Wn/shn/ၸွမ်ၽွင်းလူင် ဢိတ်ႇသရေး မွၵ်ႇလၢတ်ႈဝႃႈ တေယုၵ်ႉလွင်ႈၽႂ်းၶၼ် ပၢင်တိုၵ်း
ဝၼ်းပုတ်ႉ၊ မၢတ်ႉၶျ် 27၊ 2024
_with_disputed_territories.svg)
မိူဝ်ႈဝႃးၼႆႉ ၸွမ်ၽွင်းလူင် ဢိတ်ႇသရေး ပႅၼ်ႇၸမိၼ်ႇ ၼႄႇတၼ်ႇယႃႇႁု လႆႈပၼ်ၵႂၢမ်းမၼ်ႈဝႃႈ တေသိုပ်ႇယုၵ်ႉသုင်လွင်ႈၶၼ်ၽႂ်း ၵၢၼ်ႁၢင်ႈသိုၵ်း တႃႇၽဵဝ်ႈမူၺ်ႉ ၸုမ်းၵေႃႇၵၢၼ်ႁၢႆႉ ႁႃးမၢတ်ႉသ်ၶဝ် ၼႆသေ လႆႈသႄႉသွမ်းပႃး ၶေႃႈတႅပ်းတတ်း ၶွင်ႇသီႇပၢႆးႁူမ်ႇလူမ်ႈ ၸုမ်းၸၢတ်ႈၸိုင်ႈလုမ်ႈၾႃႉ ဢၼ်တိုၵ်းယွၼ်း တႃႇၵိုတ်းတိုၵ်းၵမ်းလဵဝ် ၵႃႈတီႈ ၵႃႇၸႃႇ ၼၼ်ႉ ၼႆယဝ်ႉ။
ၶဝ်တေ ဢမ်ႇၸွမ်းႁဵတ်းပၼ်လႆႈ ဢၼ်ၽၢႆႇႁႃးမၢတ်ႉသ်ၶဝ်တုၵ်းယွၼ်း မဵဝ်းဢမ်ႇပဵၼ်လႆႈ ၼၼ်ႉသေ၊ တွၼ်ႈတႃႇ ၵူၼ်းၸိူဝ်းထုၵ်ႇတိၺွပ်းၵႂႃႇၼၼ်ႉ ႁႂ်ႈလႆႈလွတ်ႈမႃးတင်းသဵင်ႈ၊ တွၼ်ႈတႃႇ ယႃႉလႅဝ်ပႅတ်ႈ ၵၢၼ်ဢုပ်ႉပိူင်ႇ လႄႈ ၵၢၼ်သိုၵ်း ႁႃးမၢတ်ႉသ် ၶဝ်သဵင်ႈသဵင်ႈ လႄႈ ၼင်ႇႁိုဝ် လုၵ်ႉတီႈၵႃႇၸႃႇ ပေႃးတေ ဢမ်ႇပၼ် ၽေးၶဵၼ်လႆႈတေႃႇ ဢိတ်ႇသရေး ထႅင်ႈသေပွၵ်ႈ ၼၼ်ႉ ၼင်ႇႁိုဝ် လွင်ႈယိူင်းဢၢၼ်းၵၢၼ်သိုၵ်းၸိူဝ်းၼႆႉ ပေႃးတေ တဵမ်ထူၼ်ႈၵႂႃႇၼၼ်ႉ တေသိုပ်ႇ ႁဵတ်းသၢင်ႈၵႂႃႇၼႆ ၸွမ်ၽွင်းလူင် ဢိတ်ႇသရေး ပႅၼ်ႇၸမိၼ်ႇ ၼႄႇတၼ်ႇယႃႇႁု လႆႈမွၵ်ႇလၢတ်ႈၵႂႃႇဝႃႈၼၼ်ယဝ်ႉ။
