Wn/ur/اللہ یار خان

مولانا اللہ یار خان سلسلہ نقشبندیہ اویسیہ کے بانی شیخ تھے۔

خاندانی پس منظر

اللہ یار خان اعوان خاندان سے تعلق رکھتے تھے ،ملک ساہو خان‘ قطب حیدر اور سالار غازی مسعود نے سلطان محمود غزنوی کے ساتھ مل کر سومنات فتح کیا‘ ان کی اولاد میں اللہ یار خان ظہور پزیر ہوئے۔

ولادت

اللہ یار خان 1323ھ یا 1322ھ / 1904ء کو موضع چکڑالہ ضلع میانوالی کے زمیندار گھرانے میں پیدا ہوئے۔

نام ونسب

والد کا نام ذو الفقار تھا جو خاندان کے دیگر افراد کی طرح کاشتکاری کے پیشہ سے وابستہ تھے۔ والدہ کا نام عالم خاتون تھا۔ آپ کا خاندان چکڑالہ کے شمال میں اڑھائی تین میل کے فاصلہ پر ایک چھوٹے سے ڈیرے پر قیام پزیر تھا۔ جہاں پر آپ کا بچپن کھیتی باڑی کے امور میں والد کا ہاتھ بٹاتے ہوئے گذرا۔

تعلیم وتربیت

پانچویں تک کا نصاب ختم کرنے کے بعد آپ نے دیگر علوم مروجہ کی طرف توجہ مبذول فرمائی۔ اس دور میں باقاعدہ مدارس نہیں تھے۔ کسی گاؤں میں کسی فن میں کمال رکھنے والے استاد کے پاس جا کر طلبہ وہ فن سیکھتے ‘ ان کتابوں کی تکمیل کے بعد کسی اور کے پاس حاضر ہو جاتے۔ آپ نے بھی علم کی جستجو میں مسجد خواجگان ڈلوال‘ چکوال کے قریب انے والا موہڑہ‘ لنگر مخدوم کے قریب چک نمبر 10 بھلوال جیسی کئی جگہوں پررہ کر صرف ونحو‘ فلسفہ ومنطق ‘ عربی علوم وفارسی کی نہ صرف تحصیل کی بلکہ ان میں کمال حاصل کیا۔ مختلف اساتذہ سے استفادہ کے بعد آپ مدرسہ امینیہ دہلی دورہ حدیث کے لیے تشریف لے گئے۔ علوم دینیہ کی تکمیل کے بعد آپ نے علم طب کی کتابیں پڑھیں

تصنیفات

تفسیر‘ حدیث‘ فقہ واصول فقہ‘ ادب ولغت‘ عربیت اور کلام وغیرہ تمام علوم دینیہ آپ کی توجہات کا خاص مرکز رہے۔ کئی تحقیقی تصانیف منظر عام پر آئیں ‘ مثلاً

• تحذیر المسلمین عن کید الکاذبین
• الدین الخاص
• ایمان بالقرآن
• تحقیق حلال وحرام
• الجمال والکمال
• نفاذ شریعت وفقہ جعفریہ
• حیات بزرخیہ
• حیات النبی علیہ وسلم
• اسرار الحرمین
• سیف اویسیہ آپ کی یادگار تصانیف ہیں۔

ذریعہ معاش

مولانا کی ملازمت کا آغاز میانوالی پولیس میں تعیناتی سے ہوا لیکن طبعی میلان کچھ اور ہی تھا۔ اس لیے وہ نوکری چھوڑ دی۔ پھر پشاور جیل کے عملے میں شامل ہو گئے لیکن وہاں کے ہندو داروغہ سے اس لیے نہ بنی کہ وہ راشی اور قیدیوں کو ملنے والی رقم غبن کرتا تھا۔ آپ نے تعاون نہ کیا اور اس ملازمت سے بھی سبکدوش ہو گئے اس کے بعد آپ نے کوئی ملازمت نہ کی۔

ازدواجی زندگی

مولانا نے تین عقد فرمائے۔ آپ کی اولاد دو صاحبزادوں اور دو صاحبزادیوں پر مشتمل ہے۔

وفات

15 جمادی الاول 1404ھ بمطابق 18 فروری 1984ء بروز سنیچر اسلام آباد میں آپ نے رحلت فرمائی۔

آخری وصیت

حضرت مولانا الله یار خان رحمته الله علیه نے اپنی وفات 18 فروری 1984 سے ایک مهینه قبل 12 جنوری 1984 کی رات کو اکابرین سلسله کے سامنے اپنی وصیت ریکارڈ کروائی. یہ وہ آخری ھدایات ہیں جو حضرتؒ نے اپنے خلفا اور جماعت کے لئیے چھوڑیں۔آڈیو کے شروع میں آپ نے سختی سے پوری جماعت کو حکم دیا که مولانا اکرم اعوان اور اس کے کچھ ساتھی میری میت کو اغوا کر کے مناره میں دفنانا چاہتے ہیں۔ ایسا ہرگز نہ کیا جائے اور مجھے چکڑاله میں هی دفن کرنا، حضرت مولانا اللہ یار خانؒ کی اس وصیت سے ان کے کسی بھی خلیفہ کی جانب سے شیخ سلسلہ ہونے کے دعویٰ کی تردید ہوتی ہے۔ حضرت جیؒ نے اتحاد و اتفاق کی تلقین فرمائی، اور اسے دنیا و آخرت میں بھلائی کا موجب قرار دیا۔