Wp/bew/Kamir (kué)

Tampang kué kamir

Kué kamir (hurup Arab Gundul: کوى خمير) atawa samir (hurup Arab Gundul: سمير) atawa kasmir (hurup Arab Gundul: کسمير) entu panganan has deri Pemalang nyang asalnya deri negeri Arab. Enni kué dikeja deri adonan terigu, mentéga, èn telor. Kadang-kadang digabrek ama bahan kaya' pisang ambon atawa tapé. Kamir ada punya dua macem, ya'entu kamir beras èn kamir terigu. Di pasar kota Pemalang, banyakan kamir nyang paké terigu lantaran kuat lama, sedeng kamir besar cuman dijual kalo ada nyang pesen.

Bentuk kué kamir

Enni kué wujudnya bunder, tipis, èn warnanya rada coklat, serènta ampir kaya' kué apen atawa surabi bentukannya, cuman enni kué rada gedéan èn bantet. Gedé-kecilnyas ada macem-macem, nyang paling gedé bisa ampé selingkeran pisin. Kalo nyang paling kecil palingan cuman segedé ringkok. Gedé-kecilnya ngejuntrung ama nyang pesen maunya gimana. Ada nyang pernah bikin nyang raksasa cuman boncos kaga' rata matengnya.

Sejarah

Ngèkor ama kisah-kisah, orang nyang paling awal bikin kué kamir entu sorang Arab nyang tinggal di bèk Mulyoharjo, nyang kebetulan juga dipanggil ama orang-orang entu kampung Arab. Nama kamir entu kaga' danta deri mananya, apa deri basa Arab "khamer" nyang artinya mabok/mabokin atawa orang Arab nyang ngeja entu sendèwèk.

Cumanan nyang paling deket ama kemungkinan nama kamir entu asalya deri kata "khamir" nyang dalam basa Arab artinya ragi. Dalem pengejaan enni kué kamir, sebelon dimasak, enni adonannya didiemin semaleman biar bisa ngembangnya bagus èn ada prosès pèrmèntasi dulu.