Wp/bew/Rebowès Indonésia

From Wikimedia Incubator
< Wp‎ | bew
Wp > bew > Rebowès Indonésia
Tulad rebowès Indonésia atawa Surat Ijin Mengemudi

Rebowès Indonésia atawa rèbowès Indonésia (hurup Arab Gundul: ربويس اندونيسى) atawa rebowès (hurup Arab Gundul: ربويس) atawa Surat ijin mengemudi (hurup Arab Gundul: سورت اذن مڠمودى; basa Indonésia: Surat Izin Mengemudi; disingkem: SIM) entu dokumèn rebowès di Indonésia. SIM jadi bukti pendaptaran èn pengenalan nyang dikasi ama Polri ama orang nyang udah menuin pesaratan administrasi, sèhat jasmani-rohani, paham betul aturan lalu lalang, èn gapa' nyetir gandaran bemotor. Saban orang nyang nyetir gandaran bemotor di jalan hukumnya pardu ain gableg SIM sesué ama jenis gandaran bemotor dia punya paké, sepegimana maktub di dalem Pasal 77 ayat (1) Wèt No. 22 Tahon 2009 (UU No.22 Tahun 2009).

Aturan wèt nyang paling anyar entu Undang-Undang Nomor 22 Tahun 2009 nyang ngegantiin Wèt No. 14 Tahon 1992 (Undang-Undang Nomor 14 Tahun 1992). Wèt No. 14 Tahon 1992 (UU No. 14 Tahun 1992) uda dicabut èn dinyatain kaga' belakon lagi, cuman Aturan Guwernemèn No. 44 Tahon 1993 (Peraturan Pemerintah Nomor 44 Tahun 1993) nyang ngejelasin Wèt No. 14 Tahon 1992 (UU No. 14 Tahun 1992) dinyatain tetep belakon selamanya kaga' tentangan atawa belon diganti ama nyang anyar, berales Wèt No. 22 Tahon 2009 (UU No. 22 Tahun 2009).

Awalnya mah, jenis SIM cuman ada SIM A, B, ama C aja, sebelonnya entinya dibelakonin aturan anyar dengen dibuatnya SIM D dengen golongan D1 bakal penyandang cacat roda empat, terus gologan SIM C dibelèk lagi jadi 3 berales kapasitèt mesin dia punya paké, ya'entu C, C1, ama C2.

Perlèng SIM dilakonin saban 5 tahon sekali èn kaga' bolé dibadalin. Berales dia punya golongan, ada 2 jenis SIM nyang kena diperlèng liwat ladènan dalem-jala (online). Sala atu pengladènan guwernemèn bakal ngasi gampil perlèng SIM ya'entu SIM Ngider (SIM Keliling). SIM Ngider entu atu pengladènan jemput bola nyang ngasi gampil bakal masarakat ngurusin belasting[1] 5 taunan perlèng SIM husus bakal SIM A èn SIM C.

Penggolongan

Sesué ama Pasal 77 ayat (2) Wèt No. 22 Tahon 2009 (Undang-Undang No. 22 Tahon 2009) pasal Lalu Lalang èn Tambangan Jalan (Lalu Lintas dan Angkutan Jalan), rebowès atawa SIM di Indonésia kena digolongin jadi dua katègori: SIM Gandaran Bemotor perorangan (bakal gandaran sendèwèk) ama SIM Gandaran Bemotor Umum (bakal mubil tambangan).

Rebowès atawa SIM Perseorangan

Pasal 80 Wèt No. 22 Tahon 2009 (UU No. 22 Tahun 2009) ngegolongin Rebowès atawa SIM Perorangan jadi beberapa macem:

  • SIM A, bakal nyetir mubil penèbèng èn barang perorangan dengen jumblah berat nyang diboléin kaga' ngliwatin 3.500 kg.
  • SIM B1, bakal nyetir mubil penèbèng èn barang perorangan dengen jumblah berat nyang diboléin lebi deri 3.500 kg.
  • SIM B2, bakal nyetir gandaran alat berat, gandaran penyènggèt, atawa gandaran bemotor dengen narik wahon tèmpèlan atawa gandèngan perorangan dengen berat nyang diboléin bakal wahon tèmpèlan atawa gandèngan lebi deri 1.000 kg.
  • SIM C, bakal nyetir motor.
  • SIM D, bakal nyetir gandaran husus bakal nyang cacat.

