Wp/bew/Wiktoriah deri Britani Gedé
Ratu Wiktoriah (hurup Arap gundul: راتو وقتورية, atawa Alexandrina Victoria; 24 Méi 1819 – 22 Januari 1901) ada satu Ratu Kerajaan Rempug Britani Gedé èn Irlan sedari tahon 1837 ampé 1901. Dia anaknya atu putri Dèt èn pengèran Inggris. Dia jadi Ratu Britani Gedé pas dia punya umur masing 18 tahon, seabisnya dia punya encing Raja William IV wapat. Dia ngewarisin tahta sebab dia punya baba ada punya tiga sudara laènnya nyang wapat sonder ninggalin anak nyang sah.
Dia dibimbing ama nyang mulia, Louise Lehzen, èn Pendèta George Davys. Dia belajar juga' dah tu ngomong ama ngebaca basa Dèt ama Prasman. Ratu Wiktoriah seneng banget ngibing, ngegambar, naèk kuda, ama nyanyi. Dia pernah dapet pengajaran pas dia masing bocah deri penyanyi opera Luigi LaBlache. Dia demen ngegambar èn gapa maèn piano.[1] Dia terus nulis dia punya buku arian sepanjang idupnya.
Wiktoriah kawin ama dia punya misan pertama, Pangèran Albert, tahon 1840. Dia ngedukung èlmu pengetauan, perdagangan, èn seni di Britani. Wiktoriah ama Albert ada punya sembilan anak. Bakal dia pada, kuarga nyang baè' ama ajaran Serani entu penting. Umumnya, orang Inggris ada ambil tuladan deri dia pada.
Pamèran Agung di Crystal Palace, Londen, dibuka' tahon 1851. Tu bisa kejadian sebagèannya lantaran Albert punya kerja keras. Tu pamèran ada mamèrin keberasilan orang-orang Britani di masanya Wiktoriah.
Tahon 1861, Pangèran Albert wapat èn Wiktoriah ngejauhin keidupan umum.
Britani mingkin jadi kuat di taon-taon abisnya, èn di tahon 1877, Wiktoriah ada dapet gelar 'Kaèsarah Hindi'. Wiktoriah ada punya kebèngbat ama Hindi, cuman kaga' pernah dah dia ke sonoh. Cuman, anaknya malah nyang ke sonoh.
Tahon 1897, Wiktoriah ada ngerayain dia punya 60 tahon jadi ratu. Ni ngeliwatin dia punya engkong Raja George III. Dia jadi ratu selamanya 63 tahon, tujuh bulan nyang lebi panjang deri mana-mana raja atawa ratu Inggris. Orang pada bilang dia 'Èropa punya nini' sebab banyak deri Wiktoriah punya anak pada jadi raja, pangèran, èn putri laèn-laèn negara.
Abis wapatnya lantaran penyakit setruk, dia punya anak lanang Albert Edward jadi Raja Edward VII èn jadi Raja Kerajaan Rempug èn Kaèsar Hindi sedari 22 Januari 1901 ampé 6 Méi 1910.
Ruju'an
- ↑ Arnstein, Walter L. "Victoria, Queen of Great Britain." Europe 1789-1914, Encyclopedia of the Age of Industry & Empire. Gale Biography in Context. Pel. 10 Juni 2014.