Wp/btm/Marjamita

MARJAMITA OBAR KOBAR MAMBUKA DOHOT PAJOJOR HATA JAMITA (SUHUT)

Parjolo au marsantabi sapulu mangadopkon ula kahanggi, mora, anakboru. Satorusna hatobangon dohot na i patobang-tobangon, umumna hita na marhadir di majelis paradatan on. Mangiuthon umur dohot pamatang ni anak nami si … patut dohot tama ma ibana mamolus adat matobang. Di ari na solpui langka ma ibana tu jae tu julu manjalaki siangkup markaya donganna matobang. Satibona ibana di alaman ni huta … manatap mada ibana tu jae tu julu, impol mada mata manaili adong ma na solong ni matana, na tumbuk tupa tu pangarohaina, dongan rongkap ni tondina ima jagar-jagar ni mora. Disi taringot mada ibana dipituah ni tobang-tobang, muda itinggalkon huta niba, ama dohot ina, songoni koum ula kahanggi ditopotkon huta ni halak, ama dohot ina mai dijalakan nangkan na jadi koum dohot kahanggi. Dijalakan doma jolo tehe kahanggi niba anso dioloskon diibana maksud tujuan niba, nangkan na manyangkutkon hata niba tu jagar-jagar ni mora, botima pamikir ni ibana ima anaki di ari na solpui. Ditopotkon na ma kahanggina di … , salaho dioloskon maksud tujuanna ima na manyangkutkon hata tu jagar-jagar ni mora. Disi langka ma rupana kahanggi manopotkon jagar-jagar ni mora, satorusna tu mora ima na manyangkutkon hatana, disi mudah-mudahan dapot do parsarumbukanna dohot panamana. Tarsangkut mada hata ni anaki si … tu jagar-jagar ni mora nami ima di … . Marsimulak muli mada halai, na manjamitahonna di hami bahasona ibana madung manyangkutkon hatana tu jagar-jagar ni mora di … . Mambege jamita ni anaki di ari na solpui, ami barisan ni amana margodang jana marlomo ni roha. Di ari nasolpui madung ami suru do kahanggi dohot anak boru manopotkon mora tu … buat manangkasi hata ni daganak na tarsangkut, sanga natutu napeto do sanga na gonjak sianyang. Jadi disi mangalus do mora natutu napeto do. Marsimulak muli pasuruan, manjamitahon na di hami bahaso obar kobar ni daganaki na tutu peto do. Mambege jamitana ami margodang jana marlomo ni roha. Satorusna di ari na solpui, madung ami lagutkon do sudena kahanggi nami namarsisolkot. Ami jamitahon diibana satontang hata ni danak nang tarsangkut tu jagar-jagar ni mora di … , sanga na turut do ibana margodang dohot marlomo ni roha. Disi mudah-mudahan sude kahanggi namarsisolkot turut do margodang marlomo ni roha. Disi marpokati do hami na markahanggi marsisolkot, dibaen hita na markahanggi dope on namargodang ni roha hita undang majolo ula-ulanta satorusna mora dohot anak borunta, sanga turut do ibana margodang dohot marlomo ni roha. Putus ni tahi dohot pokat nami na markahanggi marsisolkot ima di ari na manyogoti, hami dalankon hata tangking tu homu koum namion sasudena, anso marlagut tu bagas namion, onma diborngin ni arion. Mudah-mudahan naso marhalangan madung hadir dibagas namion. Onpe hombang ni burangir nami mangadopkon sude ula kahanggi mora dohot anak boru, satorusna hatobangon dohot na dipatobang iring dohot hatana. Na manjamitahon na ma hami di homuon sasudena bahaso anak nami si … madung manyangkutkon hatana tu jagar-jagar ni mora di … . Jadi on pe marsapa hami di homuon sasudena sanga na turut do roai homuon margodang dohot marlomo ni roha…? Muda na turut do ningkomu hami manyambut margodang ni roha, muda ngada peda ningkomu turut, hami manjalang tahi dohot pokat sanga songon dia dalan panamana. Botima jolo hata sian au suhut, baen dison do kahanggi anak boru nami, ibana ma patama patupa hataon, usudahi ma dohot assalamu ‘alaikum warohmatullohi wabarokatuh.

BALOSAN OBAR SUHUT (MORA SANGA HATOBANGON)

Godang lomo mada roha mambege jamita muyu on sasudena. Angke godang ni roha muyui na rap godang ni rohanta sudena mai. onpe ma tobang ma hataon. Sanga songon diape hajat-hajat muyu na tarpaujung kita mai. Botima.

