Wp/bew/Jagoan hébat
Jagoan hébat (hurup Arab Gundul: جاݢوان هيبة; Inggris: superhero; Indonésia: adiwira) atawa jagoan super (hurup Arab Gundul: جاݢوان سوفر) tokoh kejaan nyang gableg ungkulan ajib bakal nglakonin keboléannya di umum. Biasanya, saban jagoan hébat laèn-laèn dah dia punya keboléannya. Galibnya mah, nyeng namanya jagoan digambarinnya ampir melulu baè', jadinya itu jagoan hébat, kalu di ceritra-ceritra, gambar cèmèn, atawa pèlem, mesti dah dibikin nglawan dia punya musuh. Jagoan hébat ada nyang lanang, ada juga' nyang wadon. Adapun kalo lanang punya jogrogan biasanya dibikin ganteng lagi stèrek, kalo wadon punya jogrogan dibikin boto lagi bahènol. Poko'nya, selaèn keboléan, saban jagoan hébat juga' ngelah dia pada punya baju sendèwèk nyang pada ngeroncèt. Itu baju biasanya pada singset, jadinya pating becèplak dah dia punya bentuk awak. Ciri has dia punya baju biasanya kalo kaga' kupluk, sayap di belakang, bajunya kaya' baju célé (baju nyang nyatu atasan ama bawahan), ban, ama sèmpak di luar.