Wp/arq/بقلاوة

From Wikimedia Incubator
< Wp‎ | arq
Wp > arq > بقلاوة

بقلاوة[edit | edit source]

لبقلاوةولا بقلافةهي قاطو تقليدي معروف و مشترك بين بزاف شعوب الامبراطوريات القديمة كيما العثمانيين و الفرس. نسيبوها منتشرة في بلاد البلقان و فالقوقاز و فالمغرب و حتى في المشرق العربي.في دزاير نصنعوه في كامل لمناسبات و يجي على شغل طبقات و دهنوهم بزبدة وبقلاوة جي مقرمشة و معسلة كامل دزيريين يحبوه ومن بكري يصنعوه لبقلاوة حلوة تقليدية لازم تحضر في كمل لمناسبات تقريبا ولا كي شغل عادة ولازم كل عروسة تديه معاها,تنشرب مع القهوة ومع لاتاي تنصنع باللوز ولا بالكاوكاو.و العجينة تاعها تكون فويتي.

البقلاوة المصرية[edit | edit source]

مكونات البقلاوة المصرية[edit | edit source]

300 غرام جوز مطحون. 200و50 غرام سكر قلاصي. 2 مغارف كبار قرفة مطحونة. نص كيلو عجينة فيلو. ماء الورد. كمية نتاع شاربات. 500 غرام زبدة دايبة.

طريقة التحضير[edit | edit source]

نحطو الجوز المطحون ونزيدولو الزبدة الدايبة و سكر والقرفة وماء الورد ونخلطهم مليح في بول. نجيبو السنيوة نتاعنا وندهنوها بالسمن ونحطو عجينة الفيلو وكلما نحط طبق نعاود ندهنها حتى نوصل لنصف كمية العجين. نجيب لافارس نتاعي ونحط نصها فوق عجينة الفيلو. ونكمل هاكدا كلما نحط طبقة نتاع عجين ندير فوقها شوية نتاع الجوز حتى نكملو عجينة الفيلو. نسخن واش بقالي من الزبدة ونفرغها على العجينة كامل ونجيب موس ونقطع الى مربعات متساوية. ندخلوها للكوشة وتكون سخونة مليح لمدة 5 دقائق و من بعد نقصيلها وخليها طيب على غرضها. مورا نص ساعة و كي ولي لونها دهبي خرجيها من الفرن وحطيها جانبا. حطي 3 عبار سكر وعبر ماء و ضيفيلو ماء الورد وخليه يغلي مدة نص ساعة تقريبا او كي تشوفيه ولا عاقد نحيه من فوق النار . او فرغ شوية منو على البقلاوة مورا لي تبرد وحطيها في صحن التقديم و شهية طيبة.

البقلاوة العراقية[1][edit | edit source]

قاع الشرقيين يحبو البقلاوة وكاين لي يشروها واجدة وكاين لي لازم يخدموها فديار خصوصا في المناسبات والعراقيين هما وحدين ملي يبغوها فالخدمة نتاعها تبازي على رقائق خصة من العجين محشوة بالبيستاش ومن بعد يشربوها بالقطر ولا بالعسل.

عمل ومكونات البقلاوة العراقية[edit | edit source]

كاس ونصف زبدة دايبة مع السمن بلدي كيلو نتاع رقائق العجين تتباع واجدة ربع كيلو بيستاش معاه شوية نتاع لوز يكن مطحون قطر

كيفاه تنخدم[edit | edit source]

فلول نخدمو القطر لي هو سيرو عندك 2 كيسان نتاع سكر مع كاس ونص ماء نحطوها على نار هادية وكي يغلي حركيه مليح وضيفيلو شوية نتاع عصير القارس وقطرة نتاع ماء الزهر ولا ماء الورد و شوية هيل مطحون . جيبي البلا نتاعك ودهنيه بشوية نتاع سمن قبل ما تحطي رقائق العجين نتاوعك. فلول قصي العجينة الى 6 رقائق وحطيها فوق بعضها فالبلا نتاعك . دوبي الزبدة والسمن ودهني بهم هادوك الرقائق. شعلي الفرن باه يسخن من قبل وكملي الخدمة نتاعك. ومن بعد جيبي المكسرات لي عندك جوز فستق ولا لوز. رشي المكسرات على هادوك الطبقات كامل. ومن بعد عاودي قصي 4 طبقات عجين و دهنيهم بسمن وزبدة. قطعي البقلاوة الى مربعات او شكل معين او مقروطات الشكل الي راكي باغياتو. دخليها للفرن وكل شوية دوري البلا نتاعك باه الطيب من كامل الجوانب. خليها حوالي نص ساعة وكي يولي الكولار نتعها دهبي خرجيها وسقيها بالعسيلة ولا القطر ويكونو باردين ومن بعد عمليللها من الفوق رشة بيستاش و لا لوز.

