Wn/shn/ၸဝ်ႈၸွမ်ၸိုင်ႈရတ်ႈသျႃး ပူႇထိၼ်ႇ ႁွတ်ႈထိုင် ၵၢဝ်းလီႁွင်ႇ

ဝၼ်းပုတ်ႉ၊ ၸုၼ်ႇ 19၊ 2024 

ၵိမ်ၸူင်ဢုၼ်ႇ ႁပ်ႉတွၼ်ႈတူင်ႉတၵ်ႉ ဝလႃႇၻီႇမီႇရ် ပူႇထိၼ်ႇ

ၸဝ်ႈၸွမ်ၸိုင်ႈရတ်ႈသျႃး ဝလႃႇၻီႇမီႇရ် ပူႇထိၼ်ႇၼႆႉ ႁွတ်ႈထိုင် မိူင်းၵၢဝ်းလီ မိူဝ်ႈဝၼ်းပုတ်ႉတွၼ်ႈၸဝ်ႉၼႆႉသေ လႆႈမုင်ႈမွင်းဝႆႉဝႃႈ တေမီးလွင်ႈလူင်းလၢႆးမိုဝ်း လိၵ်ႈႁူမ်ႈမၢႆ တႃႇ မိူင်းရတ်ႈသျႃး လႄႈ ၵၢဝ်းလီႁွင်ႇၶဝ် တေ တိူဝ်းႁူမ်ႈသၢင်ႈၵၼ်ၵႂႃႇၼၼ်ႉ ၼႆယဝ်ႉ။

ၶၢဝ်းတၢင်းၼႆႉ ပဵၼ်ၶၢဝ်းတၢင်း ပွၵ်ႈဢွၼ်တၢင်းသုတ်း ၼႂ်းၵႃႈ ၶၢဝ်းတၢင်း 24 ပီ ဢၼ်ၸဝ်ႈၸွမ်ၸိုင်ႈရတ်ႈသျႃး ၵေႃႉၼိုင်ႈ လႆႈႁွတ်ႈထိုင် ၵၢဝ်းလီႁွင်ႇၼၼ်ႉယဝ်ႉ။ တီႈသိုဝ်ႇၶၢဝ်ႇရတ်ႈသျႃးၶဝ် လၢတ်ႈဝႃႈ ၽွင်းမိူဝ်ႈ ၸဝ်ႈၸွမ်ၸိုင်ႈရတ်ႈသျႃး ႁွတ်ႈၽႅဝ်မႃး တီႈ ဝဵင်းလူင်ပျူင်းယၼ်း တီႈ မိူင်းၵၢဝ်းလီႁွင်ႇၼၼ်ႉ တီႈသဵၼ်ႈတၢင်းလူင် တီႈၼႂ်း ဝဵင်းပျူင်းယၼ်းၼၼ်ႉ လႆႈပၵ်း ၸွမ်ပိဝ်မိူင်းရတ်ႈသျႃး လႄႈ ၸဝ်ႈၸွမ်ၸိုင်ႈရတ်ႈသျႃး ပူႇထိၼ်ႇဝႆႉ တင်းၼမ် ဝႃႈၼႆယဝ်ႉ။

