Wn/shn/IS ၶဝ် တိုၵ်းတေႃး ႁူင်းႁေႃဝဵင်းၶရူဝ်ႇၵတ်ႉသ် တီႈရတ်ႈသျႃး ၵူၼ်းတၢႆ ဢမ်ႇယွမ်း 115

ဝၼ်းသဝ်၊ မၢတ်ႉၶျ် 23၊ 2024 

ၸုမ်းၵေႃႇၵၢၼ်ႁၢႆႉ ၶဝ်ႈယိုဝ်း တီႈ ႁူင်းႁေႃဝဵင်းၶရူဝ်ႇၵတ်ႉသ်

လွင်ႈဢၼ်ၵူၼ်းယိပ်းၵွင်ႈၵၢင်ႇ ၶဝ်ႈယိုဝ်းတီႈ ၽုင်ႇၵူၼ်း တီႈၼႂ်းႁူင်းႁေႃဝဵင်း ၶရူဝ်ႇၵတ်ႉသ် ဢၼ်မီး ၽၢႆႇတူၵ်း ဝဵင်းမွတ်ႉသ်ၵူဝ်ႇ တီႈရတ်ႈသျႃးၼၼ်ႉ ပဵၼ်ႁွႆးမိုဝ်းၶဝ်ၼႆ ၸုမ်းၵေႃႇၵၢၼ်ႁၢႆႉ ဢၢႆးဢႅတ်ႉသ် ၶဝ် လႆႈပိုၼ်ၽၢဝ်ႇဝႆႉတီႈ သိုဝ်ႇသၢၼ်တူင်ႇၵူၼ်း ယူႇ။

ပဵၼ်ၽွင်းမိူဝ်ႈ ၸၢဝ်းၶရိတ်ႉယၢၼ်ႇတင်းၼမ် ဢွၼ်ၵၼ် ၸူႉတုမ်ၵၼ်တီႈ ဝဵင်း Krasnogorsk တီႈ ၽၢႆႇၼွၵ်ႈဝဵင်းမွတ်ႉသ်ၵူဝ်ႇ ၼၼ်ႉ ၸဝ်းၶဝ် လႆႈဢဝ်ယိုဝ်းလႄႈ ၵူၼ်းတၢႆ ၵူၼ်းလႆႈတၢင်းၸဵပ်းမၢတ်ႇ မီးဢၢၼ်ႇႁူဝ်ပၢၵ်ႇမၼ်းၼႆႉ ၸုမ်း ဢၢႆးဢႅတ်ႉသ်ၶဝ် လႆႈတၢင်ႇၶၢဝ်ႇဝႆႉတီႈ ၶၢဝ်ႇဢႃႇမႅတ်ႉ Aamaq ၶဝ်ၼၼ်ႉယဝ်ႉ။

ယွၼ်ႉပိူဝ်ႈ ၵူၼ်းယိင်းၵွင်ႈၵၢင်တင်းၼမ် ပိုတ်ႇယိုဝ်းလႄႈ ၸွမ်းၼင်ႇ သဵၼ်ႈမၢႆႁူဝ်တေးမၼ်းဝႃႈတႄႉ ၵူၼ်းဢၼ်လႆႈတၢႆၵႂႃႇ မီး ဢမ်ႇယွမ်း 40 ၵေႃႉသေ ၵူၼ်းဢၼ်လႆႈတၢင်းၸဵပ်းမၢတ်ႇၵႂႃႇတႄႉ မီးယူႇ 100 ပၢႆၼႆသေတႃႉ ပေႃးဢဝ်သဵၼ်ႈသၢႆမၢႆလိုၼ်းသုတ်းဝႃႈ ၵူၼ်းဢၼ်လႆႈတၢႆ မီးၵႂႃႇထိုင် 115 ၵေႃႉယဝ်ႉဝႃႈၼႆ။ တီႈၼၼ်ႈၵေႃႈ ထုၵ်ႇဢဝ်ၽႆးၽဝ်ၸုတ်ႇၵႂႃႇ။ ၵပ်းၵၢႆႇလူၺ်ႈ ၵူၼ်းမႃးယိုဝ်းၼၼ်ႉတႄႉ ပႆႇလႆႈႁူႉ သၢႆငၢႆမၼ်းၸႅင်ႈလႅင်းလီၼင်ႇၵဝ်ႇ။

