Wp/arq/محمد إسياخم
محمد إسياخم راسم جزايري، نزاد يوم 17 جوان 1928 في دشرة "تابدوشت" (أغريب، ولاية تيزيوزو), و مات يوم 1 ديسمبر 1985 في العاصمة. هو مع لولين لي بداو الرسم التشكيلي الحديث في الجزاير.
قصة حياتو[edit | edit source]
محمد إسياخم نزاد يوم 17 جوان 1928 في دشرة "تابدوشت" (أغريب، ولاية تيزيوزو)[1], و في 1931, رحلت فاميلتو لغيليزان. في 1943, لقى قنبلة يدوية، لعب بيها، و تفلڨتلو في يديه. ماتوا هكدا زوج من خواتاتو و وليد ختو. و هو راحتلو يدو و ذراعو تع ليسرى و جوز عامين فلسبيطار بش يداوي[2]. من 1947 لل1951، قرى في مدرسة الفنون الجميلة تع العاصمة. ، و كان تاني تلميذ تع الفنان عمر رسيم. في 1951, تلاقى بكاتب يسين، ولاو صحاب[3]. من 1953 لل1958 قرى في مدرسة الفنون الجميلة تع باريس[4]. في 1959 راح سكن في لالماني.
في وقت ثورة التحرير الوطني الجزايرية، رسم بزاف على الجزيريين، خاصتا على النسا، المجاهدات و الأراملة. رسم في 1957 وجه جميلة بوحيرد.
بعد الاستقلال، ولى لدزاير، و خدم في الجرنان "ألجي ريبوبليكاً". في 1963, خلق مع فنانين وحدخيرن "الإتحاد الوطني تع الفنون التشكيلية" وشارك في معرض "الرسام الجزايرين" لي داروه بمناسبة حفل 1 نوفمبر.
في 1964 ولى مدير الطريقة التعليمية في مدرسة الفنون الجميلة تع العاصمة.
دار تاني رسومات للكتوبة تع كاتب ياسين.
من 1965 لل1982 دار الرسومات تع ورق الدراهم و طوابع البريد[5].
في 1967, دار فيلم "غبار جويلية" ،لتلفزة الجزايرية، مع كاتب ياسين[6].
في 1971, ولى إقري في "المدرسة التطبيقية والتخطيطية تع ألج ي" (هندسة معمارية) (EPAU).
خدم تاني ديكورات تع فيلمات.
من 1973 لل-1978 رسم في جرانن.
في 1977, رسم لوحة كبيرة في المطار القديم تع العاصمة (ولي راح مع البومبة تع 1992).
مات يوم 1 ديسمبر 1985 في عين بنيان (العاصمة) بعد مرض طويل.
مقالاتو المشهورة[edit | edit source]
"بلاد بلا فنانين، بلاد ميتة. نتمنى مازالنا حيين."
المصادر[edit | edit source]
- Issiakhem, Benamar Médiène Casbah Editions, 2006 - 156 pages
- Le livre des peintres algériens: dictionnaire biographique, Achour Cheurfi Edition ANEP, 2004 - 249 pages
المراجع[edit | edit source]
- ↑ Issiakhem, Benamar Médiène Casbah Editions, 2006 - 156 pages
- ↑ Le livre des peintres algériens: dictionnaire biographique, Achour Cheurfi Edition ANEP, 2004 - 249 pages
- ↑ Créations artistiques contemporaines en pays d'islam: des arts en tensions, Jocelyne Dakhlia, Jean-Charles Depaule Kimé, 2006 - 668 pages
- ↑ Musiques d'Algérie, Rachid Aous Presses Univ. du Mirail, 2002 - 200 pages
- ↑ Les berbères célèbres, Mohand Akli Haddadou Berti éditions, 2003 - 227 pages
- ↑ Les artistes algériens: dictionnaire biographique (1917-1999), Mansour Abrous Casbah, 2002 - 304 pages