Wp/brx/बैसागु

बैसागु

​बैसागुआ बर' हारिनि बयनिख्रुइबो देरसिन रंजाथाय फोरबो। बे फोरबोखौ बोसोरनि गिबि दान बैसाग दानाव फालिनाय जायो। मिथिंगा सिबियारि बर' कछारीफोरा बेखौ गोसो, मोदोम आरो जिउ होनानै मोजां मोनो। बैसागुआ बर'फोरनि खौसेथि आरो सिनायथिनि मोनसे गुदि फुंखा।

​बैसागुनि ओंथि

बैसाग दाना बर'फोरनि बोसोरनि गिबि दान।बे दाननिफ्राइनो बर'नि गोदान बोसोरा जागायजेनो।​'बैसागु' सोदोबआ बैसाग दाननि 'आगु' सोदोबनिफ्राय फैनाय। बेनि गुदि ओंथिया जाबाय गोदान बोसोरखौ बरायनाय आरो गोजाम बोसोरखौ बिदाय होनाय। बेयो मोनसे मिथिंगायारि फोरबो, जाय समाव मिथिंगाया गोदान गोरलै बिलाइजों गोदान मुस्रि मोनो आरो दावमा-दावसाफोरनि खुगायाव गोदै मेथाय खोनायो। बेबादियैनो मानसिफोरनि गोसोआबो गोदान गोसो लानानै रंजा खाङो।

​नेम फालिनाय

​गोदो-गोदाय बर'फोरा बैसागु फोरबोखौ दानसेहालागै खुङोमोन। नाथाय आथिखालाव बेखौ स्नि सानसिम फालिनाय जायो। बे स्नि साननि फालिनाय नेमफोरा गाहायाव होनायबादि: ​सैथ्र दाननि जोबथा सान एबा गिबि सानखालि 'मोसौ बैसागु' होननानै फालिनाय जायो। बे सानखालि मोसौफोरखौ थुखैनाय, गोदानायाव लाव फानथावफोरनि माला गानहोनाय आरो मान होनाय आरो सिबिनाय जायो। बैसाग दाननि 1थि खालार सानखौ 'मानसि बैसागु' होननानै बुंनाय जायो। उन्दै गेदेर बयबो गोदान जि गानो, गावसोरनि बिमा-बिफा आरो बैसो गेदेर फोरनि आथिङाव हमनानै खुलुमो आरो बोर लायो आरो इसोरनिआव आर'ज गाबो। ​थामथि सानाव 'सैमा बैसागु', ब्रैथियाव 'अमा बैसागु' आरो बाथियाव 'दावसिन बैसागु' फालिनाय जायो, जेराव नख'राव फिसिनाय जिब-जुनारफोरखौ मोजां आदार होनानै मान बावनाय जायो। द'थिआव 'आजै आजौ' फोरनि थाखाय नेम फालिनाय जायो। जोबथारनाय स्निथि सानखौ 'खुरमा बैसागु' होननानै बुंनाय जायो। बे सानाव बयबो गावबागावनि खुरमा-बाहागि आरो लोगो-लेङाफोरखौ लोगो हमहैयो आरो गोसोनि गोजोननाय सोलाय-सोल' खालामो।

​रंजानाय आरो मोसानाय

​बैसागुनि गुबै महरआनो जाबाय मोसानाय आरो मेथाय रोजाबनाय। सिफुं, खाम, जथा, सेरजा आरो गंगोना नि रिंनायजों बर' सेंग्रा सिख्लाफोरा मोसायो। बे समाव मानसिफोरा गामि-गामि नखर नखर बैसागो मागि हैयो आरो रंजानायजों गावनि दुखु-दाहाफोरखौ बावनो नाजायो आरो गावसोरनि अनसुला आखुखौ दिन्थियो। बर' हारिनि गेजेराव अनलायनाय आरो खौसेथिखौ बे फोरबोआ दिदोम खालामो।