Wp/bew/Aèr serani
Aèr serani[1][2][3] (hurup Arab Gundul: اير صرانى atawa اير سرانى; Indonésia: minuman beralkohol) ada atu minuman nyang ada kandungan alkohol jenis ètanolnya, barang 0,5% atawa lebi. Dalem masarakat punya basa, sering juga' dipaké istilah minuman keras. Alkohol nyang dipaké di minuman entu jenis ètanol atawa alkohol tulèn. Alkohol tulèn umumnya dikeja liwat prosès nama pengragian. Dalem prosès pengragian[4], baktèri ngrobah gula bakal ngeja ètanol atawa cuka. Kalo paké laèn-laèn jenis alkohol, nyang ada malah kasi orang keliwat tèler atawa malah bisa jadi paèh dah tu. Jadi, nyang kena dipaké cuman alkohol tulèn. Lantaran bakal minuman nyang dipaké cuman ètanol doang, mangka kata "alkohol" di mari pasti ngruju'nya cuman ke ètanol doang.
Aèr serani ada banyak macemnya, contonya: wiski, wodkah[5], gin[6], bir, brèndi, arak, ciu, anggur mèra, èns. Biasanya, ni juga' ada bekaètan ama budaya di masing-masing tempat. Di Betawi, jenis-jenis aèr serani nyang paling mashur entu antara laèn: ciu[7], arak[8], tuak, brèndi[9], bir, ama wiski[10]. Cuman, tiga nyang belakangan disebut entu biasanya bekèn di kalangan orang-orang Welanda atawa orang-orang beduit doang. Saban macem aèr serani ada punya kedar alkoholnya masing-masing. Misalnya, secara umum, aèr serani kebagi dalem tiga kelompok:
- Bir[11], mead (atawa mède[12] atawa aèr serani madu), ama sider[13] (atawa aèr serani apel) (biasanya ampé 15% kedarnya)
- Anggur atawa wèn[14] ama saké[15] (12–20% kedarnya), èn
- Spirtus[16] (20% atawa lebi kedarnya, alkohol sulingan).
Asal-muasal kata[edit | edit source]
Kata "aèr serani" di dalem basa Betawi lèterleknya artinya 'aèr Nasrani' atawa 'aèr Krèsten', sebab jaman dulu èmang nyang sering minum ni aèr entu orang-orang Welanda nyang mayoritètnya agamanya – agama Serani. Tapi mah sebenernya, kaga' cuman orang Serani aja nyang sering minum ni aèr, tapi juga' orang-orang kita nyang au èmang kaga' ngejalanin agama Selam bener-bener, au èmang dia bukan orang Selam.
Ruju'an[edit | edit source]
- ↑ Yunus, M. (2014). Prahara Tanah Tjondet: Sepak Terjang Entong Gendut dan Pergerakan Kaum Tani Tahun 1916. Museum Sejarah Jakarta, Dinas Pariwisata dan Kebudayaan Provinsi DKI Jakarta. h. 107.
- ↑ al-Batāwī, Sayyid ʿUṡmān b. ʿAbd Allāh b. Yaḥyā. (1331 H). Sinar isterlam: Pada menyataken kebenaran Sarèkat Islam. Betawi.
- ↑ Azra, Azyumardi. (1995). "Hadhrâmî Scholars in the Malay-Indonesian Diaspora: A Preliminary Study of Sayyid 'Uthmân," Studia Islamika. 2(2):19.
- ↑ Pengragian (hurup Arab Gundul: فڠراݢين) – fermentasi, peragian (Indo.); fermentation (Ing.).
- ↑ Wodkah atawa wodka (hurup Arab Gundul: وودکة atawa وودکا) – vodka (Indo.); vodka (Ing.).
- ↑ Gin (hurup Arab Gundul: ݢين) – gin (Indo.); gin (Ing.).
- ↑ Ciu (hurup Arab Gundul: چيو) – ciu (Indo.); 酒 jiǔ (Man./Koanwé); chiú (Hok.)
- ↑ Arak (hurup Arab Gundul: عرق atawa ارق) – arak (Indo.); arrack (Ing.).
- ↑ Brèndi (hurup Arab Gundul: برندى) – brendi (Indo.); brandy (Ing.).
- ↑ Wiski (hurup Arab Gundul: ويسکى) – wiski (Indo.); whiskey (Ing.).
- ↑ Bir (hurup Arab Gundul: بير ) – bir (Indo.); beer (Ing.); bier (Wld.)
- ↑ Mède (hurup Arab Gundul: ميد) – mead (Indo.); mead (Ing.); mede (Wld.). Deri basa-basa Slaweni, tulad di basa Polen: miód 'madu'.
- ↑ Sider (hurup Arab Gundul: سيدر) – sider (Indo.); cider (Ing.); cider atawa appelwijn (Wld.)
- ↑ Wèn (hurup Arab Gundul: وين) – minuman anggur (Indo.); wine (Ing.); wijn (Wld.).
- ↑ Saké (hurup Arab Gundul: ساکى) – sake (Indo.); sake (Ing.); 酒 (さけ) sake (Jep.).
- ↑ Spirtus atawa spèrtus (hurup Arab Gundul: سفيرتوس) – minuman keras, spiritus (Indo.); spirit (Ing.).