Wp/arq/باولو كويلو

باولو كويلو

باولو كويلو ف2007

الإسم  : باولو كويلو

النهار اللي زاد فيه : 24 أوت 1947

البلاصة اللي زاد فيها : ريو دي جانيرو (لّبرازيل)

الخدمة = كاتب

خدمات وحدوخرين = فارس تاع الوسام الوطني من جوقة الشرف و عضو فالأكاديمية تاع الأدب البرازيلي من 2002

كاتب

اللوغة اللي يكتب بيها = لّبرتغاليه (لّبرازيليه)

ݒاولو كويلهو و تتنطق بالبرتغالية ݒاولو كويلو، زاد ف24 أوت 1947 في ريو دي جانيرو، هوا روائي و مطرجم مل البرازيل. انشهر فالعالم بعدما بوبلييا الخيميائي، اللي تباع منو 65 مليون واحد و باع 21 مليون كتاب فالعالم، و الكتوبا تاوعو طرجمهوهم ل81 لوغة.

سيرتو

ݒاولو كويلو زاد في ريو دي جانيرو، باباه كان مهندس و كان ينتمو للطبقة البرازيلية المتوسطة. كويلو كان يقرا في ليكول تاع جيسويت في سان ايقناسيو. والديه بغاوه يخرج مهندس، بصح باولو كان يبغي المسرح. كي قال ليماه بڵي راه باغي يخرج كاتب، يماه ڨالتلو:《 حنوني، باباك مهندس، و راجل راتب و رزين و تخمامو باين، راك عارف مليح شا معنتها كاتب؟》 بعدما حوس شوية، باولو عرف بڵي لكاتب 《دايمن داير نواظر و جامي يمشط شعرو》ولازم واحد مايفهموش مالجيل تاعو ݒاولو كان مارڨ و جابد بزاف، و ماكانش دايها في والديه، و باباه كان مخلوع في هاذا الطفل لياه حتا داير كيما هاكا و دخلو للسبيطار تاع المهابيل كي كان في عمرو 17 نعام. جرب شحال من خطرة يهرب و منبعد طلڨوه كي كان في عمرو 20 عام. ݒاولو يقول في هاذا السوجي:《ماداروش هاكاك باه يعذبوني... بصح ماكانوش عارفين شايديرو. ماداروش هاكاك باه يحطموني، بصح دارو هاكاك باه يسلكوني》 سنين ممبعد لكاتب ادا محكايتو القصة تاع روايتو فيرونيكا ديسيدات تموت .و باه يدير ݒليزير في والديه دخل يقرا حقوق و خلا الحلم تاعو على جيها بصح قرا عام و حبس. فالستينات بان الموفمو تاع الهيبي، و ݒاولو كان مشترك فيه. . كي كان في عمرو 23 سنا خلا بلادو و راح للمكسيك، البيرو، بوليفيا و الشيلي و راح فان للوروب و إفريقيا الشمالية. عامين ممبعد، رجع للبرازيل و بدا يألف لغنا، و يخدم مع الموسيقيين كيما رول سيكساس. المنظمة تاعهم كانت ناجحة، و التعاون تاعهم ساهم فتبديل صورة الروك فالبرازيل. .اﻹيمان تاع ݒاولو بالمسيح هوا ڵي لاڨاه بمرتو كريستينا فنانة و رسامة .دخلوه للحبس قريب عام لاقيباش دار الشغب كونطر الديكتاتورية البرازيلية. و مور هاذي التجربة ݒاولو رجع لحياتو لعادية هوا صحافي متخصص فالموسيقى لبرازيلية، منبعد خدم عند بوليڨرام و تلاڨا مع مرتو لولانية. و هاذي لفترة ماطولتش، و ف 1978 سمح في خدمتو و مرتو. الاستجواب الروحي تاعو خلاه يشارك في بزاف تجارب، و منها السحر لكحل. طريق الحج تاع سان جاك تاع كومبوستال، جاه ﻹلهام تاع كتابو الڵول الحاج تاع كومبوستال ڵي بوبليياه ف 1987 بصح قعد 10 سنين باه خرج. و في وحد ﻷنترفيو قال:<<كنت فرحان بزاف بشتا كنت ندير، درت صوالح ڵي عطاوني لماكلة و لما، كنت نخدم، و كان حذايا لبنادم ڵي نبغيه، و كان عندي الدراهم بصح ما كنتش عايش لحلم تاعي حلمي كان و يبقى أني نوڵي كاتب>>. و خلا خدمتو تاع مطرجم باه يتفرغ غير للكتوبا. ݒاولو كويلو تزوج لخطرة الزاوجة ف1980 مع الرسامة البرازيلية كريستسنا واتيشيكا. كان يسكن في جناف و بلا ما نحسبو هاذيك تاع كيما كان يروح للخارج علا جال خدمتو. كان مخصص شويا مدراهمو للمؤسسة تاعو ڵي كانت تهتم بليجون و شوابنيا المهجورين في ريو.

