Wp/bew/Gado-gado

Tampang gado-gado

Gado-gado (hurup Arab Gundul: ݢادو٢) ya'entu makanan has orang Betawi. Enni makanan biasanya isinya entu sayur, conto: kacang panjang, labu siem, paré, togé, kangkung, kol, jagung ènsb. Selaèn entu, gado-gado juga dipakéin témpé èn tahu biar lengkep rasanya jadi mingkinan sedep. Gado-gado dimakan sambil dituangin bumbu kacang. Gado-gado lajimnya dimakan bareng ama lontong.

Lantaran enni gado-gado bentukannya percis kaya salad bakal orang bekulon, mangkanya enni kalo dibasa-Inggrisin jadinya tuh "Indonésian salad".

Sejarah gado-gado

Kata "gado-gado" diambil deri basa Betawi "gado", nyang maksudnya entu dimakan kaga' paké nasi. Selaèn entu, ada juga katanya orang Tugu nyang ngeja enni makanan dengen nama "gadu" deri basa Portugis nyang artinya "diabrek-abrek". Ada juga katanya gado-gado dateng deri orang Tionghoa. Orang Tionghoa demen banget makanin pecelnya Jawa. Digadang-gadang entu gado-gado – modipikasi deri pecel Jawa.

Bahan bakal ngeja gado-gado

Enni di bawah entu bahan bakal ngeja gado-gado.

1. Bahan: kangkung 2 iket, kacang panjang 1 iket, kol iris 5 lembar, togé', jagung manis 1 direbus èn diserut, témpé 1 lonjor, tahu 2 biji, telor ayam rebus.
2. Bumbu kacang: cabé rawit, garem atu tèsih tèh, gula merah, kacang gorèng giling dua tèsih makan, jeruk limo atu peras aèrnya.

Cara ngeja gado-gado

Enni di bawah bakal cara ngeja gado-gado.

1. Rebus saban sayur, angkas, terus tirisin.
2. Gorèng témpé èn tahu ampé warnanya rada coklat, terus angkat èn minyaknya ditirisin.
3. Ulek saban bahan bakal jadi bumbu kacang ampé rada alus terus perèksa rasanya.]
4. Kucurin aèr limonya.
5. Tambain sayur, témpé, èn tahu.
6. Aduk-aduk semua ampé rata jadi atu.
7. Taro gado-gadonya di piring, tambain telor èn kerupuk kalo doyan.
8. Bisa ditambain nasi atawa lontong bakal bikin kenyang.