Wn/shn/ၽူႈဢွၼ်ႁူဝ် ရတ်ႈသျႃး ပူႇတိၼ်ႇ ၶဵင်ႇတႃႉ ၶေႃႈပူင် ၸၼ်ႉၵူႈမိူင်းမိူင်း ဢၼ်တႃႇတိၺွပ်းမၼ်း
ဝၼ်းဢင်းၵၢၼ်း၊ သႅပ်ႇထႅမ်ႇပႃႇ 3၊ 2024
ၸွမ်ပွင်ၸိုင်ႈ ရတ်ႈသျႃး ပူႇတိၼ်ႇ ၵႂႃႇဢႅဝ်ႇလႄႇ မိူင်းမူင်ႇၵူဝ်းလီးယႃး မိူဝ်ႈဝၼ်းဢႃးတိတ်ႉၼၼ်ႉသေ ဢမ်ႇႁၼ်မီး ငဝ်းလၢႆး ဢၼ်ၼႄဝႃႈ မိူင်းဢၼ်ပဵၼ်ၸဝ်ႈႁိူၼ်းၼၼ်ႉ တႃႇတေတိၺွပ်းမၼ်း ၸွမ်းၼင်ႇ ၶေႃႈပူင် ၸၼ်ႉလုမ်ႈၾႃႉ ဢၼ်ၼႄးဝႃႈ မၼ်းမီး လိူင်ႈသိုၵ်း ဢၼ်လုၵ်ႉတီႈ လွင်ႈရတ်ႈသျႃး ၶဝ်ႈတိုၵ်း မိူင်းယူႇၶရဵၼ်းၼၼ်ႉၼႆယဝ်ႉ။
ဝၢႆးသေ ဢွၵ်ႇၶေႃႈပူင် မိူဝ်ႈပူၼ်ႉမႃး မွၵ်ႈ 18 လိူၼ်ၼၼ်ႉယဝ်ႉ ၶၢဝ်းတၢင်းၼႆႉ ပဵၼ်ပွၵ်ႈဢွၼ်တၢင်းသုတ်း ဢၼ်ပူႇတိၼ်ႇ ၵႂႃႇတီႈ မိူင်းၽူႈၶဝ်ႈၸုမ်း လုမ်းတြႃး ၽၢႆႇလိူင်ႈ ၵူႈမိူင်းမိူင်းၼၼ်ႉယဝ်ႉ။ ဢွၼ်ၼႃႈမၼ်း တေမႃးဢႅဝ်ႇလႄႇၼၼ်ႉ ယူႇၶရဵၼ်း တုၵ်းယွၼ်း ႁႂ်ႈမူင်ႇၵူဝ်းလီးယႃး မွပ်ႈ ပူႇတိၼ်ႇ ပၼ်တီႈလုမ်းတြႃး တီႈဝဵင်းတႁဵၵ်ႉသေ ၸုမ်းၽွမ်ႉႁူမ်ႈ ယူးရူပ်ႉၶဝ် လၢတ်ႈၼႄ လွင်ႈမႆႈၸႂ်ဝႃႈ မူင်ႇၵူဝ်းလီးယႃး ၸၢင်ႈတေဢမ်ႇႁဵတ်းၸွမ်း ၶေႃႈပူင်ၼၼ်ႉၼႆယဝ်ႉ။ ၽူႈတၢင်လၢတ်ႈ ပူႇတိၼ်ႇ လၢတ်ႈဝႃႈ မိူဝ်ႈဝူင်ႈပူၼ်ႉမႃးၼၼ်ႉ ၶရႅမ်ႇလိၼ်ႇ ဢမ်ႇမႆႈၸႂ်သင်ၼႆယဝ်ႉ။
လိၵ်ႈဢၼုၺၢတ်ႈၼႆႉ ႁဵတ်းႁႂ်ႈ လူင်ပွင်ၸိုင်ႈမူင်ႇၵူဝ်းလီးယႃး လႆႈထူပ်းတၢင်းယၢပ်ႇၽိုတ်ႇ။ ဝၢႆးသေ ၶွမ်ႇမျူႇၼိတ်ႉ ဢၼ်ၵွင်ႉၵၢႆႇၸမ်ၸႂ်ၵၼ်တင်း မိူင်းႁူမ်ႈတုမ် သူဝ်ႇဝီႇယႅတ်ႉ မႃး လၢႆသိပ်းပီယဝ်ႉ မၼ်းလႅၵ်ႈလၢႆႈပဵၼ် တီႇမူဝ်ႇၶရေႇၸီႇ မိူဝ်ႈပီ 1990 ၼၼ်ႉသေ လႆႈၵေႃႇသၢင်ႈ လွင်ႈၵပ်းသိုပ်ႇ တင်း ဢမႄရိၵၢၼ်ႇ၊ ၵူၺ်းၵႃႈ ၽၢႆႇပၢႆးမၢၵ်ႈမီးတႄႉ မၼ်းတိုၵ်ႉလႆႈပိုင်ႈဢိင် မိူင်းႁိမ်းႁွမ်း ဢၼ်ယႂ်ႇလိူဝ် လႄႈ မီးဢဵၼ်ႁႅင်းလိူဝ်မၼ်း သွင်မိူင်း ဢၼ်ပဵၼ် ရတ်ႈသျႃး လႄႈ ၶႄႇၼၼ်ႉယူႇ။ ရတ်ႈသျႃးၼႆႉ မၼ်းပၼ် ၼမ်ႉမၼ်းၸၢၵ်ႈ ၵမ်ႈၼမ် လႄႈ ၾႆးၾႃႉ တင်းၼမ်တင်းလၢႆ တီႈမိူင်းဢၼ်ဢမ်ႇမီးလႅၼ်လိၼ်ၽင်ႇၼမ်ႉ ဢၼ်တူၵ်းယူႇၼႂ်းၵႄႈၵၢင်ပိူၼ်ႈၼၼ်ႉယဝ်ႉ။
ၽူႈဢွၼ်ႁူဝ် ရတ်ႈသျႃး လႆႈထုၵ်ႇ ၵူၼ်းပႂ်ႉၵုင်ႇမုၼ် ဢၼ်ၼုင်ႈၶူဝ်း သီလႅင် လႄႈ သီၶဵဝ် ဢၼ်ၸႅင်ႈလႅင်း ဢၼ်မိူၼ်ၼင်ႇ ၵူၼ်းပႂ်ႉသုၼ်ႇတူဝ် ၽူႈဢုပ်ႉပိူင်ႇ ၵျိၼ်ႇၵိတ်ႉၶၢၼ်ႇ မိူဝ်ႈႁူဝ်ပၢၵ်ႇပီ 13 ၵေႃႉ ဢၼ်ၵေႃႇတင်ႈ မိူင်းဝူင်ႉ မူင်ႇၵူဝ်းၼၼ်ႉ ႁပ်ႉတွၼ်ႈ ၽူႈဢွၼ်ႁူဝ် ရတ်ႈသျႃး တီႈပၢင်ႇလူင် ဝဵင်းလူင် Ulaanbaatar ၼၼ်ႉယဝ်ႉ။
ငိူၼ်ႈငဝ်ႈၶၢဝ်ႇ
- AP News. "Russian leader Putin challenges international warrant for his arrest with visit to Mongolia" — AP News, September 3, 2024
- Ruth Comerford. "Putin welcomed in Mongolia despite ICC arrest warrant" — BBC News, September 3, 2024
- AP News. "Russia's Putin visits Mongolia, defies international warrant for his arrest" — VOA News, September 3, 2024
- Associated Press. "Mongolia ignores an international warrant for Putin’s arrest, giving him a red-carpet welcome" — Los Angeles Times, September 3, 2024
