Wp/bew/Wiliam Sèkspir

From Wikimedia Incubator
< Wp‎ | bew
Wp > bew > Wiliam Sèkspir
Sèkspir punya tampang

Wiliam Sèkspir (hurup Arab Gundul: ويليم شکسفير) atawa dalem èjaan aslinya William Shakespeare (sek. 23 April 1564 – 23 April 1616) entu atu tukang nulis lakon, penyair, ama bintang lakon asal Inggris. Dia nulis 40 lakon nyang diketauin (dengen separohnya dirèken jenis banyolan) èn dua sair panjang selamanya dia idup. Dia idup di Stratpod-atas-Awon, Warwiksèr, Inggris. Dia punya lakon misi ditampilin ampé wayah gini. Dia sering banget ditukil dalem tulisan-tulisan modèren.

Sèkspir nulis dia punya karya sekira tahon 1592 ampé 1613. Dia punya karya entu deri nyang paling nyohor dalem kesastraan Inggris èn dipelajarin di mana-mana sekolah di mana-mana dunia. Selaènnya nulis, Sèkspir juga' belakon di matskepé lakon The Chamberlain's Men, semprakan 1594.

Sèkspir nulis lakon deri ragem jenis atawa jandrah. Ada nyang jandrahnya sejarah, trahèdi, èn banyolan. Sèkspir entu orang nyang paling pertama nyang perna nulis banyolan-trahis (tragicomedy), atu jandrah nyang nyampurin itu banyolan ama trahèdi dengen ujung gumbira.

Sèkspir punya lakon ditulis dalem basa sair. Banyak deri dia punya lakon dinatarin di tempat èn wayah nyang au di mana. Ceritranya sering kali nggregetin, romanti, èn gumbira (dalem banyolan), atawa sedi pisan (dalem trahèdi). Ni ceritra pada ngeja orang pèngèn tau apa nyang bakal kejadian ama itu tokohnya pada. Ni lakon sering ngomongin hal nyang ampé wayah gini masing penting, kaya' cinta, kesedian, arepan, kemongkokan, kegedegan, hasud, èn kegoblogan.

Sèkspir nambahin banyak kata-kata ama gabungan kata anyar ke basa Inggris. Dia bikin ada 1.700 lebi kata anyar basa Inggris.[1] Dia juga' bikin berapa kata jadi mingkin populèr.[2]

Ruju'an[edit | edit source]

  1. "Words Shakespeare Invented"
  2. Vernon, Jennifer (22 April 2004). "Shakespeare's Coined Words Now Common Currency". news.nationalgeographic.com. Dipungut per 29 Juli 2023.