Ọgọsitọs (23 Sepitemba 63 SK – 19 Ọgọs 14 AO, ogwu ekigwen Ọkitavian me adasi mgbọ) ìre adasi ogwu mperọ Rom, ogwu òkpukpulu bene me 27 SK abayaage inire usen mkpa kan̄ me 14 AO. Ọmọ okpulu Rom mgbọ ebi Rom ekinwene ubọk mkpulu kiban̄ inan̄a me ripọbilik inin̄ me ijọn̄ ubọọn̄ [empire].

Mgbọ ekpan̄be Juliọs Sisa, Ọgọsitọs mè ebi ìkeke mèlek kan̄ etitim akọn̄ me lek ebi ìkpakpan̄ ogwu ubọọn̄ ya mè itim ikpan̄ ema. Ike mgbọ okije, Ọgọsitọs otitim akọn̄ me lek ebi ìkeke mèlek kan̄ cha, mè itim ikpan̄ ema si.

Ọkitavian (ònire Ọgọsitọs) ìre gwun̄ Juliọs Sisa omọnọbe isa irọ gwun̄ kan̄. Juliọs Sisa yi ìre òkokakaan̄ unye enenen mè ikikpulu Rom ike înemebe ọmọ. Me emen mgbọ ya, ene ita ekup me otuchieen̄ mkpulu Rom: Mak Antoni, Ledipus mè Ọkitavian. Ife ita chi ekirọ inu igọọk me ike Juliọs Sisa oweekbe. Mgbọ ekpan̄be Juliọs Sisa me acha 44 SK, akọn̄ emen ido obebene me otutuuk Rom, me etete ebi ìkeke inyi Sisa mè ebi ìkije ikeme ọmọ, eyi ebi ibot akọn̄ kiban̄ erebe Burutus mè Kasiọs, ene iba me lek ebi ìkpakpan̄ Sisa.

Me adasi mgbọ, Ọkitavian ore ogwu ijija me lek ene ita cha ìgbagbaan̄ iriaak. Ledipus ìre ogwu òrọriọọn̄ inu idọk ofolek mkpulu ido, sà Mak Antoni ore ogwu ibot akọn̄ òrọriọọn̄ ukot akọn̄ enenen. Ife ita ìgbagbaan̄ iriaak mîtim ikpan̄ Burutus mè Kasiọs me Akọn̄ eyi Filipai, me 44 SK. Me agan̄ ilile, îre mije ifuk-ibot akọn̄ Antoni okaan̄be orọ ibe akọn̄ ya inwọn ife ita chi. Mgbọ etimbe akọn̄ isan̄a, eneniche ido ya itap me agan̄ ita. Antoni omọnọ agan̄ mbum-ura, Ledipus omọmọnọ Sipen mè okpọkọ me lek Afirika agan̄ Inyọn̄, sà Ọkitavian omọnọ Itali.

Nrọnnye[edit source]