Wp/blc/Qaaxatscili

ti tanapsulh ti qaaxatscili

Qaaxatscili-tutim wa ts'icw wa qw'lasuks wa tsitstsipii. alhpsaw wa csuuts ts ca mamis ts, wa xiku ts, wa slt'liislh, n wa qw'las wa alh7ay wa sicsiqw' wa tsakwliwa. alhpsaw tuu wa acwlh ts ca sqaluts. Slaxaw wa alh7ay alh Nuxalk. Axw paaxtits wa qaaxatscili ats - - alats'iituminu c tu s7alh7aynaw - ka qwitulhiks, ka qwyulhiks. Paaxtim wa tsay ats ca sQaaxatscili ala slhk'mstalh ts.

nu7usqnakmit wa q'panaw ts sSinumwaks. anukaliktiilhams smtiinaw wa cnaaslh ts ala 2-4 wa q'panaw ts.

ti qwitulhik ti qaaxatscili

ti qwitulhik ti qaaxatscili

Ays ti smaw alh ts stutu7imantas ala stn. qwitulhiks ti imlaakwlh tc, was sk'cuulhikliwas tsi cnaaslh tsc. ts'xulhankaw wa lhnus ts. Wics "Tree Swallow" wa itts'xlhiixw wa skwatstas ti qaaxatscili t'ayc.

ti qwlyulhik ti qaaxatscili

ays ti qw'las stutu7imantas ala nutsq' ts ala alhkwlhuulh wa t'xt. Yanicis wa stapusliwa wa amat ts ala iklhii ala nuqwyals wa amat ts. Qiqtiis tc alh ti qwitulhik tc - ti tutu-imanta tc ala stn ts. Wics "Violet-Green Swallow" wa itts'xlhiixw wa skwatstas ti qaaxatscili t'ayc.

ti xipxiplits tc

kalaalhmtim tuu wa acwlh wa alh7ay wa qaaxatscili, mukwaqw'sliwas ti sunkwstas tc. Tutu7imantanaw ts ala nutsq' ts ala sq'tsatsls. Axw xilhs skalaalhmtim wa alh7ay. wics "Rough-winged Swallow" wa itts'xlhiixw wa skwatstas tc.

ti squmlxsalh ti qaaxatscili tc

slaxaw tu wa alh7ay wa qaaxatscili - tsakwlxsnkaw ts - was lhnuslxsnkaw ts, alh7ays squmlxsalhaw ts. Tutu7imantanaw ts ala sulh ts, ala stsicalt ts, ala iklhii ala amatapsulhaw wa tl'mstnuks. Kstcwaynicit wa sulhaw ts ca sxwaxwa. alh7ay wa sulhaw ts c ti kap. Mukwapsmaw ts, was sk'culhikliwas maliixwaysc ala qwit. Lhxanmnaw ala slawsulmc ts was ala tl'uk's wa qla ts. Wics "Barn Swallow" wa itts'xlhiixw skwatstas t'ayc. Yumyumaw ats.

wa tanapsulh wa qaaxatscili ts

alhinawtuu ti smaw ti qaaxatscili, yanicis ska qwlculhtuts ala acwlh wa alh7ay wa qaaxatscili ts. Tutusulhuksaw ts ala smaw wa amat ts - slax wa sxwaxwa wa sulhuks - axkuks alh7ayuulhliwa ts c ti kap, alh7ayuulhs wa sulh ats c ti st'sals - qiqtuutsis ti numutsta ts. Yanicit ska aytut ala aqw'an ts, ala stsicalt ts, was ala sulh ts. Mukwapsm ti imlaakwlh tc, axkuks alh7ays ilh cnaaslh ilh. Lhxanmnaw ala slawsulmc ts was ala tl'uk's wa qla ts. Wics "Cliff Swallow" wa itts'xlhiixw wa skwatstas ti qaaxatscili t'ayc. Axw paaxunaw wa alh7ay wa tsitstsipii ala stam.