Wp/arq/بوب ليبونج

بوب لپونچة

سپونجبوب ولا بوب لپونچة لكاري (sponge bob square pants/bob l'éponge carrée) هو شخصية تاع مسلسل تلفيزيوني تاع لكرتون عندو نفس لإسم خرج لمرة لولة فلماريكان في 1ماي 1999. و تعاود في نسخة لأصلية اللي كتبها توم كيني و سيباستيان ديسجور في فرانسا.

ستبفان هيلنبورغ رسام لكاريكاتور و عالم لأحياء خرج سپونج بوب مورا كي حبسولو لعرض تاع مسلسالو "روكو في لحياة جديدة " عام1996.في هذاك لوقت هيلنبورغ حب يدير مسلسل فيه پونچة متفائلة و في نفس لوقت تقلق لمحيط تاعها .وفاني دا مالأفكار تاع لوريل و هاردي و بي-وي هيرمان و لإسم داه من فكاهة عنوانها "پلاصة لمد و لجزر " ،اللي خرجها هيلنبورغ عام 1989 كي كان يقرا فلمعهد تاع كاليفورنيا للفنون . سپونچ بوب هو پونچة بهلولة و نية يخدم طباخ في كروستي كراب و هي ريسطورة جايا في وحد لپلاصة خيالية ،بيكيني بوتو، تحت مسؤولية شاف كراپز ، وملي بانت هاذ شخصية دات شعبية كبيرة بين كبار وصغار مالڨري ڨاع لإنتقادات .

دور تاعو

سپونچ بوب هو پونچة عايڜة في لبحر و اللي تشبه بزاف للپونچة تاع لكوزينة .عندها عينين زروقا و مثقبة ڨاع في لجوانب تاوعها و فمها يبانو منو زوج سنان متياعدين لابسة دايمن قمجة بيضة و كراڥاتا حمرا و سروال قهوي . بوب لپونچة بخدم في ريسطورا سموها كروستي كراب ، هنا يعيطولو "خدام للشهر" و باقي لوقت يروح يتعلم يسوق في ليكول تاع سياقة تاع مدام "پوف" بصح في كل مرة يفشل باش يجيب لپارمي تاعو حتا عطاتولو هيا . سپونچ بوب عايش مع حيوان تاعو غاري في دار تاع أنناس طريڨ 124 تاع كونك في لمدينة لخيالية تاع بيكيني بوتو جايا علا لجزيرة تاع لمرجان بيكيني ، جيرانو هوما كارلو تونتاكول لپولپ و باتريك نجمة لبحر اللي هو صاحبو لانتيم . سپونچ بوب هو شخصية تبوچي بزاف و متفائلة و في نفس لوقت بهلولة ، في وقت لڥيد يصيد قناديل لبحر و هي هواية كيما هي كيما نشوفو زواوش و لا نلمو حشرات ، و فان يبني شركة تاع باتريك للفقاعات ، سپونچ بوب كان يقلق كارلو لوحد درجة متتصدقش ، كي كان يعاود بزاف مقولة تاعو " راني واجد "

