel nqaya' ruq'ij, nqaya' rejqalem.

kib'i' jalajöj taq tzyaqb'äl

Ri ixoqi' chuqa' achi'a' nikikusaj kitzyaqb'al chuqa' jujun tzyäq niqakusaj, k'o kiq'ajarik, niqab'ij chuqa' chi ri kem rutunun ri' rik'in qana'oj, röj maya' winaqi', akuchi' na öj k'äs, jujun tinamït retaman achike ruma nikib'än taq jujun retz'ab'al richin kipas, kipo't, kuq, chuqa' juley chik.

Ri po't

Ri kemonela', jalajöj taq ketz'ab'al nikib'än chi ke taq kipo't, chuqa' ruk'wa'n ri' rik'in ri achike nikina', ri taq po't chuqa' nikitzijoj pa ruwi' ri retal k'aslem kik'owisan chupam ri lewal ri', chuqa' yeq'alajin pe ri taq rukotz'i'j ri kemonel, ri taq rawäj, ri achike nuna' toq nikemon, ruma ri taq b'onil yerukusaj.

Achi'el ri kipo't ixoqi' kaqchikela', niq'alajij jun retal käq, chupam ri po't, ruma ri Käq (rojo) - chikel (kik'el - sangre), chuqa' nutzijoj ri jampe' kikik'el ri qati't qamama', xkikiraj ruma ri nimach'a'oj xb'an toq xepe ri kaxlani', chuqa' ri ch'a'oj xb'anatäj pa rulewal ri Iximulew, richin runataxik ri qaxe'el chuqa' kiq'axomal, kuchuq'a' ri qati't qamama'.

Ixöq rik'in jun maya' tzyaqb'äl.

E k'o taq achib'äl achi'el ri kot, ri masat, ri taq b'alam, ri taq kumätz, ri taq achib'äl ri ri', nikiq'ajuj ri taq chajinela' richin jujun taq tinamït, chuqa' ri rajawal taq juyu' taq'aj.

Achib'äl, achi'el ri awän, taq tz'i', taq äm, taq kotz'i'j, taq winaqi', taq ruwäch che', re taq etz'abäl re' chuqa' nikiya' rukikotem ri jujun po't.

Chuqa' e k'o juläy chik taq retz'ab'al ri taq po't, achi'el ri koyopa', ri rub'onil ri qate' ruwach'ulew, ri taq xokoq'a', ri kumatzin, ri rupam läq, chi yech'o' pa ruwi' ri taq qana'oj, ri taq ch'umilal, ri rub'eyal ri k'aslem.

Ri uq

Pa Rulewal ri Iximulew e k'o jalajöj taq rub'eyal uq ye'okus̈ax, achi'el chuqa' ri kib'onil, nokusäx ri q'eq, ri b'onil ri', nuq'ajuj ri aq'a' chuqa' ri kajulew, e k'o juläy chik, chuqa' k'o ri säq b'onil chupam, nuq'ajuj ri taq ch'umil, chuqa' julëy chik b'onil achi'el ri xar, käq, q'än, k'o akuchi' e k'o jalajöj ketz'ab'al, achi0el richin Tz'oloj ya'.

Ri pas

Ri pas, ja ri' ri ximb'äl nokusäx richin nutemej ri rupam ri ixöq, chuqa' nib'e chi rukojol ri po't chuqa' ri uq, richin nutemej ri uq. Ri pas nuq'ajuj ri qakowil röj ixoqi', rutemeb'al ri nub'än ri Qate' ruwach'ulew pa qak'aslem, chuqa' jalajöj kib'onil taq pas e k'o, jantape' k'o jalajöj rub'onil chupam.

Ri rutzyaq ri achi

Ri kamixa

E k'o akuchi' nikikusaj ri säq kamixa', nuq'ajuj ri jamalil richin ri k'aslemal, chuqa' ri rub'onil qanima'. K'o akuchi' ri kamixa' k'o juley chik kib'onil, k'o ri käq, ri q'än chuqa' ri achi'el rukem ri po't.

Ri wexaj

Maya' tzyaqb'äl richin chi Xot, Tat Tereso

Ri wexaj chuqa' säq rub'onil, po k'o akuchi' ni wexaj achi'el ri rukem ri po't, rik'in ri b'onil ri', achi'el pa Tz'oloj ya', ri aj Tz'ikinajay, chuqa' juley chik, xa xe chi wakami, ri achi'a' kisachon ri kitzyaq, xa xe chik juley chik taq tzyaqb'äl nikikusaj

Ri xerka

Ri xerka jun ko'öl rutob'al ri wexaj, nixim rik'in jun pas, man kan ta konojel ri achi'a' nikikusaj xerka, xa xe chik ri nimawinaqi', chuqa' k'o akuchi', ri achi'a' man nikikusaj ta wexaj, xa xe ri xerka nikikusaj

Juley chik taq rutz'aqat ri tzyaqb'äl

Richin ri achi

K'o ri pawi'aj, ri xajab', ri kipeqes, jun ti su't nikiya' pa kiqul, jun xti tzuy richin kiya' pa samaj nikib'än pa juyu'.

Richin ri ixöq

Ri ixoqi' k'o akuchi' nikikusaj ri xoq'op, nima'q taq peraj kem achi'el richin ri po't richin nikitemej kiwi', chuqa' ri xikinaj, ri chachal richin q'anapwäq, saqapwäq, po ojer kan ri qati't qamama' xkikusaj ri räx ab'äj richin kichachal chuqa' kixikinaj, chuqa' ri xajab', k'o jun tob'al uq chuqa' richin man nikitz'ila' kuq, chuqa' ri nimawinaqi' nikikusaj jun rij po't, ruma ojer kan majun koton ta, chuqa' ruma nuq'ajuj ri na'oj, nimaläj ketamab'al ri qati't, toq napon k'ïy kijuna'.