ႁွင်ႈၵၢၼ်ၶၢဝ်ႇ TASS လၢတ်ႈဝႃႈ ၸဝ်ႈၸွမ်ၸိုင်ႈရတ်ႈသျႃး ပူႇထိၼ်ႇ လႆႈတႅပ်းတတ်းဝႆႉဝႃႈ ၼႂ်းၵႃႈၶၢဝ်းတၢင်း ဢၼ်တေ ႁိုင်သွင်ဝၼ်းၼႆႉ တေ လူင်းလၢႆးမိုဝ်းႁူမ်ႈၵၼ်တင်း ၽူႈဢွၼ်ႁူဝ် ၵၢဝ်းလီႁွင်ႇ ၵိမ်ၸူင်ဢုၼ်ႇ တွၼ်ႈတႃႇ လွင်ႈၽွမ်ႉၸႂ် တႃႇႁူမ်ႈသၢင်ႈ တီႈၼႂ်းၵႄႈ ရတ်ႈသျႃး လႄႈ ၵၢဝ်းလီႁွင်ႇ ၼၼ်ႉ ဝႃႈၼႆယဝ်ႉ။ ၼႂ်းၶေႃႈၽွမ်ႉၸႂ်ၼၼ်ႉ ၶဝ်ႈပႃးလွင်ႈသင်ဢၼ်ဝႃႈၼၼ်ႉ ဢမ်ႇလႆႈမွၵ်ႇဝႆႉ လွင်ႈတၢင်းႁူဝ်ယွႆႈမၼ်းသေတႃႉ တီႈၼႂ်းၶၢဝ်ႇမိူဝ်ႈတွၼ်ႈၸဝ်ႉၼၼ်ႉလၢတ်ႈဝႆႉဝႃႈတႄႉ ဢိင်ၼိူဝ် ၵႅမ်ပေႃႇလသီႇၵၢၼ်ၼွၵ်ႈမိူင်း ပူႇတိၼ်ႇလၢတ်ႈဝႃႈ လႅပ်ႈတေ ၶဝ်ႈပႃး ၵဵဝ်ႇၵပ်းလူၺ်ႈၵၢၼ်ၵႅတ်ႇၵင်ႈ ဝႃႈၼႆယဝ်ႉ။

မိူဝ်ႈဝၼ်းဢင်းၵၢၼ်း တွၼ်ႈၸဝ်ႉၼၼ်ႉ တီႈၼႂ်းၶၢဝ်ႇၵၢဝ်းလီႁွင်ႇ ၼႄ ၽိုၼ်လိၵ်ႈ ဢၼ်ၸဝ်ႈၸွမ်ၸိုင်ႈရတ်ႈသျႃး ၶၼ်ႇပၢၵ်ႇလၢတ်ႈဝႆႉဝႃႈ တေႁူမ်ႈၵၼ်တင်း ၵၢဝ်းလီႁွင်ႇသေ ႁဵတ်းသၢင်ႈ တႃႇတုမ်ႉတွပ်ႇၶိုၼ်း လွင်ႈၵူႈမိူင်းမိူင်းႁႄႉႁၢမ်ႈဝႆႉၼၼ်ႉ ၼႆယဝ်ႉ။ တီႈၼႂ်းလိၵ်ႈၼၼ်ႉ ၸဝ်ႈၸွမ်ၸိုင်ႈရတ်ႈသျႃး လၢတ်ႈဝႆႉဝႃႈ တေပူၵ်းတင်ႈ ပိူင်ၵၢၼ်ၵႃႉၶၢႆ ဢၼ်မိူင်းဝၼ်းတူၵ်းၶဝ် ဢမ်ႇၵုမ်းၵမ်လႆႈၼၼ်ႉသေ တေ ႁူမ်ႈၵၼ်သၢၼ်ၶတ်း လွင်ႈမၵ်းၶၼ်ႈ ဢၼ်ဢမ်ႇပဵၼ်တၢင်းၵၢၼ်ၼၼ်ႉၵႂႃႇ ဝႃႈၼႆယဝ်ႉ။

ငိူၼ်ႈငဝ်ႈတိုၼ်း

• Kim Tong-hyung. "Russia President Vladimir Putin makes a rare visit to North Korea, an old ally" — AP News, June 19, 2024
• William Gallo. "Putin in North Korea, with new treaty in focus" — VOA News, June 18, 2024
• Euronews with AP. "Russian President Vladimir Putin praises Pyongyang as he goes on rare North Korea visit" — Euronews, June 18, 2024
• Stella Kim and Mithil Aggarwal. "Kim Jong Un and Putin sign mutual defense pact as Russian leader visits North Korea" — NBC News, June 19, 2024