Wp/bew/Kedemangan di Indonésia

Kedemangan (hurup Arab Gundul: کدمڠن; Welanda: district), dalem Indonésia punya kontèks, ngruju' ke pembelèkan bestir trap ketiga, di bawahnya kabupatèn atawa kota. Adapun istilah nyang sebenernya lebi mashur entu kecamatan (hurup Arab Gundul: کچامتن) nyang dipaké di banyak bilangan di Indonésia. Sementara entu, istilah distrik cuman dipaké di propinsi nyang di Papua doang. Di Daèrah Istimèwa Yogyakarta, istilah dia pada punya paké entu kapanéwon di dalem atu kabupatèn, sementara istilah kemantrèn seturu-turunya entu cuman dipaké di jero wilayah Yogyakarta Kota, itu propinsi punya kota atu-atunya. Berales ama Statistik Indonésia, kabèhan ada 7.252 kedemangan di Indonésia per 2019, nyang dibelèk-belèk lagi ke dalem 83.820 désa bestir (désa atawa kerurahan).

Pas Jaman Normal èn awal-awal jaman kiblik, istilah nyang dipaké entu kewedanan nyang juga medu ama kedemangan, atu bagèan deri kabupatèn. Adapun kecamatan diterjemahinnya jadi anak-kedemangan atawa onderdistrik (Welanda: onderdistrict). Abisnya itu kewedanan pada diapusin, istilah kedemangan mulain dikaètin ama kecamatan nyang mana langsung dibestir ama atu kabupatèn. Média-média mashur kaya' The Jakarta Post, Kompas, ama Tempo pada maké kata district bakal ngeruju' ke kecamatan. Adapun ladènan terjemahan mesin kaya' Gugel Terjemah ngaco nerjemahinnya, malah district diartiin kabupatèn.