ٲصلها[edit | edit source]

مكاش وثائق بزاف بخصوص البقلاوة,كاين ثلاثة فرضيات في الحقيقة: و لي ينسبو فيهم اصل البقلاوة للفترة ما قبل العثمانيين٬ ماكاينش ٲبحاث تثبت ٲصل لبقلاوة بصح يڤولو بلي لاصل تاعها يرجع لزمان ماقبل لعثمان٠ كاين ثلاثة فرضيات : اللولة عندها علاقة معا لخبز لملفوف تاع تراركة لي جايين في آسيا٬زاوجة معا لڤاطو تاع روما ݒلاصونتا و تقدم تاعو في لكوزينة لبزنطية ثالثة٬متعلقة بالكوزينة ٠لفارسية واللوزيناك .لافورم تاعها تاع ضروك ظهرت في وقت لامبراطورية لعثمانية في الكوزينة الامبراطورية تاع قصر التوبكاصي في اسطنبول وين كان السلطان يهدي البقلاوة للانكشاريين في اليلة الخمسطاعش من رمضان في الحفلة الي كانو يسموها بقلافة ألاي.

في الوقت تاع البزنطين بدات التجارة و طريقة تحضير البقلاوة تنشهر بالشوية .

تتكون لْبَقْلَاَوة من 33 طبقة . كلمة بقلاوة جاية من اللغة التركية تاع الدولة العثمانية وعلى حساب الشوفة هي جاية من اسم مرة السلطان او كاين الي يقولو هي جاية من اسم بقوليات على خاطر دخل الكاوكاو و اللوز والجوز فالخدمة تاعها او كاين الي يقولو جاية من كلمة بايلو المنغولية الي تعني الحزيم والربط وتدوار او كاين اللي يقولو جاية من عند اليونانيين القدم او في عصر البدو العربي القديم. او كاين وحد الباحث الماني فالغة تاع الترك يسموه جو ردوفر الي قال بلي ماهيش جاية من عند التراكة. او كاين الي يقولو بلي هي جاية من كلمة باقلبا ويقولو بلي هاد الكلمة جاية من اصل فارسي. دخلت البقلاوة بين احتفالات الدولة العثمانية فضهر موكب البقلاوة في اواخر القرن السابع عشرالميلادي في اواخر السابع عشر من شهر رمضان وبعد ما جا السلطان قسمو البلاوات تاع البقلاوة على كامل الجيش في اسطنبول كل عشرة من الجيش ياكلو سنيوة بقلاوة او فرحو بها الجيش قاوي كانو مغمدين هديك البقلاوة في كتان بيض وداوها للمقر تاعهم وكان اقدم دكر لاسم بقلاوة في عهد محمد الفاتح لي قال عليها الملك اوليا شيلبي في الهدرة تاعو مع لي يخدمو عندو اوكتبوهالو فلمدكرة نتاعو وقالو بلي عجباتو قاوي كي كلاها وقال بلي البقلاوة عندها قيمة كبيرة فالدولة العثمانية ياكلوها الملوك ورؤساء الجيش وتاني فالقصور وكي نتشرت البقلاوة لللبنانيون وسوريون بداو يبدلو فيها ويغيرو فالمكونات نتاعها وبدات شابة بزاف منحيت كانت غليضة ورجعت رقيقة و شابة فالبنة وشكل بصح الخدمة تاعها كانتصعيبة شوية وتدي الوقت

بقلاوة جزايرية
بقلاوة جزايرية

أنواع لْبَقْلَاَوة[edit | edit source]

كاين بزاف أنواع تاع لْبَقْلَاَوة و على حساب لبلايص كاين للي يعمرها بلكوكاو وكاين للي جي معمرة بلجوز و لا بلبيستاش .