خدمتو

ف1987 ݒاولو كويلو بيبليا الحاج تاع كومبوستال. ف 1988 بيبليا الكتاب اللي انشهر بيه الخيميائي ( طرجموه للفرونسي ف1994) . لأسطورة ڵي ادا منها الفكرة هيا تاع الإتلمؤسس تاع كنيسة كراكوف: اسحاق ياكوبوفيتش. و الرواية تاعو تعتمد على قصة قصيرة كتبها خورخي لويس بوخريس، حكاية الزوج اللي يحلمو. و هوا فان المؤلف تاع كتاب على حاشية الواد بييدرا، قعدت و بكيت، اللي طرجموه ل23 لوغة، و فان مكتوب ف1994، الشيطان و الآنسة بريم ف2002، 11دقيقة ف2003، دليل محاربي الضوء، الجبل الخامس، الزاهير، كيما الواد اللي يسيل، المخطوطة اللي صابوها ف2012 و الزانية ف2014. باع فايت 165 مليون نسخة فلعالم و طرجمو كتوبتو ل80 لوغة. و ادا بزاف جوائز أدبية في بزاف بلدان، و منها الجائزة الأدبية تاع دوبلين اللي داها علا جال الكتاب تاعفيرونيكا ديسيدات تموت. هوا فارس تاع الوسام الوطني من جوقة الشرف و ادا جوائز عالمية فهذا الميدان. و عضو فالأكاديمية تاع الأدب البرازيلي من2002 وسفير النوايا الحسنة تاع الأمم المتحدة من 2007. عندو كثر من 30 مليون معجب و هوا الكاتب اللي عندو أكبر عدد تاع متتبعين فشبكات التواصل الإجتماعي. باولو كويلوواحد ملكتاب القلال اللي قدر يكون موضوع تاع نوادي المعجبين فالبرازيل، الطاليان، سبانيا، اليونان و فرانسا .

الستيل تاعو

الكتوبا تاع كويلو هوما روايات فلسفية يهدرو على الروحية على شكل قصة طويلة. و الروحية التوفيقية اللي تتحاهل بعض المعتقدات و تدي من تقاليد متنوعة و خطرات تكون متناقضة : الديانات، الإتجاهات الفلسفية، التصوف، الروحانية، التأمل...و وحداخرين. الستيل المباشر و الساهل للطرجمة، و الإطار البسيط تاع الحكايات سمح لكويلو باه يوصل لجمهور كبير في قاع الثقافات. و هاذي الكتابة البسيطة خلاتهم ينتقدوه بزاف و قالو بلي يستعمل طرق ساهلة، و فالخط تاع الرواية الشعبية كاين كتوبا تاع << التنمية الشخصية >> يقدم الروحانية المراوغة بلا ساس متين. ف البرازيل مالقري هوا الكاتب المشهور قاع و عضو فالأكاديمية تاع الآداب من 2002 بصح انتاقدوه على نقص الأصالة، و الإشهار الكبير اللي يديروه لكتابو قبل ما يخرج و أخطاؤو النحوية... كويلو والف هاذو الإنتقادات و دايمن فالرد تاعو يقول أنا كي قاع هاذو الناس يقراو كتوبتي بزاف عليا.

مواضيعو

القصص تاع كويلو يحكو على مواضيع متشابهة، خاصة هاذوك تاع الأحلام و المشاريع و نقاط الضعف و الشكوك و معنى الحياة... في هادو المواضيع ماعلابالوش بزاف بالديكور: لموهيم القصة تاع زوج ولا ثلاث شخصيات اللي تكون دايمن مرتبطة بالمكتوب.

الأسطورة الشخصية

<< الأسطورة الشخصية >> هي عبارة استعملها الكاتب باولو كويلو في كتابو الخيميائ. على حسابو هوا كل واحد فينا عندو مصيرو الخاص، و كي يصرا هاذاك الشي يسميه << الأسطورة الشخصية >> و هذا بالإعتماد على قدرتنا في تحقيق شانا باغيين. << ايلا تسمعو لقلبكم راكم عارفين مليح شاكم رايحين اديرو في هاذي الدنيا. طفل، و قاع نعرفو بصح نخافو من خيبة الأمل، نخافو كون ما نقدروش نحقو أحلامنا، ماوليناش نسمعو لقلبنا، قال نورمال كون نبعدو خطرة على خطرة على أسطورتنا الشخصية، ميهمش لاقيباش في بزاف مرات الحياة تعطيلنا الفرصة باه نخطارو الطريق المثالي >> .

لمؤسسة باولو كويلو

فنوفمبر 2014 ، باولو كويلو طلع 80000 وثيقة فلانتارنات -مخطوطات و جرانين و تصاوير و براوات تاع القراء و قصاصات- و هكا صنع نافذة فلانتارنات للمؤسسة باولو كويلو اللي جايا في جناف.

أعمالو

لادات اللي خرج فيها الكتاب بالفرونسي

- الحاج تاع كومبوستال 1987

- الخيميائي 1988

- على حاشية الواد بييدرا، قعدت و بكيت 1994

- الجبل الخامس 1996

- دليل محاربي الضوء 1997

- محادثة معا باولو كويلو 1999

- فيرونيكا ديسيدات تموت 1998

- الشيطان و الآنسة بريم 2000

- ١١ دقيقة 2003

- مكتوب 2004

- الزاهير 2005

- كيما الواد اللي يسيل 2006

- السحارة تاع بورتوبيلو 2007

- الرابح يبقا وحدو 2009

- بريدا 2010

- ألاف 2011

- المخطوطة اللي صابوها 2013

- الزانية 2014

- الجاسوسة 2016