Wp/bew/Orang jangkung
Orang jangkung (hurup Arab Gundul: اورڠ جڠکوڠ; basa Inggris: The Slender Man) entu makhluk nyang dikarang-karang deri mémé anterjala nyang nongtot di paguyuban Something Awful ama pemaké Eric Knudsen nyang maké nama Victor Surge di taon 2009. Enni makhluk karangan dirupain kaya lanang bapa'-bapa' jangkung muka rata. Orang jangkung ada punya lengen gurita[1] èn maké bèskap item lengkep ama dasi merah. Orang jangkung lajimnya suka nyulik èn ngeja sakit orang, apalagi kalo entu orang masih bocah beloman idep. Abis lengen guritanya entu kebuka, mangsanya bakal disirep. Entu orang nyang udah jadi mangsanya kaga' bisa mabur deri entu orang jangkung. Orang jangkung kaga' ada juntrungannya ama apa-apa cerita, cuman entu orang jangkung ketemu di banyak karangan nyang béda-béda, kebanyakan dikeja dala (dalem-jala). Taon 2012, orang jangkung diambil jadi atu gim betontonan nyang judulnya "Slender: The Eight Pages". Enni gim udah dicomot dua juta lebih. Ada juga gim laènnya nyang mirip ama entu gim, kaya' "Slenderman's Shadow" èn "Slender Man for iOS" jadi dua aplikasi nyang bekèn dicomotin. Sambungan deri gim "Slender: The Eight Pages", "Slender: The Arrival" dilangsir taon 2013. Ada juga pèlem sendèwèk soal orang jangkung nyang udah dilangsir atawa lagi dikembangin, kaya' "Entity" èn "The Slender Man", dilangsir dala dengen cuma-cuma abis harga sebelonnya, ya'entu $10.000,00. Taon 2013, diumrupin kalo "Marble Hornets" bakal jadi pèlem lènong.
Sejarah
Orang jangkung diciptain dalem paguyuban Something Awful tanggal 8 Juni 2009. Enni paguyuban ada punya tujuan ya'entu mermak potrèt nyang ada punya makhluk gaibnya. Tanggal 10 Juni, atu poster paguyuban dengen nama pemaké "Victor Surge" nyumbangin dua gambar item-putih deri paguyuban bocah-bocah. Kiriman sebelonnya cuman ada potrèt, cuman Surge lengkepin paké pengajuan nyang ada potongan-potongan kisah deri saksi-saksi. Enni ngegambarin penculikan bocah èn kasih nama entu makhluk "orang jangkung". Kaga' banyak nyang ditauin lantaran kaga' ada impormasi nyang rinci soal asal-muasalnya, cuman raga èn tempat tinggalnya dikeja biar keliatan. Dia ada punya sahwat bakal nyulik bocah kecil. Dia kaya'nya milih jalanan nyang ada kabutnya èn hutan-hutan biar kaga' ada nyang bisa nemuin dia.
Ciri khas
Orang jangkung lajim digambarin kaya' enni hal:
- Badannya jangkung cuman begèng
- Muka rata kaya' patung
- Maké bèskap kantoran lengkep dengen dasinya
- Suka mondar-mandir di jalanan nyang ada kabutnya
- Suka nyulik bocah
Ruju'an
- ↑ Lengen gurita (hurup Arab Gundul: لڠن ݢريت) - (Ind.) tentakel; (Ing.) Tentacle.