Wn/shn/ၸဝ်ႈၸွမ်ၸိုင်ႈရတ်ႈသျႃး ပူႇထိၼ်ႇ ႁွတ်ႈထိုင် ဝႅတ်ႉၼမ်း

ဝၼ်းၽတ်း၊ ၸုၼ်ႇ 20၊ 2024 

ၸဝ်ႈၸွမ်ၸိုင်ႈရတ်ႈသျႃး ဝလႃႇၻီႇမီႇရ် ပူႇထိၼ်ႇ ႁူပ်ႉထူပ်းတင်း ၽူႈၼမ်းၼႂ်းလူင် ပႃႇတီႇၶွမ်ႇမိဝ်ႇၼိတ်ႉ ဝႅတ်ႉၼမ်း

မိူဝ်ႈလိူၼ်ၸုၼ်ႇ 20 ဝၼ်းၼၼ်ႉ ၸဝ်ႈၸွမ်ၸိုင်ႈရတ်ႈသျႃး ဝလႃႇၻီႇမီႇရ် ပူႇထိၼ်ႇ ဢၼ်ႁွတ်ႈထိုင်တီႈ မိူင်းဝႅတ်ႉၼမ်းၼၼ်ႉ လႆႈမွၵ်ႇလၢတ်ႈပၼ်ၵႂၢမ်းမၼ်ႈ ဝႃႈ တေ ၵေႃႇသၢင်ႈလွင်ႈၵပ်းသိုပ်ႇ ဢၼ်တိူဝ်းလိုၵ်ႉလမ်ႇ ၼႂ်းၵႄႈ မိူင်းသွင်မိူင်း ဝႃႈၼႆယဝ်ႉ။

ၸဝ်ႈၸွမ်ၸိုင်ႈပူႇထိၼ်ႇၼႆႉ ဝၢႆးသေ လႆႈႁဵတ်းပၢင်ၵုမ်တင်း ၽူႈဢွၼ်ႁူဝ် ၵၢဝ်းလီႁွင်ႇယဝ်ႉ လႆႈလူင်းလၢႆးမိုဝ်း လိၵ်ႈႁူမ်ႈမၢႆ တႃႇၶဵင်ႇၵမ်ႉၸွႆႈၵၼ် ဢၼ်ၵဵဝ်ႇလူၺ်ႈၵၢၼ်ၵႅတ်ႇၵင်ႈ ၼႂ်းၵႄႈ မိူင်းရတ်ႈသျႃး လႄႈ မိူင်းၵၢဝ်းလီႁွင်ႇ မိူင်းသွင်မိူင်း ဢိၵ်ႇတင်း တႃႇၵၢဝ်းလီႁွင်ႇ ၵမ်ႉထႅမ်ပၼ်တဵမ်တဵမ်ထူၼ်ႈထူၼ်ႈ ၼိူဝ် လိူင်ႈယူႇၶရဵၼ်း ၼၼ်ႉသေ ၸင်ႇလႆႈႁွတ်ႈၽႅဝ်ထိုင်မႃး မိူင်းဝႅတ်ႉၼမ်း ဢၼ်လႆႈၸမ်ၸႂ်ပဵၼ်ဢူၺ်းလီၵၼ်မႃး ၸဵမ်မိူဝ်ႈပၢၼ်သိုၵ်းယဵၼ်ၼၼ်ႉယဝ်ႉ။ တီႈဝႅတ်ႉၼမ်းတႄႉ ႁူမ်ႈဝႃႈ ဢမ်ႇလႆႈလွင်ႈၵမ်ႉထႅမ်မိူၼ်ၼင်ႇ ၵၢဝ်းလီႁွင်ႇသေတႃႉ ၸဝ်ႈၸွမ်ၸိုင်ႈဝႅတ်ႉၼမ်း To Lam လႆႈၼႄ သၢႆငၢႆ လွင်ႈဝႃႈ မီးၵၢင်ၸႂ် တႃႇႁူမ်ႈႁွမ်းႁဵတ်းသၢင်ႈ ၵဵဝ်ႇလူၺ်ႈ လွင်ႈၵၢၼ်ၵႅတ်ႇၵင်ႈ ၼႂ်းၵႄႈ မိူင်းသွင်မိူင်းယူႇ ဝႃႈၼႆယဝ်ႉ။

