Wn/shn/ၶႅၼ်ႇၼေႇတႃႇ တေပၼ်တၢင်းၸွႆႈထႅမ်သိုၵ်း ယူႇၶရဵၼ်း တႃႇ တေႃႇလႃႇ 650 လၢၼ်ႉ

ဝၼ်းသဝ်၊ သႅပ်ႇ​ထႅမ်ႇပႃႇ 23၊ 2023 

ၸွမ်ၸိုင်ႈယူႇၶရဵၼ်း လႄႈ ၽွင်းလူင်ၵၢၼ်ၼွၵ်ႈမိူင်း ၶႅၼ်ႇၼေႇတႃႇၶဝ် ၸတ်းႁဵတ်းပၢင်ၵုမ်

ဝၢႆးသေ ၸွမ်ၸိုင်ႈယူႇၶရဵၼ်း Volodymyr Zelenskyy ၶိုၼ်ႈမွၵ်ႇလၢတ်ႈၶေႃႈၵႂၢမ်းတီႈ သၽႃးၶႅၼ်ႇၼေတႃႇယဝ်ႉ ၸွမ်ၽွင်းလူင်ၶႅၼ်ႇၼေႇတႃႇ Justin Trudeau လႆႈပၼ်ၵႂၢမ်းမၼ်ႈဝႃႈ ၼႂ်းၶၢဝ်းတၢင်း သၢမ်ပီၼႆႉ ၶႅၼ်ႇၼေႇတႃႇ တေပၼ်တၢင်းၸွႆႈထႅမ်သိုၵ်း ယူႇၶရဵၼ်း တႃႇ တေႃႇလႃႇ 650 လၢၼ်ႉ ဝႃႈၼႆယဝ်ႉ။ လိူဝ်သေၼၼ်ႉဢမ်ႇၵႃး တေတိူဝ်းႁဵတ်း လွင်ႈဢိုတ်းႁၢမ်ႈပၼ်တၢမ်ႇ ၼိူဝ်ရတ်ႈသျႃး ဢၼ်ၶဝ်ႈတိုၵ်းပူၼ်ႉပႅၼ် ယူႇၶရဵၼ်းၼၼ်ႉ ၼႆယဝ်ႉ။

ၸွမ်းၽွင်းလူင်ၶႅၼ်ႇၼေႇတႃႇ Trudea လႄႈ ၸွမ်ၸိုင်ႈယူႇၶရဵၼ်း Zelenskyy ၼႆႉ လႆႈႁဵတ်းလိၵ်ႈႁူမ်ႈမၢႆ ဢၼ်ၵႃႉၶၢႆၵုၼ်ႇ လွတ်ႈလႅဝ်းၵၼ်ၼၼ်ႉယဝ်ႉ။ တီႈပၢင်ၸႅင်ႈၶၢဝ်ႇ ၽူႈဢွၼ်ႁူဝ်သွင်ၵေႃႉ ဢၼ်ၸတ်းႁဵတ်းတီႈ Otawa ၼၼ်ႉ ၸွမ်ၽွင်းလူင်ၶႅၼ်ႇၼေႇတႃႇဝႃႈ တီႈဢၼ်ၵႅတ်ႇၶႄႁႄႉၵင်ႈ တီႇမူဝ်ႇၶရေႇၸီႇၼၼ်ႉ လူဝ်ႇလႆႈၽွမ်ႉၽဵင်ႇၵၼ် ၼႆသေ မၼ်းလႆႈသိုပ်ႇလၢတ်ႈ လွင်ႈသႄႉသွမ်း ဢၼ် ၸွမ်ၸိုင်ႈရတ်ႈသျႃး Vladimir Putin လႆႈၶဝ်ႈပူၼ်ႉပႅၼ် ယူႇၶရဵၼ်းၼၼ်ႉယဝ်ႉ။

