Wp/btm/Gaja

Gaja Afrika i Taman nasional Mikumi, Tanzania

Gaja ima mamalia nagodang ngon familia Elephantidae dohot ordo Proboscidea. Molo aslina, adong dua spesies na iakui, ima gaja afrika (Loxodonta africana) dohot gaja asia (Elephas maximus), bope adong bukti mandokon molo gaja duru afrika dot gaja arangan afrika spesies na marbeda (L. africana dohot L. cyclotis). Gaja naadong i sude Afrika bagian-Sahara, Asia Selatan, dohoy Asia Tenggara. Elephantidae ima sada-sadana familia ngon ordo Proboscidea na marbeda; familia laiin na sonnari madung punah tarmasuk mammoth dohot mastodon. Gaja afrika jantan ima binatang darat nagodangna dohot ginjang na dapot sampe 4 m (13 ft) dohot boratna urang lobi 7.000 kg (15.000 lb). Gaja puna tando-tando tartontu, dohot na paling jelas ima belalai sanga proboscis na igunaon tu bahat kaporluan, tarutamo giot mosa, mangincop aek, dot mambuat benda. Ipon serina topak manjadi sait na dapot igunaon manjadi sanjata dot alat get mamindahkon benda sanga manggali. Bulung nisupingna na godang mambantu mangatur suhu sibuk nialai. Gaja afrika puna suping na lumobi godang dohot gurung-gurung na olbung, oni suping gaja asia ummenek dohot gurung-gurungna tuginjang.

Gaja ima hewan herbivora na dapot marsuo i marmocom habitat, songon padang-padang, arangan, gurun, dohot paya-paya. Alai biaso maringanan i donok aek. Gaja ianggap manjadi spesies kunci harana akibatna tu lingkungan. Hewan-hewan nalain ampir manjaga jarak ngon gaja, dohot predator-predator songon singa, harimau. hyena, dohot anjing riar biasona um na manyerang gaja naposo. Gaja boru-boru ampir mangolu dohot marrombongan dohot alai saompung, ima sada boru-boru dohot anak-anakna sanga adong-adong boru-boru na mardongan dohot anak-anak nialai. Kelompok on ipimpin individu gaja na didokon matriark, na biasona ima boru-boru natobangna. Gaja puna struktur kelompok fisi-fusi, ima molo kelompok-kelompok saompung marsuo so marsosialisasi. Gaja jantan maninggalkon kelompok keluargana molo dung tolap maso pubertas, dot nangkan tinggal sasada sanga mardongan jantan nalain. Jantan dewasa biasona marinteraksi dohot kelompok keluarga atia dompak manjalaki pasangan dohot giot tahap paningkatan testosteron dohot agresi na didokon musth, na mambantu alai mandapotkon dominasi dot reproduktif. Anak gaja ima na puliaro kelompok keluarga dohot margantung tu indukna saonok urang lobi tolu taon. Gaja bisa mangolu saonok 70 taon i arangan godang. Alai mangecek lewat marsiantukan, pangaligian, parmuapan, dohot sora; gaja manggunaon infrasuara dohot komunikasi seismik molo dao antarana. Hapintaran gaja madung ibandingkon dohot hapintaran primata dohot cetacea. Alai nida puna kasadaran diri dohot patidaon olong tu gaja lain na ampir sanga madung mate.

Gaja afrika igolongkon tu spesies na rentan ning International Union for Conservation of Nature (IUCN), sadangkan gaja asia iklasifikasion tu spesies tarancam. Sada ancaman utama tu gaja ima namanggadis gading na mambaen parburuan liar. Ancaman lain lain segana habitat dohot konflik dohot alak. Gaja ipake manjadi binatang parkarejo i Asia. Najolo alai unjung ipake marporang; sonnari, gaja jotjoy ipertontonkon i kobun binatang dohot sirkus. Gaja dapot dohot momo itandaan dohot madung igambarkon i seni, carito rakyat, agama, sastra, dohot budaya populer.