Wn/shn/ၸွမ်ၽွင်းလူင် မိူင်းထႆး ပၼ်ၽၢင်ႉ ပေႃးၶဝ်ႈမိူင်းထႆးဢမ်ႇပဵၼ်တၢင်းၵၢၼ် တေဢဝ်လိူင်ႈ

ဝၼ်းဢင်းၵၢၼ်း၊ ၾႅပ်ႇဝႃႇရီႇ 20၊ 2024 

ၸွမ်ၽွင်းလူင် မိူင်းထႆး သဵတ်ႇထႃ ထဝိသိၼ်

ၸွမ်ၽွင်းလူင် မိူင်းထႆး သဵတ်ႇထႃ ထဝိသိၼ် လႆႈပၼ်ၽၢင်ႉဝႃႈ ဝၢႆးသေ တီႈၶွင်ႇသီႇသိုၵ်းမၢၼ်ႈ တီႈမျၢၼ်ႇမႃႇ လႆႈပိုၼ်ၽၢဝ်ႇ မၵ်းမၼ်ႈ ၵူတ်းမၢႆႁၢပ်ႇထၢမ်းၵၢၼ်သိုၵ်းယဝ်ႉ သင်ၸိူဝ်ႉဝႃႈ မီးလွင်ႈၶဝ်ႈမႃးၼႂ်းမိူင်းထႆး ဢၼ်ဢမ်ႇပဵၼ်တၢင်းၵၢၼ်ၼႆ တေဢဝ်လိူင်ႈၵႂႃႇ ဝႃႈၼႆယဝ်ႉ။

ဝၢႆးသေ ၶွင်ႇသီႇသိုၵ်းမၢၵ်ႈ လႆႈပိုၼ်ၽၢဝ်ႇဝႃႈ ၵပ်းၵၢႆႇလူၺ်ႈလွင်ႈႁဵတ်းသၢင်ႈ ဢၼ်ၵဵဝ်ႇၵပ်းလွင်ႈႁၢပ်ႇထၢမ်းၵၢၼ်သိုၵ်းၼၼ်ႉ တေတႄႇႁဵတ်းၵႂႃႇၼႂ်း လိူၼ်ဢေႇပရႄႇ ၼႆယဝ်ႉၵေႃႈ ႁူဝ်ၼပ်ႉၵူၼ်းမိူင်းမျၢၼ်ႇမႃႇ ဢၼ်လဝ်ႈတၢင်ႇဝီႇသႃႇၸူး မိူင်းထႆးၼႆႉ တိူဝ်းၼမ်မႃးၼၼ်ႉၵေႃႈ ၸွမ်ၽွမ်းလူင်မိူင်းထႆး လႆႈလၢတ်ႈပႃးယူႇ။

ၶုၼ်သဵတ်ႇထႃ မွၵ်ႇလၢတ်ႈဝႃႈတႄႉ "ပေႃးၶဝ်ႈမႃးၼႂ်းမိူင်း ပဵၼ်တၢင်းၵၢၼ်ၼႆတႄႉ ႁဝ်းၶႃႈ ႁပ်ႉတွၼ်ႈယူႇ။ သင်ၸိူဝ်ႉဝႃႈ လၵ်ႉၶဝ်ႈမႃးၼႆတႄႉ တေထုၵ်ႇဢဝ်လိူင်ႈ ၸွမ်းၼင်ႇပၵ်းပိူင်မီးဝႆႉၼၼ်ႉယဝ်ႉ။ ၵပ်းၵၢႆႇလူၺ်ႈ လွင်ႈၼႆႉသေ လႆႈဢုပ်ႇဢူဝ်းၵၼ်ဝႆႉတင်း ဢေႇၵျႅၼ်ႇသီႇ ၽၢႆႇႁူမ်ႇလူမ်ႈၶဝ်ဝႆႉယဝ်ႉ" ဝႃႈၼႆ။

မၼ်းလၢတ်းပႃႈဝႃႈ ထႅင်ႈ ပႅင်ႈၼင်ႇပဵၼ် ၸွမ်ၽွင်းလူင်မိူင်းထႆးၵေႃႉၼိုင်ႈသေ တိုၵ်ႉၶတ်းၸႂ်ၵႄႈလိတ်ႈပၼ် လွင်ႈဢၼ်ၵူၼ်းထႆးၶဝ် ဢွၼ်ၵၼ်မႆႈၸႂ်ဝႆႉဝႃႈ ၸိူဝ်းပဵၼ်ၵူၼ်း ဢၼ်တေလုၵ်ႉတီႈ မိူင်းမျၢၼ်ႇမႃႇ ၶၢႆႉမႃးယူႇသဝ်းၼၼ်ႉ ၵူဝ်ၶဝ် မႃးႁိမ်ဢဝ် တိုဝ်ႉတၢင်း ၵၢၼ်ငၢၼ်း ၵူၼ်းမိူင်းထႆး ဢၼ်ဝႃးၼၼ်ႉယူႇ ဝႃႈၼႆ။

