Wp/ann/Okwaan̄ Uchi

Okwaan̄ Uchi (miyaka ire Okwaan̄ Okwûkwu) ìre ge me lek ebi kè okwaan̄. Egwen ọmọ erieen̄ ya mije imalek ilomo uchi me lek.

Ido ita okup ikana ọmọ-Izirel, Jodan mè Palesitain.

Mun̄ isichat, uchi ira ikichiaak ikam me agba ijọn̄. Ogugo keyi, ekeke me me agba okwaan̄ me agan̄ ido Jodan imọnọ

Ìkibọkọ mun̄ kan̄ inan̄a me okwaan̄ Jodan ire ìkakilibi ìsibi isi ere geege.

Ujọn̄ọ kan̄ ìre akọp kilo go (50km) sà sà uwele kan̄ ore akọp mè kilo go (15km). Okike ijọn̄ îmọnọbe ìre efit kilo gweregwen mè kilo go (605km²). Udọ̀k kan̄ ìre efit mità iba mè akọp onaan̄ge mè jeeta (298m). Oke mun̄ okup me emen kan̄ ìre efit kilo ge mè akọp mè ini (114km³).

Ọmọ olomo uchi ichit me otutuuk ebi kè asabọn okwaan̄ ijọn̄ otapbe ikana.Eya orọrọ mè mun̄ kan̄ inikaan̄ ulobo igak mun̄ ebi kè ofifi okwaan̄.

Ire ene ibogwọk ugwọk me emen mun̄ okwaan̄ ya, ibokitetê me emen; ikpogen!

Ogwu ibôgwọk me mun̄ ya ibôkpọ ikite

Mije uchi onye ubọk ilomo me mun̄ okwaan̄ ya, irin̄ geege (mire anam mun̄) ikaluk me emen; uti ìkatitibi me emen si. Eyi orọ ekigwen ọmọ Okwaan̄ Okwukwu (mije inu ogat ugwem geege ìkaluk me emen).

Uchi me agba okpoon̄ mgbọ mun̄ ochatbe

Ubọk geelek irebe ke kpunu irin̄ me emen mun̄ ya, owuwa inu ekisan̄abe me okwaan̄ ya orọ inyi ọmọ ikitaan̄ etip. Mîkisan̄a owuwa uchi. Ire echibi kilo mun̄ ge, mêkọt isan̄a uchi òsolek efit garam iba mè akọp jaaba mè gweregwen (276 g/kg). Uchi ya monikaan̄ calcium chloride (CaCl₂) 14.4%, potassium chloride (KCl) 4.4%, magnesium chloride (MgCl₂) 50.8% mè sodium chloride (NaCl) 30.4%. Sulfate ions (SO₄²⁻) ìkamalek ilomo, ire bromide ions (Br⁻) ilomo enenen me lek; ọmọ olomo bromide ion ichit me otutuuk mun̄ me liyọn̄.

Otutuuk inu chi ekisan̄abe me emen mun̄ yi ekisa ema irọ esese inu okirọ me ugwem ije ifo isi. Mîkisa usini irom ebi kè ugwum, inodie mè kemikàl ekisabe ìrọ esese inu me uwu irom-inu [industry].