Wp/ain/Saksaynu

Saksaynu noka

Saksaynu (Samkusaynu) anak Aynukur nispa ne.

Saksaynu anakne, Sibecari (tane an Sinhidaka-co) or wa pikata un mosir newa menas un utar ne menaskur kotankorkur ne a. Menaskur anakne, tane an Niikappu or wa Sirawuy un utar ne sumkur tura Sibecari-pet (Sizunai-pet) iwor e-uko-wen-sampe-kor pa (1648 pa wano). Menaskur husko kotankorkur Kamokutayn anakne, sumkur kotankorkur Onibisi tura 1653 pa un ukoyki ani a=rayke wa, iyorunkur ne a Saksaynu kotankorkur ne an.

Saksaynu anakne Sibecari-pet panke cupka sam, Sibecari or un casi ta ewak (tane an Sinhidaka-co Sizunai). Onibisi anakne Sibecari-pet penke sum sam, Hae or un casi ta ewak (tane an Hidaka-co Monbetu). Ne utar e-uko-wen-sampe-kor pa korka, Matumay tono itomoitak ani uko-pirka pa. Korka, 1661 pa wano 1673 pa pakno ta suy uko-wen-sampe-kor pa hine, 1668 pa 4 cup ta Saksaynu anakne Onibisi rayke. Onibisi irwakihi neya Hae or un kotankorkur anakne iyeymontasa kusu, Matumay tono or un sipopkep ikasuy kuni nisuk korka a=kopan. Hae or un sonkokorkur hosipi ru hontom ta payokakamuy ani nisa ray akusu, "sonkokorkur anakne Matumay or wa surku ani a=rayke" sekor asur as hine, uko-wen-sampe-kor rok Sibecari newa Hae sine kewtum ne an ruwe ne.

1669 pa ta, Matumay tono newa Aynu uymam anakne Matumay tono or un pirka wa okere, Aynu or un wen wa okere. Saksaynu anakne Aynu mosir epitta un Aynu utar eun Matumay tono koyki kusu i-pawe-tenke. 1669 pa 6 cup ta, Saksaynu sapa-ne-kur ne Aynu tumi-utar anakne Matumay tono eun tumi ko-hopunpa pa. Tanpe anakne Saksaynu tumihi ne. Oyakoyak ta tumi as wa, sakin ta kur neya uymam kusu arki cip neya taka tere kur neya ko-arpa pa wa, sisam utar koyki pa, ronnu pa. Saksaynu anakne Matumay un arpa, 7 cup kes ta tane an Yamakosi-gun Osamanbe-co Kunnuy pakno tumi ko-arpa. Matumay tono or wa ikasuy haw nu Tokugawa bakuhu anakne, Tohoku un tono utar eun Matumay tono ikasuy kusu teppo newa haru kore kusu kaspaotte wa, ne utar neno ki pa ruwe ne.

Kunnuy ta tumi anakne 8 cup etok pakno an korka, sisam utar isaykaku wa kusu, Saksaynu tumi-utar anakne Oshima-hanto cupka un Aynu utar tura tumi kor pa eaykap. Matumay tono anakne bakuhu newa Tohoku un tono utar or wa ikasuy uk wa, teppo poronno kor pa. Nea kusu, tumi anakne Saksaynu utar or un wen wa, Saksaynu tumi-utar anakne Kunnuy or wa kira pa kuni ne. Saksaynu anakne 10 cup 23 to ta, tane an Niikappu ne Pipok or un Matumay tono casi ta a=kokantama wa a=rayke. Tumi anakne re pa pakno an korka, sapa-ne-kur isam tumi ko-hopunpa utar anakne oykesne Matumay tumi-utar or un maketa pa ruwe ne.