လွင်ႈတၢင်းဢၼ် ၵူၼ်းမိူင်းမျၢၼ်ႇမႃႇ ဢွၼ်ၵၼ် ပၢႆႈဢွၵ်ႇမႃးတၢင်းမိူင်းထႆးၼႆႉ မၼ်းပဵၼ် ယွၼ်ႉ ၵူတ်းမၢႆႁၢပ်ႇထၢမ်းၵၢၼ်သိုၵ်း ဢမ်ႇႁၢပ်ႇဢမ်ႇလႆႈ ၼၼ်ႉၵေႃႈ ၶဝ်ႈပဵၼ်လွင်ႈတၢင်းဢၼ်ၼိုင်ႈ ဝႃႈၼႆယဝ်ႉ။

မၼ်းသိုပ်ႇလၢတ်ႈဝႃႈ ၽွၼ်း ၵူတ်းမၢႆဢၼ်ၼႆႉၼႆႉ မၼ်းတေႁဵတ်းႁႂ်ႈ ႁူဝ်ၼပ်ႉၵူၼ်းမိူင်းမျၢၼ်ႇမႃႇ ဢၼ်ၶဝ်ႈမႃးႁဵတ်းၵၢၼ် ဢမ်ႇပဵၼ်တၢင်းၵၢၼ်ၼၼ်ႉ တေတိူဝ်းလိူဝ်မႃးထႅင်ႈ ဝႃႈၼႆယဝ်ႉ။

ထႅင်ႈၽၢႆႇၼိုင်ႈၵေႃႈ လုမ်းၽွင်းမိူင်းထႆး ဢၼ်မီးတီႈ တႃႈၵုင်ႈၼၼ်ႉ တေတႄႇၸႂ်ႉပိူင် ဢၼ်လုၵ်ႉတီႈၼိူဝ် ဢွၼ်ႇလၢႆးသေ လဝ်ႈတၢင်ႇဝီႇသႃႇမိူင်းထႆး လႆႈၼၼ်ႉသေ လုမ်းၽွင်း မိူင်းထႆး ဢၼ်မီးတီႈ မိူင်းမျၢၼ်ႇမႃႇၼၼ်ႉ လႆႈပိုၼ်ၽၢဝ်ႇတီႈ ၼႃႈလိၵ်ႈသိုဝ်ႇတူင်ႇဝူင်းၵူၼ်းၶဝ်ဝႆႉဝႃႈ ၼိုင်ႈဝၼ်းၼႆႉ ၶဝ်တေႁပ်ႉ ၽိုၼ်တၢင်ႇဝီႇသႃႇဢွၼ်ႇလၢႆး တႃႇ 200 ၵေႃႉ၊ ၽိုၼ်တၢင်ႇဝီႇသႃႇ ဢၼ်တူဝ်ၵူၼ်းမႃး တႃႇ 200 ၵေႃႉ ႁူမ်ႈ 400 ၵေႃႉ ဝႃႈၼႆယဝ်ႉ။

တီႈ ၶၢဝ်ႇပင်ႇၵွၵ်ႉၽူတ်ႉ တႅမ်ႈဝႆႉဝႃႈတႄႉ ႁူဝ်ၼပ်ႉၵူၼ်းမိူင်းမျၢၼ်ႇမႃႇ ဢၼ်လဝ်ႈတၢင်ႇဝီႇသႃႇ တီႈ လုမ်းၽွင်းမိူင်းထႆး တီႈမျၢၼ်ႇမႃႇၼၼ်ႉ ၼိုင်ႈဝၼ်း မီးယူႇ ႁဵင်ပၢႆ ဝႃးၼႆယဝ်ႉ။

မိူဝ်ႈဝၼ်းသဝ်ပူၼ်ႉမႃးၼၼ်ႉ ၽၢႆႇၶွင်ႇသီႇသိုၵ်းမၢၼ်ႈၶဝ် လႆႈမွၵ်ႇလၢတ်ႈဝႃႈ တွၼ်ႈတႃႇ ႁၢပ်ႇထၢမ်းၵၢၼ်သိုၵ်း ၼႆႉ တေၵဵပ်းၸိူဝ်းပဵၼ်ၸၢႆး ဢႃႇယု 18 တေႃႇ 35 လႄႈ ၸိူဝ်းပဵၼ်ယိင်း ဢႃႇယု 18 တေႃႇ 27 သေ တေလႆႈႁၢပ်ႇထၢမ်းၵၢၼ်သိုၵ်း တႃႇ သွင်ပီ ဝႃႈၼႆယဝ်ႉ။ ၵူတ်းမၢႆႁၢပ်ႇထၢမ်းၵၢၼ်သိုၵ်းၼႆႉ လႆႈတႄႇမႃး ၸဵမ်မိူဝ်ႈ ပီ 2010 ၼၼ်ႉသေတႃႉ ဢမ်ႇလႆႈတႄႇၸႂ်ႉတိုဝ်းၵမ်မႃးၼင်ႇၵဝ်ႇ။

ငိူၼ်ႈငဝ်ႈတိုၼ်း

• Bangkok Post and Reuters. "PM warns Myanmar nationals over illegal entry" — Bangkok Post, February 19, 2024
• BBC News. "ထိုင်းနိုင်ငံထဲ တရားမဝင်ဝင်ရောက်လာရင် အရေးယူမယ်လို့ ထိုင်းဝန်ကြီးချုပ်သတိပေး" — BBC News, February 20, 2024