Wp/ann/Usem Obolo
Usem Obolo ìre usem ebi Obolo ekitumu. Ekitumu usem yi me Obolo agan̄ Ichep-ura mè Obolo agan̄ Mbum-ura. Otu-ifuk ebi ìkitumu usem yi mîwa iraka 318,000. Usem Obolo ìkup me ogbọn̄ usem agan̄ Otu Okwaan̄ Kurọs [Lower Cross languages]. Ebi ìkirọ m̀wèek [research] ifo me lek esese usem mîtumu isibi ibe ke usem yi înwene me lek otutuuk usem òkukup ikakana ọmọ. Ọmọ osibi esese ichit me etete otutuuk usem ìkup me ọgbọn̄ usem agan̄ Otu Okwaan̄ Kurọs.
Otu usem
Otu usem [dialect] îwa me ido Obolo. Ekitumu usem chi me esese esese ama Obolo, kpa ama kpa usem. Ubọk geelek îrebe ikeya, ogwu ama ge itumu usem kan̄, ogwu ofifi ama mônọ mè iyaka igobo itet. Eche otu usem Obolo chi itap me irek go. Ema ere: Ataba, Unyeada, Ngo, Okoroete mè Ibot Obolo.[1]
Abichi Obolo
Abichi ìre ebi kè nkwukwuuk ikọ mè iman̄ cha ekisabe ige inu me usem. Ebi kè nkwukwuuk ikọ ìkup me abichi Obolo ìre ikechi:
| a | b | ch | d | e | f | g | gb |
| gw | i | j | k | kp | kw | l | m |
| n | n̄ | nw | ny | o | ọ | p | r |
| s | (sh) | t | u | (v) | w | y | (z) |
- Nkwukwuuk ikọ echi òkup me emen okop-ikọ ekup me usini otu-usem, ìkare me otutuuk usem Obolo.
- Mêkọt itoon̄ iman̄-ida me inyọn̄ usini nkwukwuuk ikọ. Nkwukwuuk echi òkibeme iman̄-ida ire ebi kè òbook ida [vowel] a, e, i, o, ọ, u mèlek si ǹchit-ida m mè n.
Nrọnnye
- ↑ MultiTree: A Digital Library of Language Relationships https://web.archive.org/web/20150418162418/http://multitree.org/codes/ann.html
- ↑ "Reading and Writing Obolo: Obolo Alphabet" in "A Workshop Manual for Teaching Obolo." Pg. 1. © Obolo Language and Bible Translation Organisation (OLBTO), 2011.
- ↑ "Reading and Writing Obolo." Pg. 4. Andoni Language Committee and Rivers Readers Project, 1978.