Wp/bew/Keraton Surakarta Hadiningrat
Keraton Surakarta Hadiningrat (urup Arab Gundul: کراتون سراکرتا هادينڠرة) atawa Keraton Surakarta (urup Arab Gundul: کراتون سراکرتا) atawa Keraton Sala (urup Arab Gundul: کراتون سلا) entu keraton resmi Kasunanan Surakarta Hadiningrat nyang letaknya di Kota Surakarta. Enni keraton dikeja ama Sri Susuhunan Pakubuwana II kira-kira taon 1743-1744 sebagé gantiannya keraton Kartasura nyang mirip dengen keraton Ngayogyakarta Hadiningrat nyang dikeja abisannya èn jadi keraton bakal kesultanan Yogyakarta. Secara terdisionil, kesultanan Mataram dilanjutin ama dua kerajaan, ya'entu kasunanan Surakarta èn kesultanan Yogyakarta. Jumblah luasnya ngejenggar ampé 157 hèktar, keitung semua-mua daéah bèntèng Baluwarti, Alun-alun Lor, Alun-alun Kidul, Gapura Gladak, èn kumplèk Masjid Agung Surakarta. Selaèn entu, luas kedatonnya entu ampé 15 hèktar.
Walopun Kasunanan Surakata resmi jadi bagéan deri Kiblik Indonésia di taon 1945, enni kumplèk gedong keraton masing jadi geriya sultan èn rumah tangganya masing ngejalanin terdisi kesultanan ampé enni wayah. Enni keraton uda jadi atu tempat lancongan di kota Surakarta. Sebagéan kumplèk keraton entu musium nyang nyimpen macem-macem kasunanan punya barang bolè simpen, keitung macem-macem barang nyang dikasiin ama raja-raja Éropa, tiruan pusaka keraton, èn gambang (gamelan). Deri gedongnya, enni keraton entu jadi atu tulad bakal gedong-gedong keraton Jawa nyang paling mantep, ada punya awla-awla nyang cakep èn lapangan, serènta pavilium nyang lega.
Ruju'an