Wp/btx/Guru Patimpus Sembiring Pelawi

Guru Patimpus Sembiring Pelawi em kapken sekalak merga Sembiring Pelawi sini sitandai selaku simanteki Kuta Medan, sini genduari enda jadi sada kuta simbelin i Indonesia enda. Guru Patimpus itandai sekalak pengelana arah gugung Taneh Karo Simalem, sini megati ngelakoken perdalanen guna niar-niari daerah sekitar. Guru Patimpus ikataken tubuh i Kuta Aji Jahe sekitar abad pe-13 seh ku abad pe-17 ken.

I bas perjabunna si pemena, Guru Patimpus erjabu ras sekalak beru Perangin-angin Bangun i Kuta Batu Karang sini genduari masuk ibas wilayah Kabupaten Karo. Arah perjabunna sipemena e, maka i pupus ndeharana sekalak anak sini tergelar Bagelit, ras kemberahenna Beru Bangun enda me Guru Patimpus Sembiring Pelawi mbuka ras manteki kuta i Perbaji.

Guru Patimpus Sembiring Pelawi itandai sada jelma si mbestang, megegeh, mbisa, mejile, dingen erkeleng ate nandangi jelma sinterem. I bas kebiasan kalak Karo, maka pergelarken man sekalak jelma selain gelarna tubuh ras megati ka nge i kataken rurunna em kap kerna kebeluhen, gegeh, jasa-jasana, bagepe kebiasanna. Maka kerna sienda kerina man bana i pergelari me ‘Guru Pa Timpus’, ija ‘guru’ em kapken sekalak sini pentar ibas kerina pemeteh sini lit, bagepe simbisa. Sedangken, ‘Pa’ ibas kebiasan kalak Karo i pake guna pendilo man sekalak dilaki. ‘Timpus’ megati jadi sada kebiasan bas kalak Karo khususna dilaki sini rusur ngelakoken perdalanen gedang, ija keperlunna ibas perdalinen bagi tambar-tambar, racun, panganen, bagepe senjatana, rsd i timpusna bas sada uis ras pe itimpuskenka ka nge ku kulana, sini biasana i datas gurung entahpe i awakna. Akap sinuraten enda me sada alasen maka ia ipergelari ia ‘Guru Pa Timpus’

Ibas turi-turin kerna kegeluhen Nini Guru Patimpus Sembiring Pelawi enda, megati i kataken maka ia sekalak si mbisa, sini lalit sada jelma pe i kutana sini ngasep ngelawansa, maka kerna si e megati me Guru Patimpus Sembiring Pelawi enda ngelakoken perdalanen guna adu tanding entahpe erguru nambahi pemetehna.

I turiken, bas sada paksa Guru Patimpus Sembiring Pelawi nusur gugung nari ku berneh ngelewati rimba raya, Lau Biang seh me ia ku Lau Tani i deher Namorambe ras Delitua ku kenjaheken Lau Deli(Sungai Deli) guna nguji pemetehna. Ibegina i Kuta Bagun lit sekalak Ulama sini seh kel mbisana si tergelar Datuk Kuta Bagun, maka mericuhkel Guru Patimpus enda guna adu tanding ras ia. Tapi, ibas adu tanding sekali enda, Guru Patimpus kepeken la ngasep naluken kinimbisan Datuk Kuta Bangun enda, maka ia pe dungna tading ras erguru man Datuk Kuta Bangun e ras pe piga-piga paksa dungna ia pe mulihi ka erjabu ras sekalak Beru Tarigan em beru arah pupus sekalak Panglima Deli Tarigan Mergana(Raja Pulau Brayan).

Arah perjabunna sipeduaken e, maka ipupus ndeharana ka me dua anak sini tergelar Si Kolok ras Si Kecik sini jadi cikal bakal Urung Hamparen Perak . Ras kemberahenna Beru Tarigan enda maka i bukana kuta antara Lau Deli ras Lau Babura sini igelari Kuta Medan genduari enda. Kejadian enda i perkiraken terjadi tanggal 1 Juli 1590 sini seh asa genduari i peringeti jadi wari manteki Kuta Medan(Hari Jadi Kota Medan).

Guna nginget-nginget perbahanenna si mbelin sini enggo manteki Kuta Medan Simalem, maka i Kuta Medan i abadiken me sada gelar dalin Jl. Guru Patimpus ras pe i pajekken sada tugu i sekitar Jl Gatot Subroto, em kap Tugu Guru Patimpus Sembiring Pelawi.