Wp/btm/Imbo
Imbo (Indonesia: Siamang) ima erek na lomlom na ginjang tanganna, dohot mangolu i ayu-uyu. Biasona, imbo namaloan molo maninjal i ginjang ayu, mambaen inda adong predator na bisa menangkup kalai. Imbo ima spesies natarancam, arani deforestasi habitatna copat. Imbo inda adong ikurna dohot puna postur pamatang na urang lidang. Imbo pe puna parkembangan otak na ginjang. Imbo marwarna nalomlom tar coklat rara. Erek on puna jalinan antara jari napadua dohot napatolu.
Anatomi[edit | edit source]
Abong[edit | edit source]
Imbo itutupi abong na apal i ampir sude pamatangna, salain urum, jari, palakpak tangan, kihik, dot palakpak pat nai.Sadebana spesies imbo puna urum marbontuk tintin dot marwarna nabontar.
Indra[edit | edit source]
Imbo puna indra na ampir sarupo dohot alak, songon parbinegean, pangaligian (maligi warna), parmuapan, pandaian, dot antukon.
Urum[edit | edit source]
Imbo puna urum namarabong dohot mata nalomlom dohot igung namenek.
Tangan dohot Pat[edit | edit source]
Imbo puna tangan dohot opat jari nalanjang itamba induktangan na tar menek. Alai puna pat dohot lima jari, itamba induk pat. Imbo bisa maniop dot mangoban barang-barang dohot dua tangan dot pat nialai. Molo alai atia marsigayung i ayu (idokon brachiating), Alai mamake opat jari-jari tangan nialai songon kail, tai alai inda mamake induktangan.
Panggodangna[edit | edit source]
Imbo jantan puna ukuran na sarupo dohot imbo boru-boru, ima tar 30-35 inci dot borat 7 kilogram.
Habitat[edit | edit source]
Imbo bahat mangolu i Asia Tenggara. Alai juo bahat i marsuo i deba ganan, songon Semenanjung Malaysia dohot Sumatera.
Parange[edit | edit source]
Imbo ima binatang na lobi aktif molo arian. Alai margaul ibagasan rombongan-rombongan namenek ima ngon dua sampe tolu imbo. Marbeda dohot erek nalainnai, Imbo inda adong inganan na usus ge modom. Alai modom sasada sanga dot dongan i antara dangka ni ayui. Alai modom dohot posisi tegak, markusandar i bantalan napir na adong i ujung pudi nialai. Bantalan on idokon ischial callosities. Salain i, imbo puna kantung talonan na biaso idokon kantung gular. Kantung on bisa kombang manjadi godang songon ulu ni alai namarfungsi mambaen pita sora na lobi gogo. Atia woktu ibagasan mara, imbo boru-boru nangkan pakaluar sora na gogo dot ipaiut Imbo jantan saonok tolu sampe lima bolas menit. Sora nialai bisa tarbege ngon dao sakitar 6,5 km. Imbo inda malo marlange dot mabiar i aek. Imbo bisa mangolu sakitar 35-40 taon.
Panganon[edit | edit source]
Imbo ima binatang omnivora. Sakitar 75% panganon nialai ima buah, lainnai bulung, bungo, biji-bijian, dot ulit ni ayu.Alai juo mangankon serangga, rambang-rambang, pira ni amporik, dohot amporik na menek. Arana mabiar i aek, Imbo nangkan mandaiskon pat nangonjolona tu bagasan ni aeki sanga manggosok tangan tu bulung na litak dot mangincop aek i abong ni patna ambaen inumon.
Maranak dohot magodang[edit | edit source]
Imbok muloi maranak i umur 5-7 taon. Imbo boru-boru mangalahirkon anakna i umur 8 bulan. Imbo na sorang puna obuk obuk na otik pado imbo natobang dot puna borat sakitar 6 ons. Induk ni imbo pature daganak nialai atia daganak. I atia sorang, imbo naposo lokot sajo i boltok ni indukna anso ulang ngalian. Alai manyusu sakitar 1 taon. Imbo naposo rap dohot induk nialai sakitar 5-7 taon.
Sitatus[edit | edit source]
Imbo ima binatang na tarancam punah. Hal on ibaen arana bahatna namanangkup imbo ambaen paringaon. Anso mangantai punahna imbo, porlu campur tangan pamerentah mambaen imbo manjadi objek wisata dohot riset anso adong labona tu daerah pado-pado mangganggu sanga manangkup satwa on.