Rebowès atawa SIM Umum

Pasal 82 Wèt No. 22 Tahon 2009 (UU No. 22 Tahun 2009) ngegolongin Rebowès atawa SIM Umum jadi beberapa macem:

  • SIM A Umum, bakal nyetir gandaran umum èn barang dengen jumblah berat nyang diboléin kaga' ngliwatin 3.500 kg.
  • SIM B1 Umum, bakal nyetir mubil penèbèng èn barang umum dengen jumblah berat nyang diboléin lebi deri 3.500 kg.
  • SIM B2 Umum, bakal nyetir gandaran penyènggèt atawa gandaran bemotor dengen narik wahon tèmpèlan atawa gandèngan dengen berat nyang diboléin bakal wahon tèmpèlan atawa gandèngan lebi deri 1.000 kg.

Ngedapetin rebowès atawa SIM

Pasal 77 ayat (3) dalem Wèt No. 22 Tahon 2009 (UU No. 22 Tahun 2009) nyebutin kalo "Untuk mendapatkan Surat Izin Mengemudi, calon Pengemudi harus memiliki kompetensi mengemudi yang dapat diperoleh melalui pendidikan dan pelatihan atau belajar sendiri." Tu lembaga pendidikan èn penglatian kudu dapet permisi ama akrèditasi deri Guwernemèn.

Sarat rekès rebowès atawa SIM Perorangan (Persyaratan Permohonan SIM Perorangan)

Sarat pengrekès rebowès didantain di dalem Pasal 81 ayat (2), (3), (4), dan (5) Wèt No. 22 Tahon 2023 (UU No. 22 Tahun 2023), sebagé berikut:

  1. Umur
    • 17 tahon bakal SIM A, C, ama D
    • 18 tahon bakal SIM C1
    • 19 tahon bakal SIM C2
    • 20 tahon bakal SIM B1
    • 21 tahon bakal SIM B2
  2. Administratip
    • gableg Kartu Tenger Penduduk (Kartu Tanda Penduduk)
    • ngisi blangko rekès
    • rumusan sidik jari
  3. Kesèhatan
    • sèhat jasmani dengen surat keterangan deri doktor
    • sèhat rohani dengen surat lulus tès kejiwaan
  4. Lulus ujian
    • ujian téori
    • ujian plaktèk èn/atawa
    • ujian kegapaan liwat simulator

Sarat tambahan berales Pasal 81 ayat (6) Wèt No. 22 Tahon 2023 (UU No. 22 Tahun 2023) bakal saban Penyetir Gandaran Bemotor nyang bakal ngajuin rekès:

  • Rebowès atawa SIM B1 kudu gableg SIM A paling kaga' 12 (dua belas) bulan; èn
  • Rebowès atawa SIM B2 kudu gableg SIM B1 paling kaga' 60 (enem pulu) bulan.

Kegampangan

Rebowès atawa SIM bakal gandaran bemotor kena dipaké jadi SIM gandaran bemotor nyang jumblahnya sama atawa lebi renda, sepagémana dalem Pasal 84 Wèt No. 22 Tahon 2009 (UU No. 22 Tahun 2009).

  • SIM A Umum kena belakon bakal nyetir gandaran bemotor nyang kudunya paké SIM A.
  • SIM B1 kena belakon bakal nyetir gandaran bemotor nyang kudunya paké SIM A.
  • SIM B1 Umum kena belakon bakal nyetir gandaran bemotor nyang kudunya paké SIM A, SIM A Umum, ama SIM B1.
  • SIM B2 kena belakon bakal nyetir gandaran bemotor nyang kudunya paké SIM A, SIM A Umum, SIM B1, ama SIM B1 Umum.
  • SIM B2 Umum kena belakon bakal nyetir gandaran bemotor nyang kudunya paké SIM A, SIM A Umum, SIM B1, SIM B1 Umum, ama SIM B2.

Ketentuan Pidana

Saban sorang nyang nyetir gandaran bemotor di jalan nyang kaga' gableg Rebowès atawa Surat Ijin Mengemudi sepegimana dimaksud dalem Pasal 77 ayat (1) dipidana paké pidana rangkèngan paling lama 4 (empat) bulan atawa denda paling banyak Rp1.000.000,00 (cetiau tun) (Pasal 281 Wèt No. 22 Tahon 2009).

Saban sorang nyang nyetir gandaran bemotor di jalan nyang kaga' kena ngasi unjuk Rebowès atawa Surat Ijin Mengemudi nyang aci gandaran bemotor nyang disetir sepegimana dimaksud dalem Pasal 106 ayat (5) hurup b dipidana paké pidana rangkèngan paling lama 1 (atu) bulan èn/atawa denda paling banyak Rp250.000,00 (nopè'go tun). (Pasal 288 Ayat (2) Wèt No. 22 Tahon 2009).

Selaènnya pidana, penjara rangkèngan, atawa denda, pelaku tindak pidana Lalu Lalang kena dijatohin pidana tambahan nyang wujudnya Penyabutan Rebowès atawa Surat Ijin Mengemudi atawa ganti rugi nyang diakibatin ama tindak pidana Lalu Lalang. (Pasal 314 Wèt No. 22 Tahon 2009).

