Wp/bew/Akbar

Akbar (Abū 'l-Fatḥ Jalāl al-dīn Muḥammad Akbar, 25 Oktober 1542 – 27 Oktober 1605) atawa bekèn Akbar Ageng entu Kaèsar Mogol ketiga. Dia berojol di Umarkot (sekarang Pakistan). Dia entu anak kedua deri Kaèsar Mogol Humayun. Akbar secara hukum jadi raja tahon 1556 pas dia punya umur 13 pas dia punya baba wapat. Akbar, lagito, masing kemudaan bakal merènta, mangkanya Béram Han nyang dibenum jadi Akbar punya wali èn hop kumendan soldadu. Sigra abisnya bekuku, Akbar ngalahin Himu, jèndral tentara Apgan, di Tempur Panipat Kedua. Entak berapa tahon, dia sudahin Béram Han punya kewalian èn ngambil kuasa kerajaan. Sanonya, dia ngajak temenan ama bangsa Rajaputra. Cuman, dia kudu ngelawan sebagèan orang Rajaputra nyang nantang dia. Dalem tahon 1576, dia na'lukin Maharana Pratapa deri Méwar atawa Udayapura di Tempur Haldigati. Perang Akbar punya pimpin ngeja kekaèsaran Mogol dua kali gedéan deri nyang sebelon-sebelonnya, nglingkup sebagèan besar anakbenua Hindi kecuali bilangan kidul (kaga' masup Dataran Tinggi Kidul Hindi).