Wp/arq/مجلس تأسيسي
المجلس التأسيسي هو جماعة, لي تمثل الشعب, و خدمتها كتابة دستور جديد و هو النص الاساسي لتحديد السلطات العامة في دولة, هو الساس تع الدولة.
صلاحيات هاد المجلس محدودة في "التأسيس" تع سيستام جديد (نظام حكم جديد)، بصح يقدروا إزيدولو صلاحيات أخرى كما التشريع (و يولي برلمان تأسيسي). عامةً، كل هاد التفاصيل مكتوبة في إعلان دستوري (دستور إنتقالي صغير لي يحدد كل تفاصيل تقسيم السلطة في المرحلة الإنتقالية تع كتابة دستور جديد).
كي المجلس اكمل خدمتو، احبسوه و افكوه.
هاد النوع من المجلس يدخل في إطار الديمقراطية التمثيلية. المجلس التأسيسي اكون مكون من بزاف المواطنين، بعكس الدساتير المفروضة ,من طرف سلطة موجودة ,و لي يكتبوا جماعة صغيرة قريبة للحكام.
كاين بزاف الطرق لإختيار أعضاء هاد المجلس، كل دولة كيفاش دارت في تاريخها, يقدروا اكونو منتخبين، ولى معينين، ولى مجبودين بلقرعة.
عامةً، الدستور لي يخرج من هاد المجلس لازم الناس إفوطيو عليه (استفتاء شعبي).
المجلس التأسيسي إما ابدل شوية برك دستور موجود، إما اعاود يكتبوا كامل من جديد (بعد ثورة، حرب، إستعمار أو إنقلاب عسكري).
المجلس التأسيسي في الجزائر[edit | edit source]
أول مطلب لمجلس تأسيسي جاء في 1933 من طرف نجم شمال إفريقيا.
أول إنتخاب تع مجلس تأسيسي صرى يوم 20 سبتمبر 1962, بإستفتاء عام قبلوا فيه الجزايرين بمجلس تأسيسي, و التصويت على أعضاء هذا المجلس من قائمة وحدة برك من المترشحين تع جبهة التحرير الوطني [1] [2]. فرحات عباس كان رئيس المجلس, حتى إستقاله يوم 12 أوت 1963 على جال أحمد بن بلة لي عين أعضاء اخرين، خارج المجلس التأسيسي، لي كتبوا دستور و جوزوه بسيف على لمجلس [3].
المراجع[edit | edit source]
- ↑ François Borella - La constitution algérienne un régime constitutionnel de gouvernement par le parti
- ↑ https://web.archive.org/web/20190527141820/http://www.apn.dz/fr/les-membres/ancienne-legislature/liste-des-deputes-de-l-assemblee-constituante-1962/140-les-membres-de-l-apn-ancienne-legislature/264-liste-des-deputes-de-l-assemblee-constituante-1963
- ↑ https://blogs.mediapart.fr/samir-benboualia/blog/210712/le-12-aout-1963-ferhat-abbas-presente-sa-demission-et-en-donne-les