تطور تاعو

===تصميم تاعو=== عام 1989 ، ستيفن هيلنبورغ كي كان يقرا يقرا في كاليفورنيا تاع لفنون رسم كاريكاتور عنوانو پلا صةْ لْمد و لْجزر و في هاذ لكاريكاتور كان سپونچ بوب واحد ملحيوانات تعيش في شط لقدامي وكان مازال پونچة نورمال . ومنبعد تحولت لشخصية حركها هيلنبورغ " باش تكون عندها اثارة". ستيفن هيلنبورغ دار بزاف محاولات قال بلِّي كانت " تخلع" ، قبل مَيْصَمَمْ شخصية تاعو ملَّول ومع نصائح تاع صاحبو مارتن أولسون ، اللي كتب سيناريو تاع "روكو في لحياة جديدا" ، كان حاب يصنع مسلسل يكون لبطل تاعو پونچة متفائلة بزاف و ديرونچي لمحيط في نفس لوقت. هيلنبورغ قارن شخصية تاعو بلورال و هاردي و شخصية تاع بي-وي هيرمان في لمحاولة اللَّولة تاعو دار شخصية لابسة قمجة تاع خدمة و كراڥاتا ، سروال قهوي و دايرا شاپو حمر . و بعد محاولات بزاف قرر هيلنبورغ باش تكون شخصيتو "نقيا و كاري " كيما لپونچة تاع لكوزينة و تتوالم بزاف مع هاذ الشخصية . بوب عندو سلوك تاع واحد نية و بهلول كيما تاع چيري لويس . في الأصل كانو يسموه Spong Boy . "سپونچ بوي" بصح هاد لإسم كانت مستعملاتو وحد شركة تاع ممسحات كتاشفت هاد لمشكل وزارة لعدل تاع نيكلوديون فالدورة تاع دبلجة لولا عام 1997 و علا هاكا بدل هيلنبورغ يبدلو حرف و يخلي كلمة "پونچة" و باش لمتفرجين ميخلطوش بينو و بين لفرماج . هيلنبورغ دار ل سپونچ بوب مترجم بلفرنسي" بوب ليپونچ"، خير فان " سكوار پونتز" (" سروال كاري") للقب و فاني للشكل لمربع تاع شخصية . في لپارمي تاعو تاريخ ميلادو هو 14 جويلية 1986 ، هاذا اللي يبين باللي في عمرو 13 سنة في لوقت تاع لإصدار رسمي لول تاع سلسلة في 17 جويلية 1999 . هيلنبورغ قال بالضحكا باللي كان عندو 50 سنة "فالسنوات تاع لپونچة " ، وقال باللي بوبو معندوش لاچ معين . بصح راه كبير و يقدر يقلع لباتو تاعو بحرية . و فالصح نيكلودين هو اللي طلب من بوب باش يروح للبكول تاع سياقة .

دوبلاچ

توم كيني لممثل لماريكاني هو الصوت تاع شخصية سپونچ بوب ، و بلفرنسي كان صوت سيبستيان ديسجور . كيني خدم مقبل معا هيلنبورغ في " روكو في حياة جديدة" و بعدما خرجت شخصية بوب لپونچة طلب هيلنبورغ من كيني يزيد لمجهودات فالشخصية لأساسية و ركز هيلنبورغ علا شخصية كيني باش يبني عليها شخصية بوب. كيني سبقلو و خدم بلاڥوا تاع بوب في روكو بشخصية ثانوية سموها " آل" باش يطور لاڥوا تاع شخصية. كيني مخباش بلي خدم بصوت خاص لهاذ شخصية . و مرا مالمرات عرض هيلنبورغ حلقة منو على كيني باش يفكرو ، وهنا قال كيني بلي الضحك دار حالة فالترددات لأنو الشخصية بذاتها كانت ضحك و كانت ديرونچي كيما الضحك تاع بوب و نقار لخشب . فالدوبلاج تاع بوبو لپونچة باللغات لخرين لممثلين خدمو على لاڥوا تاع توم كيني و كانو يزيدو مرات صوالح جدد بلمثال في نسخة اللي بلفرنسي سيبستيان ديسجور نقل شوية ألفاظ مالنسخة اللولانية تاع دافي دوك. شا ڨالو عليه :

تعليقات

سپونچ بوب بعدما وَزْعُوهْ لْقاَ شعبية كبيرة من عند لكبار و صغار ، و في جويلية 2010 صنفاتو مجلة انترتينمنت ويكلي من بين "100 أفضل شخصية فالعشرين سنة تالية" ، بصح تعليقات علا هاذ الشخصية ماكنتش دايمن مليحة . فالسيت واب أسك مان ، صنفو سپونچ بوب فلمرتبة 4 في" أفضل 10شخصيات تاع كوميكات ديرونجي فالتسعينات " بسبة شخصيتو اللي تحب لخير لڨاع ناس و هاذا اللي خلاها تكون سامطة .