وكاين اللي جاية عل شكل مقروظ ولا جي طويلة ولا كاري ولا مثلثات وتندار في ليكيسات فضية ولا دوري.البقلاوة تحب العسل قاوي.خطرات تنصنع بالمايزينة وتخرج كيما العجينة تاع الفيلو. كاين بزاف انواع تاع بقلاوة . 1 بقلاوة الفارميسال. العجينة تاعها فيها ربع عبار فرينة وعبر تاع سمن وربع ملاعق زيت مافيهش القو او قرصة ملح او لمازهر والعقدة فيها الكاوكاو مرحي وربع عبر سكر والقرفة والمازهر

تحضير لْبَقْلَاَوة[edit | edit source]

لْبَقْلَاَوة عجينتها تصنع ب 3 عبار غبرة(فرينة) و عبر ليدام و نرونوها وامبعد نزيدولها لما و ما زهر و امبعد خليها تريح ونصنعو لحشو لي يتكون من عبر كوكاو ولا جوز مرحي مخلط مع قرفة و شوية زبدة دايبة و شوية سكر قلاصي وشوية قرفة وامبعد نحلو لعجينة بلمشينة عل رقم 5 و امبعد عل 9 بين طبقة و طبقة نديرو زبدة ولا السمن . و امبعد نقطعوها و نزينوها بحبة كوكاو ولا حبة لوز و نديرها طيب و كي طيب نعسلوها وطريقة تحضير العسيلة:عبر سكر وزوج عبار ما وعود قرفة مع نص حبة ليم او زوج حبات قرنفل وزوج مغارف عسل وخليهم يغلو 15 دقيقة اوكي تخثر شوية طفي عليها او خليها تبرد او لازم البقلاوة تتعسل او هي حامية وشربات باردة او خليها تشرب مليح نهار كامل او من بعد عاودي عسليها باه جي شابة او تتقدم مع لاتاي ولقهوة سيرتو في رمضان فليل جي هايلة. البقلاوة تنخدم ببزاف طرق: كاين البقلاوة بلوز وتتخدمتاني بحشوات مختلفة كما البيستاش الجوز والكاوكاو وكاين تاني اصابع البقلاوة لي تتخدم على شكل حربوش ويخدموها بزاف فترك ويسموها البقلاوة الشامية بصح كاين بزاف نسا مايعرفوش يخدموها فدار . راح نقلكم كيفاش يخدموها طريقة تحضيرها ساهلة بصح لازم تختاري البيستاش ولا حشوة وحداخر مليح .

مقادير تحضير بقلاوة تاع الحربوش :[2][edit | edit source]

2كيسان بيستاش يكونو مرحيين مليح بصح مشي رطبين قاوي. كاس سكر. 2ملاعق ماالزهر. وباطة كاملة تاع لابات افيلو. كاس سمن دايبة. 1/2مغرف سكر مطحون خشين. كاس شاربات. كيفاش نخدموها نحمي الكوشة على 180°.

في بول نخلط السكر والبيستاش والمازهر. نوجد بلا مدور وندهنو بل زبدة مليح. نحو ورقة وحدة من لابات فيلو ونديروه فسني.

نزيدو العجينة الزاوجةوندهنوها مليح بالزبدة ونفرغ عليها طبقة صغيرة من الحشو تاع البيستاش . نزيدو فوقها تان عجينة واحداخراوندهنوها بالزبدة. نزيدو فوقها تان عجينة وحداخرا ونديرو فوقها البيستاش. ندورو العجينة بشكل اسطواني وندركو عليها. نحطو الجينة المدورة على شكل اسطواني فالبلا. كي نديروها فالبلا نقسموها بشكل اسطواني. ندخلو العجينة فالفرن حت طيب مليح منداخل او تحمار ملفوق. كي نخرجوها ملفور نعسلوها بشاربات وهي حامية ونرش عليها البيستاش مالفوق. نقارعولها تبرد وناكلوها بصحة والعافية.

  1. http://mawdoo3.com/%D8%B7%D8%B1%D9%8A%D9%82%D8%A9_%D8%B9%D9%85%D9%84_%D8%A7%D9%84%D8%A8%D9%82%D9%84%D8%A7%D9%88%D8%A9_%D8%A7%D9%84%D8%B9%D8%B1%D8%A7%D9%82%D9%8A%D8%A9
  2. http://www.tareekaa.com/%d8%ad%d9%84%d9%88%d9%8a%d8%a7%d8%aa/25031-%d8%a7%d8%b5%d8%a7%d8%a8%d8%b9-%d8%a7%d9%84%d8%a8%d9%82%d9%84%d8%a7%d9%88%d8%a9-%d8%a8%d8%a7%d9%84%d9%81%d8%b3%d8%aa%d9%82