Wp/arq/سليم هلالي
سليم هلالي فنان و مغني جزائري يهودي ، نزاد في عنابة يوم 30 جويلية 1920 و توفى في 25 جوان 2005 بي مدينة كان الفرنسية. كان اغني بلعربية و الفرنسية و يلعب العود و الدربوكة. كان مثلي الجنس[1] [2].
قصة حياتو[edit | edit source]
سليم هلالي نزاد في عنابة يوم 30 جويلية 1920, وسط عايلة يهودية فقيرة أصلها من سوق أهراس، و سماوه سيمون. باباه كان خباز و سليم كان عندو 9 خواتات. في 1934 حرڨ لفرنسا و راح لمارسيليا، مبعد في 1937 طلع لباريس، وين ولى اغني في الملاهي بسبنيولية. في باريس، عرف فنانين جزايرين لي عاونوه، كيما محيدين بشطارزي، محمد الكمال و محند إڨربوشن. كتبلو غنيات بلعربية، و مل تم ولى إسمي روحو "سليم". للبوم لول تاعو كان عندو طابع أندلوسي. في 1938 دخل في فرقة "المطربية" تع محيدين بشطارزي و إدموند يافيل و دار جولة فنية كبيرة في اوروبا.
في 1939, اندلعت الحرب العالمية الثانية، و كان سليم عايش مع ختو في حومة اليهود في باريس. و في 1943, النازيين الجرمانيين، ختطفو ختو و رضيعها[3]، و قتلوهم في سجن اوشويتز (بُولُونيَا) لكان خاص لقتل اليهود. سليم منع من الإختطاف، على خاطر قدر يتخبى فل جامع لكبير تع باريس لي كان حاكمو قدور بنغبريت (جد نورية بنغبريت)[4] [5], وين ولى يخدم قهواجي.و كي خلاصت الحرب، عاود ولى سليم لموسيقى و حل زوج ملاهي في باريس.
في 1949, رحل لمروك، وين حل تاني كباري مشهور "الديك الذهبي" وين غناو فيه سالم جلالي، حاجة الحمداوية، لطيفة امال، عمر طنطاوي، شافية رشدي، لين مونتي، بلان بلان، ليلي بونيش، وردة الجزايرية... بصح في الستينات، فسد الكاباري في حريق، مالا سليم هلالي عاود رحل لفرنسا، في مدينة كان. في السبعينيات، خرج سليم هلالي ألبومات بالفرنسية و احي في العراس.
توفى يوم 25 جوان 2005 [6] [7][8][9].
غناياتو[edit | edit source]
أشهر أغنيات سليم هلالي هومى: أندلسيات، تعالي، ريت الزين، العشق صعيب، أرجع لبلادك، القلب شاهيك، منيرة، بين البارح واليوم، العين الزارڨة، مهاني الزين، حبيبتي سمرة، سيدي حبيبي...
المراجع[edit | edit source]
- ↑ https://data.bnf.fr/fr/14024214/salim_halali/
- ↑ https://www.telerama.fr/musiques/tresors-de-la-chanson-judeo-arabe,53126.php
- ↑ Arch. AN-F/9/5735 et 5748 fiches d’internement extraites du fichier du camp de Drancy, Valaix, née Halali (Berthe, Beïa) le 16 décembre 1926 à Bône (Algérie), est décédée le 7 septembre 1943 à Auschwitz ; son fils, Claude André Valaix, né le 21 février 1943 à Paris (15e), est décédé, près de trois semaines plus tard, le 30 septembre 1943, dans le même camp d’extermination
- ↑ Jean Laloum, « Cinéma et histoire. La mosquée de Paris et les Juifs sous l’Occupation », Archives juives, 2012
- ↑ Aderet, Ofer (23 March 2012). "The Great Mosque of Paris that Saved Jews during the Holocaust". Haaretz. Retrieved 28 January 2016.
- ↑ Hisham Aidi, Rebel Music : Race, Empire, and the New Muslim Youth Culture, Random House, 2014
- ↑ Barlet, Olivier (2016). "Contemporary African Cinema". Michigan State University Press.
- ↑ https://web.archive.org/web/20150328225811/http://marocculturel.com/ebooks/Livre-Ameskane.pdf
- ↑ Bouziane Daoudi, Hadj Miliani, Beurs' mélodies: cent ans de chansons immigrées maghrébines en France, Séguier, 2003