لخلافات

في2002 ، ناس كيما قوم لوط حَبُّوا هاذ شخصية تاع سپونچ بوب و شتاهرت بيناتهم . هيلنبورغ رفض باش تكون شخصية اللي صنعها كيما راهم يخمو فيها هاذ الناس لأنو بين في شحال من حلقة باللي هاد الشخصية معندهاش جنس معين . هاذ لپونچة كانت تل أعضائها و تتكسل كيما لپونجة اللي نعرفوها. ب.جيفري دنيس اللي كتب مقال صحافي عنوانو The Same Thing We Do Every Night: Signifying Same-Sex Desire in Television Cartoons i قال باللي بوب و صاحبو ساندي ميبغوش بعضاهم بطريقة رومانسية بصح يشوف باللي بوب و پاتريك كاين بيناتهم علاقة شهوانية. و دنيس يشوف باللي هاذو زوج صحاب ماشي لازم يكونو في علاقة لخطراش يسكنو في مضارب مختالفة ، بصح في أي مسلسل لازم لازم يكون كاين احتمال بعلاقة تاع حب بين زوج . مارتن غودمان تاع مجلة لكوميكات فان علق علا لعلاقة اللي بين بوب و پاتريك و قال بلي علاقتهم مهمة. ڨاع هاذ لأحداث يخلونا نتساألو إذا كان سپونچ بوب كيما قوم لوط . هيلنبورغ عاود قال باللي كي صنعو سلسلة تاع سپونچ بوب محدولوش لجنس تاعو ، و فان توم كيني نخلع كي عرف واش راهم يخمو ناس على سپونچ بوب . و علا هاكا ، في أوت 2012 حبست لجنة الدولة لحماية الآداب العامة التوزيع تاع لكوميكات في أوكرانيا علا جال شخصية تاع سپونچ بوب و صاحبو پاتريك اللي كانت بيناتهم علاقة كاتت تشجع فلمثلية .

تأثير تاعو علا ناس

سپونچ بوب شاع بزاف بين لولاد اللِّي عمارهم بين 2 حتا 11 سنة و حَتَّا فلجاميعات و بين ناس لمشهورين كيما سيغورني ويڥر و بروس ويليس . صالون.كوم يبين باللي لبراءة تاع سپونچ بوب هو اللي خلا هاذ الشخصية يبغوها بزاف ناس ، بعدما صرح هيلنبورغ بلحقيقة لجنسية تاع شخصيتو بقا بوب محبوب من عند لمتفرجين بسبة عقليتو اللي تسامح لكل و تفائل تاعو. في ماي2011 صابو نوع جديد ملفطريات تاع لبحر سماوها سپونچيفورما سكوارپونتزي في خاطر هاذ الشخصية .

لمشتقات تاوعو

شعبية تاع سپونج بوب خلات لمشتقات تاعو تدي پلاصة فالسوق . في 2002 . لپوپيات تاع سپونچ بوب ولات تتباع قد 75000 وحدا في سمانة ، كثر مالپوپيات تاع إلمو-دغدغني اللي كاتت تتباع ف نفس لوقت . فالچابون دار سوكسي كبير بين نسا .الشركة للولة تاع نيكلودين ڥياكوم لعالميا نسا في هاذ لبلاد حبوا يصنعو شركة تجاريا جديدا تاع سپونچ بوب .بصح كاين جماعا خافو مالإنتشار تاع بوب لپونچة فالچابون لأنو ميشبهش لشخصيات لمشهورة فالبلاد كيما پيكاتشو و مارحبا كيتي .و فان خرجت شركة تاع سپونچ تيش صابون علا هاذ شخصية .