Wp/bew/Sébisèt

Sébisèt^[1] (hurup Arap Gundul: سيبيست; deri basa Belanda: Centrale Burgerlijke Ziekenhuis 'Ruma Sakit Kota Pusat') atawa nama resmi basa Indonésianya Rumah Sakit Umum Pusat Nasional dr. Cipto Mangunkusumo (atawa disingket RSUPN dr. Cipto Mangunkusumo atawa RSCM) ada satu ruma sakit gupernemèn punya nyang ada dia punya letak di Jakarta Sintrem, Indonésia. Selaènnya jadi RS gupernemèn, RSCM juga' jadi RS pendidikan, salah atunya Pakultèt Kedoktoran Uniwersitèt Indonésia. Ni ruma sakit punya nama diambil deri nama sorang tokoh perjoangan, dr. Tjipto Mangoenkoesoemo, atu orang tokoh perjoangan Indonésia di jaman normal^[2].

Di Sébisèt, ada rèbuan doktor ama tenaga kesèhatan laènnya barengan ngelayanin rèbuan pasièn deri mana-mana bilangan antéro Indonésia nyang saban ari dateng di ni RS. Sébisèt ada satu pusat ruju'an nasional ruma sakit gupernemèn èn ada atu tempat pendidikan doktor umum, doktor spèsialis I èn subspèsialis, pengrawat, pengrawat subspèsialis, serènta laèn-laèn tenaga kesèhatan.

Di tahon 2008, ada diresmiin ama Persidèn RI atu gedong pengrawatan nyang anyar dengen dia punya ketinggian 8 perdiping^[3], ya'entu Unit Rawat-Inep Keamprog (basa Indonésia: Unit Rawat Inap Terpadu) Gedong A. Ni gedong ada atu gedong Sébisèt punya gedong rawat-inep utama nyang dia punya muat nampungnya ampir 700 tempat tidur.

Di tahon 2010, Menteri Kesèhatan RI ngeresmiin Gedong Sébisèt nama Kencana dengen Pelayanan Berkelas Internasional (tadinya mah mao dinamain International Wing). Tu gedong perdiping 6 ada punya muat nampung 30 tempat tidur. Selaènnya Sébisèt Kencana, Menkès ada ngeresmiin juga Sébisèt punya Laboratorium Keamprog (basa Indonésia: Laboratorium Terpadu).

Di tahon 2013, Persidèn RI ngeresmiin Gedong Sébisèt nama Kirana bakal pengladènan jengkep kesèhatan mata. Tu gedong perdiping 6 ada letaknya di Jalan Kimia, Cikini, Jakarta Sintrem.

Di tahon 2011, dimulain dah tu pembangunan Gedong Pusat Kesèhatan Enya'-Anak (basa Indonésia: Gedung Pusat Kesehatan Ibu dan Anak; disingket: PKIA) ampé Januari 2014 nyang masing dalem trap pengrampungan akir dia punya pembangunan

Ruju'an

↑ Chaer, Abdul. (2009). Kamus Dialek Jakarta. K. Rép. Penerbit Masup Jakarta. Orang Betawi terdisinya èmang bilangnya Sébisèt atawa Cibisèt, èns.
↑ Chaer, Abdul. (2009). Kamus Dialek Jakarta. K. Rép. Penerbit Masup Jakarta. Jaman normal (hurup Arap Gundul: زمان نورمال) – zaman kolonial Belanda (Indo.)
↑ Saidi, Ridwan. (2007). Glosari Betawi: Kamus kata-kata, nama, dan peristiwa dari zaman prasejarah hingga zaman moderen. Betawi Ngeriung. h. 91. Perdiping (hurup Arap Gundul: فرديفيڠ) – lantai (Indo.); floor (Ing.); verdieping (Wld.)

[1] Chaer, Abdul. (2009). Kamus Dialek Jakarta. K. Rép. Penerbit Masup Jakarta. Orang Betawi terdisinya èmang bilangnya Sébisèt atawa Cibisèt, èns.

[2] Chaer, Abdul. (2009). Kamus Dialek Jakarta. K. Rép. Penerbit Masup Jakarta. Jaman normal (hurup Arap Gundul: زمان نورمال) – zaman kolonial Belanda (Indo.)

[3] Saidi, Ridwan. (2007). Glosari Betawi: Kamus kata-kata, nama, dan peristiwa dari zaman prasejarah hingga zaman moderen. Betawi Ngeriung. h. 91. Perdiping (hurup Arap Gundul: فرديفيڠ) – lantai (Indo.); floor (Ing.); verdieping (Wld.)

[1]

[2]

[3]