Wn/shn/ၸဝ်ႈၸွမ်ၸိုင်ႈ ယူႇၶရဵၼ်း ႁွတ်ႈၽႅဝ်မႃး ပရိတ်ႉတဵင်ႇ
ဝၼ်းပုတ်ႉ၊ ၾႅပ်ႇဝႃႇရီႇ 8၊ 2023
ၸဝ်ႈၸွမ်ၸိုင်ႈ ယူႇၶရဵၼ်း ၼႆႉ ဢမ်ႇမီးၶပ်ႉမၢႆသေၵေႃႈ ၵိုင်ႉၵၢင်ႉႁွတ်ႈၽႅဝ်မႃး မိူင်းပရိတ်ႉတဵင်ႇယဝ်ႉ။
ၶၢဝ်းတၢင်းပွၵ်ႈၼႆႉ ပဵၼ်ၶၢဝ်းတၢင်း ၸဝ်ႈၸွမ်ၸိုင်ႈ ပလူဝ်ႇတီႇမီႇယႃႇ ၸႄလႅၼ်ၸၵီး ဢၼ်မႃးမိူင်းပရိတ်ႉတဵင်ႇ ပွၵ်ႈဢွၼ်တၢင်းသုတ်း ဝၢႆးသေ ရတ်ႈသျႃးၶဝ် ပူၼ်ႉပႅၼ် ယူႇၶရဵၼ်းယဝ်ႉသေ မိူဝ်ႈပူၼ်ႉမႃး 2 ပီပၢႆၼၼ်ႉတႄႉ မၼ်းႁွတ်ႈၽႅဝ်မႃး ပဵၼ်ပွၵ်ႈလိုၼ်းသုတ်းယဝ်ႉ။
လႆႈမုင်ႈမွင်းဝႆႉဝႃႈ ၸဝ်ႈၸွမ်ၸိုင်ႈ ၸႄလႅၼ်ၸၵီး လႄႈ တင်း ၶုၼ်ႁေႃၶမ်း ၶျႃးလ်သ် တေႁူပ်ႉထူပ်းၵၼ်ယူႇၼႆယဝ်ႉ။ တေထူပ်းပႃးတင်း ၸွမ်ၽွင်းလူင် ရီႇသျီႇသူးၼတ်ႉ သေၵေႃႈ တေမီးၶပ်ႉမၢႆ မွၵ်ႇလၢတ်ႈၶေႃႈၵႂၢမ်း တီႈ သၽႃးပရိတ်ႉတိတ်ႉ ၼႆယဝ်ႉ။
လိူဝ်သေၼၼ်ႉဢမ်ႇၵႃး တေၵႂႃႇထူပ်းပႃး တပ်ႉၸုမ်း ယူႇၶရဵၼ်း ဢၼ်တိုၵ်ႉၶိုၼ်ႈၵၢၼ်ၽိုၵ်း ယူႇတီႈ ယူႇၶေႇၼၼ်ႉၼႆယဝ်ႉ။
လႆႈမီးလွင်ႈပိုၼ်ၽၢဝ်ႇဝႆႉဝႃႈ တေမႄႇၶႂၢၵ်ႈ လွင်ႈၵၢၼ်ၽိုၵ်း တွၼ်ႈတႃႇ ၵူၼ်းႁေႃႈႁိူဝ်းမိၼ်တိုၵ်းသိုၵ်း လႄႈ သိုၵ်းႁၢၼ်ပရဵင်း ၵႂႃႇ ဝႃႈၼႆယဝ်ႉ။
ၽူႈဢွၼ်ႁူဝ် ယူႇၶရဵၼ်းၼႆႉ တေမွၵ်ႇလၢတ်ႈၶေႃႈၵႂၢမ်းတီႈ သၽႃးယူးရူပ်ႉသေ ပေႃးဝၼ်းၽတ်းမႃး တေၵႂႃႇ ပရတ်ႉသႄးလ် တွၼ်ႈတႃႇၶိုၼ်ႈႁွတ်ႈ ပၢင်ၵုမ်ထႅၼ်ႈၼႆယဝ်ႉ။
ငဝ်ႈငႃႇ[edit | edit source]
- "President Zelensky in first UK visit since invasion of Ukraine" — BBC, February 8, 2023