PASAHAT OBAR KOBAR

PASAHAT HATA JAMITA TU MORA (SUHUT SANGA KAHANGGI)

Disurdu burangir nami nangkin diruas na parjolo, ima satontang na manjamitahon hata ni anak nami na tarsangkut. Sanga na turut do homuon nangkin margodang ni roha, disi nangkin madung mangalus do mora nami dohot na tobang-tobangan, godang lomo do binege nangkin rohana. Hami sambut nangkin dohot godang ni roha. Tai baen adong dope hata nangkan dokonon nami, ima nangkin anso marsapa hami sanga pade dope hami surduhon burangir nami mangalus nangkin hata na tobang-tobangon, ngada mangua ning ibana. Jadi on ma disurdu burangir nami ditingkat na paduaon, dibaen dalan obar kobar meon manurut paris-paris ni paradatan porluma dison sinaloan dohot sinabisukan. Dibaen ngada sadia sinaloan dohot sinabisukan nami, hanya sinaloan dohot sinabisukan ni kahanggi mora dohot anak boru maia na hami aropkon. Ampot sogot andigan ro jou-jou mora nami sian … nangkan mambaen paradatan ni daganakon. Onpe na pasahat obar kobar paradatan ni daganakon ma hami dihomuon sasudena, homu ma na hami haropkon nangkan manyangkili manyaloangina muloi sian pangkal lalu tu parujunganna. Botima hatana.

BALOSAN OBAR (MORA SANGA HATOBANGON)

Satontang sahat-sahat muyuon anso diboto homu, ngada jabat marsipasahatan kita i. Madung sahat nalolot kian doi muloi sian ompung ompunta narobiani. Angke muda tibo dihomu songonon dompak, tontu hamion mai nangkan manyaloseonna. Muda muse sangandigan tu hami, tontu hamu muse mai nangkan manyaloseonna, nangkan na margonti doi songon na maridi dipancur. Onpe marsapa hami dihomu andigan ma arina manurut padan parjanjian muyu dohot morantai nangkan padomu hata, anso rap hita boto be manogong langka ?

BALOSAN SAPA-SAPA NI MORA (SUHUT SANGA KAHANGGI)

Muda ngada martukar padan dohot janji, insya Allah di ari ahad on ma manyogot. Botima

PASAHAT KAREJO

OBAR KOBAR PASAHAT KAREJO (SUHUT SANGA KAHANGGI)

Disurdu ni burangir nami ditingkat na paduana nangkin, ima satontang na pasahat obar kobar, disi nangkin mangalus mora dohot na tobang-tobangon ngadai ning ibana marsipasahatan kita angke madung sahat na lolot doi. Hami sambut nangkin dohot margodang ni roha. Dibaen harana adong dope na solot di pangarohai hata nagiot dokonon ima dalanna anso marsapa hami sanga pade dope di padangka hata. ning mora nami nangkin ngada mahua. Jadi on mada dihata burangir nami ditingkat na patolunaon, muda dung tarsalosei ula kahanggi obar kobar ni daganakon tu morantai di … , tontu hita nangkan manogu-nogu jagar-jagar ni morantai. Muda selamat tondi dohot bandanna tu tapak tangganta, marcita-cita di pangarohai nami mambaen sada karejo “horja siriaon” dalan mangupa-upa daganak na dua simanjujung, harana daganakon ondope mamolus adat matobang, anso ulang tarlimpun tondi ibana na manompu adat matobang. Jadi on ma dison ma homu mora nami dohot na tobang tobangon sasudena, mangguruon na ma hami on dihomu, sanga tarbaen doi karejo na hami cita-citai. Pula tarbaen do ning komu naron hami margodang marlomo ni roha. Tai pala ngada ning komu tarbaen, hami manjalang tahi dohot pokat sanga songon dia panamana. Botima

BALOSAN OBAR (MORA SANGA HATOBANGON)

Satontang karejo na dimaksud muyuon ima mambaen horja siriaon buat mangupa-upa daganak na dua simanjujung, dipikir-pikir di roha niba ngadai naso tarbaen i, tarbaen kita doi. Tampakna do rantosna, rim ni tahi do nagogo Songon diape godang dohot menek ni karejonta mulai sian narobiani Ngada unjung hita mamala tu jae tu julu Muda satumtum hita, satahi sapandok Ngadai naso unjung lalu aha na dicita-cita

Marsapa hami dihomu, diari dia ma hajat muyu baenon salaho songon dia godang dohot menekna karejo nangkan baenon taon…? Jadi onpe ulang adong nian ambat kalangan dibaen Tuhan tai, anso tarlaksanaon kita aha na hita cita-citaon muloi sian pangkal torus akhirna. Botima