Wp/bew/NCT
Neo Culture Technology (hurup Arab Gundul: نيو کلتور تيکنولوجى) disingkat jadi NCT (hurup Arab Gundul: اينسيتى; basa Koréa: 엔시티; bacaannya ènsiti) entu paguyuban gending asal Koréa Kidul nyang dikeja ama SM Entertainment. Enni paguyuban gending dibagi jadi beberapa anakbagèan gending, ya'entu: NCT U, NCT 127, NCT Dream, NCT DÓJÈJÒNG, èn WayV. Sederi dilangsir pengumuman tentang pengejaannya, enni paguyuban ada punya anggota 20 orang secara jumblah nyang dibagi jadi 5 anakguyuban[1] nyang béda.
Pertama-tama nyang kekeja entu anakguyuban NCT U. Enni paguyuban mulain langsir tanggal 9 April 2016 dengen album gending dijital The 7th Sense èn Without You. Terusannya, anakguyuban nyang kedua entu NCT 127. Enni anakguyuban betempat di Soul èn mulain langsir tanggal 7 Juli 2016 dengen album gending namanya NCT #127. Ada lagi nyang ketiga, ya'entu NCT Dream nyang mulain langsir tanggal 25 Agustus 2016 dengen album gending namanya Chewing Gum. NCT juga ada punya nyang betempat di Tiongkok nyang langsir tanggal 17 Januari 2019 dengen album gending kecil The Vision. Èn anakguyuban nyang belakangan langsir entu NCT DÓJÈJÓNG nyang mulain langsirnya tanggal 17 April 2023 dengen langsir album gending kecilnya nyang judulnya Parfume.
Selaèn kegiatan nyang kepisah deri masing-masing anakguyubannya, NCT juga ada punya kegiatan nyang ngejadiin NCT jadi atu anakguyuban, ya'entu taon 2018 dengen album gending NCT 2018 Empathy. Taon 2020 dengen album gending NCT Resonance Pt. 1 èn Pt. 2. Nyang terahir taon 2021 dengen album gending NCT 2021 Universe.
Ruju'an
- ↑ Anak-guyuban (hurup Arab Gundul: أنق ݢويوبن) - (Ing. èn Ind.) unit (bagéan deri paguyuban tanji)