ၸဝ်ႈၸွမ်ၸိုင်ႈ ဝႅတ်ႉၼမ်း To Lam လႆႈမွၵ်ႇလၢတ်ႈ ၵူၼ်းၶဝ်ၶၢဝ်ႇၶဝ် ဝၢႆးသေ ထူပ်းၵၼ်တင်း ၸဝ်ႈၸွမ်ၸိုင်ႈပူႇထိၼ်ႇယဝ်ႉ ဝႃႈ “မီးၵၢင်ၸႂ် တႃႇႁူမ်ႈၵၼ်ႁဵတ်းသၢင်ႈ တီႈ ၵၢၼ်ၵႅတ်ႇၵင်ႈ လႄႈ လွင်ႈတၢင်း ၸိူဝ်းၵဵဝ်ႇၵပ်း ၵၢၼ်ႁူမ်ႇလူမ်ႈ၊ လွင်ႈၶဵင်ႇတႃႉ ပၢႆးႁူမ်ႇလူမ်ႈ ဢၼ်ဢမ်ႇၸႂ်ႈပၵ်းၵဝ်ႇပိူင်ၵဝ်ႇ ၸိူဝ်းဢၼ်ဢိင်ၼိူဝ်ပိုၼ်ႉထၢၼ် ပၵ်းပိူင်ၵူႈမိူင်းမိူင်း၊ လွင်ႈငမ်းယဵၼ် ၼႂ်းပိုၼ်ႉတီႈ လႄႈ တင်းလူၵ်ႈ၊ ၸိူဝ်းၼႆႉ မိူင်းသွင်မိူင်း လႆႈမီးၵၢင်ၸႂ် တႃႇႁူမ်ႈႁွမ်းၵၼ်သေ ႁဵတ်းသၢင်ႈၵႂႃႇ“ ဝႃႈၼႆယဝ်ႉ။

ရတ်ႈသျႃးၼႆႉ ပဵၼ်မိူင်းပိူင်လူင် ဢၼ်တၢင်ႇလၢၵ်ႈၼၢၵ်ႈပၼ် ဝႅတ်ႉၼမ်းသေ တႄႇဢဝ် ပီ 1995 တေႃႇ ပီ 2023 ၼၼ်ႉ ၼႂ်းၵႃႈ ဝႅတ်ႉၼမ်း သိုဝ်ႉၶိူင်ႈလၢၵ်ႈၼၢၵ်ႈၼၼ်ႉ ဢၼ်လုၵ်ႉတီႈ ရတ်ႈသျႃးမႃး မီး ႁူဝ်ပၢၵ်ႇ 80 ယဝ်ႉ။ လႆႈမီး လွင်ႈလူင်းလၢႆးမိုဝ်း ၶေႃႈၽွမ်ႉၸႂ် ၼႂ်းၵႄႈ ဝႅတ်ႉၼမ်း လႄႈ ရတ်ႈသျႃး တႄႇဢဝ် ထၢၼ်ႈပၢႆးပႆႇၺႃႇ တေႃႇ လွင်ႈၽွင်းငမ်း လႄႈ ပႃးၸဵမ် ၽႅၼ်ၵၢၼ် ၼိဝ်ႇၵလီးယႃး ၸိူဝ်းၼႆႉယဝ်ႉ။

ငိူၼ်ႈငဝ်ႈတိုၼ်း

• Helen Regan,. "Putin arrives in Vietnam as Russia seeks support in face of Western isolation" — CNN, June 20, 2024
• Rebecca Ratcliffe South-east Asia correspondent and agencies. "Russia and Vietnam agree to strengthen ties during Putin state visit" — The Guardian, June 20, 2024
• Khanh Vu and Minh Nguyen. "Visiting Vietnam, Putin seeks new 'security architecture' for Asia" — Reuters, June 20, 2024
• Jonathan Head. "Putin vows deeper ties with Vietnam in visit criticised by US" — BBC News, June 20, 2024
• DW News. "Russia, Vietnam pledge to deepen ties as Putin visits" — DW News, June 20, 2024
• Cna. "Russian President Putin arrives in Vietnam for state visit" — CNA, June 20, 2024