ငိုၼ်းၵမ်ႉထႅမ် ဢၼ်ၶႅၼ်ႇၼေႇတႃႇ ပၼ်တွၼ်ႈတႃႇ ယူႇၶရဵၼ်းၼၼ်ႉ တေဢဝ်ၸႂ်ႉတွၼ်ႈတႃႇ လူတ်ႉၵင်ႈမၢၵ်ႇၵွင်ႈ ဢၼ်ၸႂ်ႉၽၢႆႇၵၢၼ်ယူတ်းယႃ လႄႈ ဢိၵ်ႇတင်း လူတ်ႉၵင်ႈမၢၵ်ႇၵွင်ႈ 50 လမ်း လႄႈ လွင်ႈမႄးၵုမ်းၵႃးလဵၵ်း၊ တေဢဝ်ၸႂ်ႉပႃးတႃႇတီႈ ဢၼ်ၵဵဝ်ႇၵပ်း လွင်ႈၽိုၵ်းၵၢၼ်သိုၵ်း ၸိူဝ်းၼႆႉယဝ်ႉ။

လႆႈပိုၼ်ၽၢဝ်ႇဝႃႈ တီႈၼႂ်းသဵၼ်ႈမၢႆ ဢၼ်လူင်ပွင်ၸိုင်ႈၶႅႅၼ်ႇၼေႇတႃႇဢဝ်လိူင်ႈၼိူဝ် ရတ်ႈသျႃးၼၼ်ႉ သိုပ်ႇသႂ်ႇထႅင်ႈ ရတ်ႈသျႃး 60 ပၢႆ ၼႆယဝ်ႉ။ လိူဝ်သေၼၼ်ႉဢမ်ႇၵႃး ၶႅၼ်ႇၼေႇတႃႇ လႄႈ ယူႇၶရဵၼ်းၶဝ်ၼႆႉ တွၼ်ႈတႃႇ ၵုမ်းၵမ်လႆႈ ငဝ်ႈငုၼ်းယေးငိုၼ်း ရတ်ႈသျႃး လႄႈ ၶွင်ရတ်ႈသျႃးပိူင်ႇ ၸိူဝ်းၼၼ်ႉၵေႃႈ တေႁဵတ်းလွင်ႈဢုပ်ႇဢူဝ်းၵၼ်တင်း ဢူၺ်း G7 ၵႂႃႇ ဝႃႈၼႆယဝ်ႉ။

ဢၼ်ၼႆႉၼႆႉ တႄႇဢဝ် လိူၼ်ၾႅပ်ႇဝႃႇရီႇ 2022 ဢၼ်ရတ်ႈသျႃး ၶဝ်ႈပူၼ်ႉပႅၼ် ယူႇၶရဵၼ်း ၼၼ်ႉသေ ၸွမ်ၸိုင်ႈယူႇၶရဵၼ်း Zelenskyy ၼႆႉ ၽႅဝ်ႈႁွတ်ႈထိုင် ၶႅၼ်ႇၼေႇတႃႇ ပဵၼ်ပွၵ်ႈဢွၼ်တၢင်းသုတ်းယဝ်ႉ။ ပေႃးႁူဝ်ၶမ်ႈ ဝၼ်းသုၵ်းမႃးၼႆတႄႉ ၽူႈဢွၼ်ႁူဝ် 2 ၵေႃႉၼႆႉ တေလုၵ်ႉ Ottawa သေ ၵႂႃႇႁွတ်ႈ တူဝ်ႇရွၼ်ႇတူဝ်ႇ ၼႆယဝ်ႉ။

ငဝ်ႈငႃႇ

• VOA News. "ယူကရိန်းကို စစ်ရေးအကူအညီ ဒေါ်လာသန်း ၆၅၀ ကနေဒါ ပေးမည်" — VOA News, September 23, 2023
• VOA News. "Zelenskyy Thanks Canada for Helping Save ‘Thousands of Lives’" — VOA News, September 23, 2023