Penengeran penglanggaran Lalu Lalang di SIM ama petugas Polri paké penyatetan di pendaringan data Regident Pengemudi liwat lèstrik èn/atawa manuil. Pasal 73 ayat (1) Aturan Hop Polri No. 9 Tahon 2012 pasal Rebowès (Pasal 73 ayat (1) Peraturan Kapolri Nomor 9 tahun 2012 tentang Surat Izin Mengemudi).

Dalem hal penglanggaran Lalu Lalang udah nyampé bobot ponten 12 (dua belas), rebowès atawa SIM dicabut sementara, èn kalo udah nyampé 18 (lapan belas), mangka rebowès kena dicabut sebagé setrap tambahan bedasar beslit[2] mahkamah. Pasal 74 ayat (1) dan (2) Aturan Hop Polri No. 9 Tahon 2012 pasal Rebowès atawa Surat Ijin Mengemudi (Pasal 74 ayat (1) dan (2) Peraturan Kapolri nomor 9 tahun 2012 tentang Surat Izin Mengemudi).

Bikin rebowès anyar

Pembikinan rebowès (SIM) anyar kena dilakonin di kantor Satuan Penyelenggara Administrasi SIM (Satpas) nyang paling deket ama tempat tinggal KTP pendaptar. Prosedur bisa berobah berales ama tempat tinggal pendaptar rebowès, cuman umumnya begini:

  1. Ngeja surat keterangan sèhat jasmani-rohani nyang dikeluarin ama doktor (kena dilakonin di polrès setempat).
  2. Nyiapin potokopi KTP 4 lembar.
  3. Mbeli blangko rekès bikin rebowès (SIM) sesué arga nyang udah ditentuin.
  4. Mbayar asuransi Rp. 30.000. Ni asuransi sipatnya kaga' wajib.[3]
  5. Ngisi blangko èn kumpulin di lokèt nyang udah disediain.
  6. Pendaptar diminta' bakal ngliwatin 2 trap[4] tès nya'entu, Tès Tulis ama Tès Plaktèk.
  7. Abis pendaptar dinyatain lulus deri entu dua tès, pendaptar bakal diminta' nunggu penggeroan bakal ngambil potrèt èn tèken di kartu rebowès (SIM) anyar.
  8. Pendaptar biasanya diminta' bakal nunggu di kantor ampé rebowès (SIM) anyar kelar diapdrek.

Kalo pendaptar dinyatain gagal tès, Kepulisian biasanya bakal minta pendaptar bakal ngikut ujian lagi di minggu bèsoknya.

Sedari ari bulan 1 Juni 2015, Kepulisian RI juga nyedia aplikasi rekès bikin èn perlèng rebowès (SIM) bedasar dalem-jala (online), kepusat, èn kejuntrung nyang digero' OCI. Ni sistim ngasi masarakat gampil ngajuin penerebitan rebowès (SIM) anyar atawa perlèng sonder keiket tempat tinggal bedasar KTP-nya, serènta otomatis kejuntrung ama pendaringan data kependudukan èn rekeman sipil Kemendagri.[5]

Prosedur pinda tempat

Kalo pèngèn pinda tempat penerebitan rebowès (SIM) lama, padol dah, daptarin rebowès (SIM) anyar di bagèan Tata Usaha (Satpas) nyang paling deket, mangka otomatis aderès rebowès (SIM) ngikutin KTP nyang belakon.

  1. ↑ Chaer, Abdul. (2009). Kamus Dialek Jakarta. K. Rép. Penerbit Masup Jakarta. Belasting (hurup Arab Gundul: بلستيڠ) – pajak (Indo.); tax (Ing.); belasting (Wld.).
  2. ↑ Chaer, Abdul. (2009). Kamus Dialek Jakarta. K. Rép. Penerbit Masup Jakarta. Beslit (hurup Arab Gundul: بسليت) – keputusan (Indo.); decision (Ing.); besluit (Wld.).
  3. ↑ Rayanti, Dina. (29 Maret 2018). "Ingat, Kalau Bikin SIM Bayar Asuransi Tidak Wajib". detikcom. Diaksès per tanggal 12 Juli 2023.
  4. ↑ Trap (hurup Arab Gundul: ترف) - tahap (Ind.).
  5. ↑ "Bikin dan Perpanjang SIM Bisa Online Mulai 1 Juni". detikcom. (23 Maret 2015). Diaksès per tanggal 2019-04-23.
Retrieved from "https://incubator.wikimedia.org/w/index.php?title=Wp/bew/Rebowès_Indonésia&oldid=6026295"