တီႈႁွင်ႈထၢၼ်ၶၢဝ်ႇရတ်ႈသျႃး ၵမ်ႈၽွင်ႈတႄႉ လၢတ်ႈဝႃႈ ၸိူဝ်းပဵၼ်ၽူႈမႃးယိုဝ်းၸိူဝ်းၼၼ်ႉ ၶဝ်လႆႈလႅၼ်ႈပၢႆႈၵႂႃႇ မိူဝ်ႈပလိၵ်ႈၽၢႆႇတိုၵ်းတေႃးလွင်ႈသုၵ်ႈယုင်ႈ ၶဝ်ပႆႇၽႅဝ်မႃးၼၼ်ႉ ဝႃႈၼႆယဝ်ႉ။ ၽူႈဢုပ်ႉပိူင်ႇဝဵင်း မွတ်ႉသ်ၵူဝ်ႇ Sergei Sobyanin လၢတ်ႈဝႃႈတႄႉ လွင်ႈတိုၵ်းတေႃးဢၼ်ၼႆႉ မၼ်းပဵၼ် ဢၼ်လီၶေႃးၶူမ်သေ ၵပ်းၵၢႆႇလူၺ်ႈ လွင်ႈႁဵတ်းႁၢႆႉဢၼ်ၼႆႉ ၽၢႆႇၸဝ်ႈၼႃႈတီႈၶဝ် တိုၵ်ႉၵူတ်ႇထတ်းယူႇဝႃႈၼႆယဝ်ႉ။ လွင်ႈပဵၼ်ဢၼ်ၼႆႉၼႆႉ မၼ်းလႆႈပဵၼ်ၵႂႃႇ ဝၢႆး ၸွမ်ၸိုင်ႈ Vladimir Putin လႆႈဢွင်ႇပႄႉ ပၢင်လိူၵ်ႈတင်ႈ တႃႇမၼ်းတေ သိုပ်ႇဢုပ်ႉပိူင်ႇရတ်ႈသျႃးၵႂႃႇၼၼ်ႉယဝ်ႉ။ ၶၢဝ်ႇၸိူဝ်းမႃးတီႈ ရတ်ႈသျႃးၼၼ်ႉတႄႉ ၼႄဝႆႉ ဢၼ်ႁူင်းႁေႃဝဵင်း ၽႆးတိုၵ်ႉမႆႈယူႇတႄႉတႄႉဝႃႈဝႃႈၼၼ်ႉယဝ်ႉ။

တီႈၼႂ်းသိုဝ်ႇသၢၼ်တူင်ႇၵူၼ်းတႄႉ ႁၼ်ဢွၼ်ၵၼ်တၢင်ႇဝႆႉငဝ်းတူင်ႉ တီႈၼႂ်းတိူၵ်ႈ ဢၼ်ၵူၼ်းၶဝ်ႈလႆႈမွၵ်ႈ 6000 ၵေႃႉၼၼ်ႉ ၵွၼ်းၽႆးဢွၵ်ႇပဵၼ်ၵဵၼ်ဝႆႉၼၼ်ႉယဝ်ႉ။ ၼႂ်းၶၢဝ်ႇဝႃႈဝႆႉတႄႉ တီႈၼႂ်းႁူင်းႁေႃၼၼ်ႉ ဢၼ်ပဵၼ် ၸုမ်းႁႆႇတိုင်ႈၽဵင်း ရတ်ႈသျႃးၸိုဝ်ႈသဵင်ယႂ်ႇ မႃးလဝ်ႇမူၼ်ႈလႄႈ ၵူၼ်းဢွၼ်ၵၼ်မႃးပၼ်ႁႅင်းသေ ၸိူဝ်းၼၼ်ႉတႄႉ လႆႈဢဝ်ၶဝ် ၶၢႆႉဝႆႉပၼ် တီႈလွတ်ႈၽေးယဝ်ႉသေတႃႉ ၸိူဝ်းဢၼ်တိုၵ်ႉၶမ်ဝႆႉယူႇ ၼႂ်းၽႆးၵေႃႈ လႅပ်ႈတေ မီးဝႆႉယူႇ ဝႃႈၼႆယဝ်ႉ။

မိူဝ်းပွတ်းၸဝ်ႉလိူၼ်ၼႆႉၼၼ်ႉ လုမ်းၽွင်း ဢမႄႇရိၵၢၼ်ႇ လႄႈ လုမ်းၽွင်းမိူင်းဝၼ်းတူၵ်းတင်းၼမ် ၸိူဝ်းမီးတီႈ မွတ်ႉသ်ၵူဝ်ႇၼၼ်ႉ လႆႈပၼ်ၽၢင်ႉ ၵူၼ်းမိူင်းၶဝ်ဝႆႉဝႃႈ ယႃႇပေ ႁႂ်ႈၵႂႃႇတီႈ ၵူၼ်းၸူႉတုမ်ၵၼ်ၼမ် ဝႃႈၼႆဝႆႉယဝ်ႉ။

ငိူၼ်ႈငဝ်ႈတိုၼ်း

• VOA News. "Islamic State Group Claims Attack on Moscow Concert Hall; 60 Dead" — VOA News, March 22, 2024
• VOA News. "မော်စကိုအနောက်ပိုင်းကပွဲရုံ IS တိုက်ခိုက်မှု လူ (၄၀) မကသေဆုံး" — VOA News, March 23, 2024
• Paul Kirby & Andre Rhoden-Paul. "Gunmen kill 115 at Crocus City Hall in Moscow attack" — BBC News, March 23, 2024