မိူဝ်ႈၽွင်း ၸႅၵ်ႇၶႅပ်းၵၢင်ၸႂ် ပိူင်ယုၵ်းယၢင်ႇ ၶေႃႈတႅပ်းတတ်း တႃႇၵိုတ်းတိုၵ်းၵမ်းလဵဝ် တီႈၵႃႇၸႃႇ ၵႃႈတီႈ ၶွင်ႇၸီႇပၢႆးႁူမ်ႇလူမ်ႈ ၸုမ်းၸၢတ်ႈၸိုင်ႈလုမ်ႈၾႃႉၼၼ်ႉ ယွၼ်ႉပိူဝ်ႈဝႃႈ ဢမႄႇရိၵၢၼ်ႇ ဢမ်ႇလႆႈၸႂ်ႉ ဝီႇတူဝ်ႇသေ ပၢၵ်ႈပႅတ်ႈလႄႈ ၸွမ်ၽွင်းလူင် ၼႄႇတၼ်ႇယႃႇႁု လႆႈယႃႉပႅတ်ႈ ၶပ်ႉမၢႆ တႃႇပွႆႇၸုမ်းတႅၼ်းၽွင်း တႃႇၵႂႃႇဢုပ်ႇဢူဝ်းလွင်ႈၵႃႇၸႃႇ ၵႃႈတီႈ ဝႃႇသျိၼ်ႇတၼ်ႇၼၼ်ႉယဝ်ႉ ၸင်ႇမီး ၶေႃႈမွၵ်ႇလၢတ်ႈမႃး ၸိူင်ႉၼႆယဝ်ႉ။ ပၢင်ဢုပ်ႇဢူဝ်း ဢၼ်ႁၢင်ႈႁႅၼ်းဝႆႉ တႃႇဢုပ်ႇဢူဝ်း လွင်ႈဢၼ်ဢိတ်ႇသရေးၶဝ် တိုၵ်ႉႁၢင်ႈႁႅၼ်း တႃႇၶဝ်ႈတိုၵ်းဝဵင်း ရႃႇၾႃႇ လႄႈ တႃႇဢုပ်ႇဢူဝ်း လွင်ႈဢမႄႇရိၵၢၼ်ႇၶဝ် လႆႈမႆႈၸႂ်ၼၼ်ႉ ယၢမ်းလဵဝ် လွင်ႈဝႃႈ တေ ဢမ်ႇပွႆႇၸုမ်းတႅၼ်းၽွင်းမႃးၼၼ်ႉ ပဵၼ်ဢၼ်လႆႈၸႂ်လုၸွမ်းတႄႉတႄႉ ၼႆ ၽူႈမီးပုၼ်ႈၽွၼ်း ႁိူၼ်းၵႅဝ်ႈၶၢဝ်ႇ လႆႈမွၵ်ႇလၢတ်ႈမႃးယဝ်ႉ။ ၵူၺ်းၵႃႈဝႃႈ ပေႃး ၽွင်းလူင်ၵၢၼ်ၵႅတ်ႇၵင်ႈ ဢိတ်ႇသရေး လႄႈ ၸိူဝ်းပဵၼ် ၽူႈမီးတႃၶုၼ်ၸၼ်ႉသုင်ဢမႄႇရိၵၢၼ်ႇၶဝ် ဢုပ်ႇဢူဝ်းၵၼ်မႃးတႄႉ ၶဝ်တေ ပၼ်ႁႅင်းတဵၵ်း ယႃႇပေ ႁႂ်ႈတိုၵ်းဝဵင်း ရႃႇၾႃႇ ဝႃႈၼႆယဝ်ႉ။
ငိူၼ်ႈငဝ်ႈတိုၼ်း
- VOA News. "Netanyahu: 'Israel Will Not Submit to Delusional Demands of Hamas'" — VOA News, March 26, 2024
- VOA News. "တိုက်ပွဲတွေအရှိန်မြှင့်သွားမယ်လို့ အစ္စရေးဝန်ကြီးချုပ်ပြော" — VOA News, March 26, 2024
- Associated Press. "Israel won't accept Hamas demands after militant group rejects cease-fire plan" — The Washington Post, March 26, 2024
