Wp/bew/Mohammad Husni Thamrin
| Sex or gender | male  |
|---|---|
| Country of citizenship | Indonesia |
| Given name | Mohammad |
| Date of birth | 16 February 1894 |
| Place of birth | Sawah Besar |
| Date of death | 11 January 1941 |
| Place of death | Senen |
| Place of burial | Karet Bivak Cemetery |
| Languages spoken, written or signed | Indonesian |
| Occupation | politician |
| Position held | member of the Volksraad |
| Work period (start) | 1919 |
| Award received | National Hero of Indonesia |
Mohammad Husni Thamrin (hurup Arap Gundul: محمّد حسنى تمرين; èjaan van Ophuijsen: Mohammad Hoesni Thamrin) (idupnya: 6 Pèbruari 1894 – 11 Januari 1941) ada sorang tokoh pahlawan sional Indonésia èn pulitikus asal Betawi nyang ada perjoangan di dalem Polksrad[1] (basa Welanda: Volksraad).
Riwayat idup awal-awal
,_p15.jpg)
Dia lahir di Wèlteprèden (hurup Arap Gundul: ويلتفريدن; basa Welanda: Weltevreden) tahon 1894. Dia punya baba, Thamrin Moh. Tabri – blasteran Welanda-Betawi. Dia punya engkong entu sorang èhenar Hotèl Ort, atu hotèl mashur di Betawi itu waktu. Tabri, babanya, diopènin ama dia punya encing Jawanya. Mangkanya, Thamrin bolé dikata lahir di atu kuarga néopriyayi èn hata di tahon 1906, dia punya baba jadi wedana di bawah Guwernadur[2] Jèndral Johan Cornelis van der Wijck. Seabisnya lulus deri Kawédri (basa Welanda: Gymnasium Koning Willem III te Batavia), Thamrin ngambil gawé di bestir[3] sebelonnya gawé di maskepé pengangkutan Koninklijke Paketvaart-Maatschappij nyang di sono bakalannya dia gawé ada sepulu tahonan.
Ngiat kewontenan anak-anak Betawi nyang pada melarat kapiran kaga' keruan tu waktu, ati Thamrin kesentu bakal ngopènin èn merjoangin nasip ra'yat Betawi nyang entarannya dia juga' ada andil dalem pendirian organisasi Kaoem Betawi nyang juga' ikutan dalem Konggrès Pemuda II tahon 1928.
Tahon 1919, Thamrin kepilih jadi anggota Hamintérad[4] Betawi, èn tahon 1929, dia dibenum jadi wakil berehmister[5] kedua. Tahon 1927, dia dibenum ama Guwernadur Jèndral de Graeff ke Polksrad. Dia dibenum lagi tahon 1931 èn kepilih di tahon 1935 èn 1939.
Penyandakan èn akir idupnya
Ari bulan 6 Januari 1941, Thamrin punya rumah digeledah ama Dènes Intelijèn Pulitik (basa Welanda: Politieke Inlichtingendienst; disingket: PID). Dia dicurigain ngebèbèrin inpormasi ke Kekaèsaran Jepang, sebab lantaran sebelon-sebelonnya dia ada punya ubungan baè' ama penduduk Jepang di wilayah Hindia-Nèderlan. Dia sebenernya juga' kena sakit gula nyang kedawan-dawan èn wapat lantaran serangan jantung pas lima ari abis penyandakannya. Di laporan resminya, ketulisnya Thamrin bunu diri, cuman ni diraguin, sebab èmang dia udah sakit-sakitan. Banyak orang berèrod-rèrod pada ngelayat ke dia punya rumah, serènta juga' persidèn Polksrad itu waktu. Thamrin dikuburin di Kuburan Karèt Bipak, Jakarta Sintrem.[6]
Ruju'an
- ↑ Polksrad (hurup Arap gundul: فلکسراد) – dewan rakyat, dewan perwakilan rakyat (Indo.); People's council (Ing.).
- ↑ Guwernadur (hurup Arap gundul: ݢورندور) – gubernur (Indo.); governor (Ing.); governador (Pt.).
- ↑ Bestir (hurup Arap gundul: بستير) – pemerintah (Indo.); government (Ing.); bestuur (Wld.).
- ↑ Hamintérad (hurup Arap gundul: همينتيراد atawa خميتيراد) – dewan kota (Indo.); city council (Ing.); gemeenterad (Wld.).
- ↑ Berehmister (hurup Arap gundul: برهميستر) – walikota (Indo.); mayor (Ing.); burgemeester (Wld.).
- ↑ "Mohammad Hoesni Thamrin". Encyclopedia of Jakarta (basa Indonésia). Guwernemèn Kota Jakarta. Diarsip deri nyang asli 8 Juni 2012. Dipungut 20 Juni 2023.